ޒިންމާދާރު އަދި މަސައްކަތުގެ މައިދާނަށް ބޭނުންވާ މުހިންމު ހުނަރުތައް ލިބިފައިވާ ޒުވާން ޖީލެއް ބިނާކުރުމަށް ސަރުކާރުން އިސްނަގައިގެން ކުރިއަށްގެންދާ "ނޭޝަނަލް ސާވިސް ސްކިލްސް ޓްރެއިނިންގ ޕްރޮގްރާމް" ގެ ދެވަނަ ބެޗު ފުރިހަމަކޮށް، 73 ދަރިވަރަކު މިއަދު ކާމިޔާބުކަމާއެކު ދަސްވެނިވެއްޖެއެވެ.

ބ. ކިހާދޫގައި ހުންނަ އެމްއެންޑީއެފް ސްކޫލް އޮފް އިންޖިނިއަރިންގ އެންޑް ލޮޖިސްޓިކްސްގައި މިއަދު ހެނދުނު ބޭއްވި މި ޚާއްޞަ ރަސްމިއްޔާތު ޝަރަފުވެރިކޮށްދެއްވައި، ދަރިވަރުންނަށް ސަނަދު ހަވާލުކޮށްދެއްވީ ދިފާޢީ އަދި ވަތަނީ ޚިދުމަތާ ބެހޭ ވަޒީރު ޙަސަން ރަޝީދެވެ.

މިދިޔަ ޖޫން މަހުގެ ތިންވަނަ ދުވަހު 77 ބައިވެރިންނާއެކު ފެށި މި ތަމްރީނު ޕްރޮގްރާމް ކާމިޔާބުކަމާއެކު ނިންމާލި ދަރިވަރުންގެ ތެރޭގައި ހިމެނެނީ 60 ފިރިހެން ދަރިވަރުންނާއި 13 އަންހެން ދަރިވަރުންނެވެ. ރާއްޖޭގެ 16 އަތޮޅެއްގެ 45 ރަށަކުން ބައިވެރިވި މި ޒުވާނުންގެ ތެރޭގައި އެންމެ ގިނައީ 17 އަހަރާއި 18 އަހަރުގެ ކުދިންނެވެ. އެގޮތުން 17 އަހަރުގެ 41 ދަރިވަރަކާއި 18 އަހަރުގެ 30 ދަރިވަރަކު މި ބެޗުގައި ހިމެނެއެވެ.

ނޭޝަނަލް ސާވިސް އިނީޝަލް ޓްރޭނިންގ ފުރިހަމަކުރާ ދަރިވަރުންނަށް އަމާޒުކޮށްގެން 16 ހަފުތާގެ މުއްދަތަށް ކުރިއަށްގެންދިޔަ މި ޕްރޮގްރާމުގައި ސެޓްފިކެޓް ލެވެލް 3 ގެ ހަ ދާއިރާއަކުން ކިޔަވައިދީފައިވެއެވެ. މިގޮތުން ދަސްވެނިވި 73 ދަރިވަރުންގެ ތެރެއިން 66 ދަރިވަރަކު ވަނީ ލެވެލް 3 ގެ ސަނަދު ހާސިލުކޮށްފައެވެ. އޭގެ ތެރޭގައި މެރިން އިންޖިނިއަރިންގ ދާއިރާއިން 15 ދަރިވަރުން، އޮޓޯމޯބައިލް އިންޖިނިއަރިންގ އިން 14 ދަރިވަރުން، އަދި ރެފްރިޖަރޭޝަން އެންޑް އެއާ ކޮންޑިޝަނިންގ އިން 13 ދަރިވަރުން ހިމެނެއެވެ. މީގެ އިތުރުން އިލެކްޓްރީޝަން ކޯހުން 11 ދަރިވަރުން، އޮފީސް މެނޭޖްމަންޓުން 7 ދަރިވަރުން އަދި ވެލްޑިންގ އެންޑް މެޓަލް ފެބްރިކޭޝަން ދާއިރާއިން 6 ދަރިވަރަކު ވަނީ ސަނަދު ހާސިލުކޮށްފައެވެ.

ފަންނީ ތަޢުލީމުގެ އިތުރުން، ދަރިވަރުންގެ ޖިސްމާނީ ދުޅަހެޔޮކަމާއި، ފެތުމާއި، ޑްރިލް އަދި އެކި ކުޅިވަރު ހަރަކާތްތައްވެސް މި ތަމްރީނުގެ ތެރެއިން ކުރިއަށް ގެންގޮސްފައިވެއެވެ. އަދި އާންމު ދިރިއުޅުމުގެ ހުނަރުތައް ތަރައްޤީކުރުމުގެ ގޮތުން ވެށި ސާފުކޮށް ބެލެހެއްޓުމާއި، ލީޑަޝިޕް ސިފަތަކާއި، ޓީމެއްގެ ގޮތުގައި މަސައްކަތްކުރުމުގެ އިތުރުން ރިވެތި އަދަބު އަޚްލާޤު ދަރިވަރުންގެ ކިބައިގައި އަށަގެންނެވުމަށް ޚާއްޞަ އިސްކަމެއް ދީފައިވާ ކަމަށް ޑިފެންސް މިނިސްޓްރީން މަޢުލޫމާތުދެއެވެ.

މިއަދު ދަސްވެނިވި ދެވަނަ ބެޗާއެކު، ވަތަނީ ޚިދުމަތުގެ ފަންނީ ތަމްރީނު ފުރިހަމަކުރި ޒުވާނުންގެ ޖުމްލަ އަދަދު މިހާރު ވަނީ 136 އަށް އަރާފައެވެ. އަދި މި ޕްރޮގްރާމުގެ ތިންވަނަ ބެޗުގެ ތަމްރީނުތައް މި ހިނގާ މަހުގެ މެދުތެރޭގައި ފެށުމަށްޓަކައި މިހާރު ދަނީ އެންމެ ފަހުގެ ތައްޔާރީތައް ވަމުންނެވެ.