އެމްޑީޕީގެ ރިޔާސީ ޕްރައިމަރީއަށްފަހު އެ ޕާޓީ ބައިބައިވެގެން ނުދާނެ ކަމަށާއި، ޕާޓީގެ ހުރިހާ ލީޑަރުންވެސް ތިއްބެވީ ގައުމީ މަސައްކަތުގައި އެކަތިގަނޑެއްގެ ގޮތުގައި ކަމަށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވެއްޖެއެވެ.

މިއަދު ހެނދުނު ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން ޑރ. ޝަމްހީދު ވިދާޅުވީ، އެމްޑީޕީގެ މެންބަރުންނަކީ އަބަދުވެސް އަމިއްލަ ފިކުރާއި ވިސްނުން ބޭނުންކުރާ ބައެއް ކަމަށެވެ.

އަދި ކުރިއަށް އޮތް ރިޔާސީ އިންތިޚާބު ކާމިޔާބު ކުރެވޭނީ އެންމެން އެއް ރޫހެއްގައި މަސައްކަތް ކޮށްގެން ކަމަށް ފާހަގަކުރައްވައި، މާޒީގައި ކަންކަން ހިނގާފައިވާ ގޮތުގެ ތަޖުރިބާއިން އިބުރަތް ހޯދަންޖެހޭ ކަމަށް އޭނާ ވިދާޅުވިއެވެ.

ޕްރައިމަރީގެ ފޯރި ބޮޑުވެ، ވާދަވެރިކަން އުފެދުނު ނަމަވެސް، ޕާޓީގެ އެތެރޭގެ އިންތިޚާބަށްފަހު އެންމެންވެސް ގައުމު ސަލާމަތްކުރުމުގެ މަސައްކަތަށް ނުކުންނާނެ ކަމަށް ޝަމްހީދު ފާހަގަކުރެއްވިއެވެ.

އެހެންކަމުން، އިންތިޚާބު ނިމުމާއެކު ޕާޓީގެ ހުރިހާ ސަފުތަކެއް ބަދަހިކޮށް، އެކުއެކީގައި މަސައްކަތް ކުރުމުގެ މުހިންމުކަން އޭނާ ފާހަގަކުރެއްވިއެވެ.

މީގެއިތުރުން، ޕްރައިމަރީގެ ނަތީޖާއަށްފަހު ކާމިޔާބު ހޯއްދަވާ ކޮންމެ ކެންޑިޑޭޓެއްގެ ފަހަތްޕުޅުގައި ސާބިތުވެ ހުންނަވައިގެން މަސައްކަތް ކުރެއްވުމަށް ތައްޔާރަށް ހުންނެވިކަން ޝަމްހީދު ހާމަކުރެއްވިއެވެ. މިއީ ޕާޓީގެ ކުރިއެރުމަށާއި ކުރިއަށް އޮތް ރިޔާސީ އިންތިޚާބު ކާމިޔާބު ކުރުމަށް ކޮންމެހެން ބޭނުންތެރި ކަމެއްގެ ގޮތުގައި އޭނާ ސިފަކުރެއްވިއެވެ.

އެމްޑީޕީގެ އެތެރޭގެ އިންތިޚާބުތަކަކީ އަބަދުވެސް އާންމު މެންބަރުންގެ ބޮޑު ތަރުހީބެއް ލިބޭ ވާދަވެރި އިންތިޚާބުތަކަކަށް ވާއިރު، އަންނަން އޮތް އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް ޑރ. ޝަމްހީދުވެސް ވަނީ ނިންމަވާފައެވެ.