ދިވެހިރާއްޖޭގެ މާލީ ބާޒާރު ފުޅާކޮށް، ދެވަނަ ހިއްސާގެ ބާޒާރެއް ކުރިއެރުވުމަށްޓަކައި ސައްތައިން ސައްތަ ސަރުކާރު ހިއްސާވާ ގޮތަށް "ނޭޝަނަލް އެކްސްޗޭންޖް ލިމިޓެޑް" ގެ ނަމުގައި އައު ކުންފުންޏެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އުފައްދަވައިފިއެވެ.

މި ކުންފުނި އުފައްދަވާފައިވަނީ ކުންފުނީގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން، ރައީސުލްޖުމްހޫރިއްޔާގެ ޤަރާރު ނަންބަރު 2026/16 އިންނެވެ.

މިފަދަ ކުންފުންޏެއް އުފެއްދެވުމުގެ މައިގަނޑު މަޤްޞަދަކީ ދައުލަތުގެ މާލީ ބޭނުންތައް ފުއްދުމާއި، ރާއްޖޭގައި ކުރިއަރަމުން އަންނަ އިސްލާމީ މާލީ ދާއިރާއަށް އެހީތެރިވެދިނުމެވެ. އަދި ސަރުކާރުގެ އެއްބާރުލުމާއެކު ރާއްޖޭގެ ކެޕިޓަލް މާކެޓް ކުރިއަރުވައި، މާކެޓާމެދު އޮތް އިތުބާރާއި ދެފުށް ފެންނަ މިންވަރު އިތުރުކުރުމެވެ.

"ނޭޝަނަލް އެކްސްޗޭންޖް ލިމިޓެޑް" ގެ މައިގަނޑު މަސައްކަތްތަކުގެ ތެރޭގައި ޒަމާނީ ފެންވަރުގެ ސެކިއުރިޓީޒް އެކްސްޗޭންޖްތަކާއި ޓްރޭޑިންގ ނިޒާމުތައް ޤާއިމުކުރުން ހިމެނެއެވެ. އަދި ދައުލަތުގެ ސެކިއުރިޓީޒްއާއި، އިސްލާމީ ޝަރީޢާގެ ހަމަތަކަށް ފެތޭ ސުކޫކު ފަދަ މާލީ ވަސީލަތްތައް ބާޒާރަށް ނެރެ، ލިސްޓުކޮށް، އެތަކެތީގެ މުޢާމަލާތްތައް ހިންގުމުގެ މަގުފަހިކޮށްދިނުން ހިމެނެއެވެ.

މީގެ އިތުރުން ސެންޓްރަލް ސެކިއުރިޓީޒް ޑިޕޮސިޓަރީގެ ޚިދުމަތްތަކާއި، ކްލިއަރިންގ އަދި ސެޓްލްމަންޓުގެ ޒަމާނީ ޕޯސްޓް-ޓްރޭޑް ޚިދުމަތްތައް މި ކުންފުނިން ފޯރުކޮށްދޭނެއެވެ. އަދި ރާއްޖެއާއި ބައިނަލްއަޤްވާމީ މާލީ މުއައްސަސާތަކާ ގުޅިގެން ރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރުމަކީވެސް މި ކުންފުނީގެ މުހިންމު އަމާޒެކެވެ.