މިއަހަރަކީ ދިވެހިރާއްޖޭގެ މުޅި ތާރީޚުގައިވެސް އެންމެ ގިނައިން ޒަކާތް ދެއްކި އަހަރު ކަމަށާއި، އަދި ވޭތުވެދިޔަ ދެ އަހަރަކީ ތާރީޚީ ގޮތުން އެންމެ ގިނައިން ޒަކާތުގެ ފައިސާ ލިބުނު ދެ އަހަރު ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެކްސްގައި ހިއްސާކުރެއްވި ޕޯސްޓެއްގައި މިނިސްޓަރ ޝަހީމް ވިދާޅުވީ ވޭތުވެދިޔަ ދެ އަހަރަކީ ރާއްޖޭގެ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް ގެނެވުނު މުއްދަތެއް ކަމަށެވެ. އެގޮތުން، ތާރީޚީ އަދަދަކަށް ޒަކާތުގެ ފައިސާ ލިބުމުގެ އިތުރުން، ފަޤީރުންގެ ދަފުތަރުގައި ޖެހިފައިވާ ފަރާތްތަކަށް އެންމެ ގިނައިން ހޭދަކުރެވުނީވެސް މި ދެ އަހަރު ތެރޭގައި ކަމަށް އެމަނިކުފާނު ފާހަގަކުރެއްވިއެވެ. އަދި ފަޤީރުންނަށް ދެވޭ ސީދާ މާލީ އެހީތެރިކަމުގެ އިތުރުން، އެ ފަރާތްތަކުގެ ތަޢުލީމާއި ޞިއްޙަތަށްވެސް ޒަކާތު ފަންޑުން ގިނަގުނަ ޚަރަދުތަކެއް ކުރެވިފައިވާކަން މިނިސްޓަރު ހާމަކުރެއްވިއެވެ.

ރާއްޖޭގެ ޒަކާތުގެ ނިޒާމުގެ ހަރުދަނާކަމާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވީ، މިއީ ހަރުދަނާ އުޞޫލުތަކެއްގެ މައްޗަށް އާރާސްތުކުރެވިފައިވާ، އަދި ޤާނޫނީ ރައްކާތެރިކަން ލިބިފައިވާ ނިޒާމެއް ކަމަށެވެ. އަދި ޒަކާތު ފައިސާ ބަލަހައްޓަމުންދަނީ މަރުކަޒީ ބޭންކު (އެމްއެމްއޭ) އިން ކަމަށާއި، މި ފައިސާ ހޭދަކުރެވެނީ އިސްލާމީ ޝަރީޢަތާ އެއްގޮތަށް އެކުލަވާލައި ޢާއްމުކޮށްފައިވާ ގައިޑްލައިނާ އެއްގޮތަށް، ޒަކާތު ކައުންސިލާއި ޝަރީޢާ ކޮމިޓީގެ ލަފާގެ މަތިން ކަމަށް ވިދާޅުވިއެވެ. މީގެއިތުރުން، ޒަކާތު ފަންޑުން ޚަރަދުކުރެވޭ ގޮތުގެ ތަފްސީލު މަހުން މަހަށް ޢާއްމުކޮށް ހާމަކުރަމުންދާކަންވެސް މިނިސްޓަރު ފާހަގަކުރެއްވިއެވެ.

ޝަރީޢާ ހުއްދަކުރާ މަގުން ޒަކާތު ފަންޑު އިތުރުކުރަން ގިނަ މަސައްކަތްތަކެއް ފެށި، ޒަކާތަށް ވަކި ޚާއްޞަ އިދާރާއެއް ޤާއިމުކުރެވިގެން ދިޔުމަކީވެސް މި ނިޒާމަށް ލިބުނު ބޮޑު ކުރިއެރުމެއް ކަމަށް ވިދާޅުވެ، ރައްޔިތުން މި ނިޒާމަށް ދެއްވާ އިތުބާރަށް މިނިސްޓަރު ވަނީ ޝުކުރު އަދާކުރައްވާފައެވެ.

އަދި ޤާނޫނެއްގެ ތެރެއިން ރާއްޖޭގެ ޒަކާތުގެ ނިޒާމު ތަރައްޤީކޮށް ހަރުދަނާކޮށްދެއްވި ކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށްވެސް މިނިސްޓަރު ޑރ. ޝަހީމް ވަނީ ޝުކުރު އަދާކުރައްވާފައެވެ.