އެމެރިކާގެ މިޑްޓަރމް އިންތިހާބުގައި ވެރިކަންކުރާ ރިޕަބްލިކަން ޕާޓީއަށް ކުރިމަތިވި ބޮޑު ނާކާމިޔާބީގެ ފަހަތުގައި އީރާނު ހަނގުރާމައިގެ ދައުރެއް އޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް މިހެން ވިދާޅުވެފައިވަނީ އެމެރިކާގެ ހައުސް އޮފް ރެޕްރެޒެންޓެޓިވްސް އަދި ސެނެޓްގެ އަޣުލަބިއްޔަތު އިދިކޮޅު ޑިމޮކްރެޓުން ހޯދައި، ސަރުކާރުގެ ސިޔާސަތުތަކަށް ހުރަސްއެޅުމަށް ތައްޔާރުވަމުންދާ ދަނޑިވަޅެއްގައެވެ.

ފޮކްސް ނިއުސްއަށް ދެއްވި ހާއްސަ ބަސްދީގަތުމެއްގައި ރައީސް ޓްރަމްޕް ވިދާޅުވީ، ކޮންގްރެސްއިން ފާސްކޮށްގެން އޭނާގެ މޭޒުކޮޅަށް ޑިމޮކްރެޓުން ފޮނުވާނެ ކަމަށް ބެލެވެނީ ގަބޫލުކުރަން ދަތި ސިޔާސަތުތައް އެކުލެވޭ ބިލްތައް ކަމަށެވެ.

އަދި ރައީސަށް ލިބިދޭ ގާނޫނީ ބާރުގެ ދަށުން އެފަދަ ހުރިހާ ބިލެއް ވީޓޯ ކުރައްވާނެ ކަމުގެ އިންޒާރުވެސް އޭނާ ދެއްވިއެވެ.

ޓްރަމްޕް އިތުރަށް ފާހަގަކުރެއްވި ގޮތުގައި، ކުރިއަށް އޮތް ދެތިން މަސްދުވަހު ސިލްސިލާކޮށް ވީޓޯ ކުރެއްވުމަށްފަހު، އެއްބަސްވުންތަކަށް އައުމަށްޓަކައި މަޝްވަރާގެ މޭޒަށް އަންނަން ޑިމޮކްރެޓުންނަށް މަޖުބޫރުވާނެ ކަމަށާއި، ގުޅިގެން މަސައްކަތް ކުރުމުގެ ފުރުސަތު އޭރުން ފަހިވެގެންދާނެއެވެ.

އިންތިހާބުގެ ނަތީޖާއާ ގުޅޭގޮތުން ވާހަކަދައްކަވަމުން ޓްރަމްޕް ވިދާޅުވީ، އީރާނާ ދެކޮޅަށް އޭނާގެ ސަރުކާރުން އެޅި ހަރުދަނާ ފިޔަވަޅުތަކަށް އާންމުން ތާއީދުކުރި ނަމަވެސް، ހިނގަމުންދާ ހަނގުރާމައިގެ ނޭދެވޭ އަސަރު ރިޕަބްލިކަން ކެންޑިޑޭޓުންގެ ކެމްޕޭނަށް ވަރަށް ބޮޑަށް ކުރި ކަމަށެވެ.

އަދި ވޯޓުލީ ފަރާތްތަކުން އެ ނިންމުންތަކުގެ މުހިންމުކަން ދެނެގަތް ނަމަވެސް، ޕާޓީއަށް ކުރިމަތިވި ނާކާމިޔާބީގެ މައިގަނޑު އެއް ސަބަބަކީ އީރާނުގެ މަސްރަހު ކަމަށް ގަބޫލުކުރައްވާ ކަމަށްވެސް އޭނާ ވިދާޅުވިއެވެ.