ފަލަސްތީނުގައި 20 އަހަރުގެ މެދުކެނޑުމަކަށްފަހު ބޭއްވުމަށް ތައްޔާރުވަމުންދާ ޤާނޫނުހަދާ މަޖިލީހުގެ އިންތިޚާބު އަންނަ ނޮވެމްބަރު މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާއިރު، ޣައްޒާގެ ރައްޔިތުންގެ އެންމެ ބޮޑު އުންމީދަކީ ވަޒީފާގެ ފުރުޞަތުތައް ފަހިވުމާއި، އަމާންކަމާއި ރައްކާތެރިކަން ޤާއިމުވުން ކަމަށް އަލްޖަޒީރާގެ ރިޕޯޓެއްގައި ބަޔާންކޮށްފިއެވެ. އިސްރާއީލުން ދިން ލާއިންސާނީ ހަމަލާތަކާއި ހަލާކުކުރުންތަކަށްފަހު، އެ ސަރަޙައްދުގެ ރައްޔިތުން އެދެނީ އެމީހުންގެ ޙަޔާތް އަލުން އާރާސްތުކޮށް، އަސާސީ ޚިދުމަތްތައް އަލުން ލިބިގަތުމަށެވެ.

ޣައްޒާގެ ދައިރުލްބަލަޙްގައި ދިރިއުޅޭ އުމުރުން 24 އަހަރުގެ އަޙްމަދު މުޙްސިން ފަދަ ނަރުސްކަމުގެ ދާއިރާއިން ތަޢުލީމު ޙާޞިލުކޮށްފައިވާ އެތައް ޒުވާނުންނަކަށް ވަނީ، ހަނގުރާމައިގެ ސަބަބުން އެމީހުންގެ މުސްތަޤުބަލުގެ އުންމީދުތައް ބަދަލުކުރަން މަޖުބޫރުވެފައެވެ. ނަރުސްކަމުގެ ދާއިރާއިން ކުރިއަށްދާން ބޭނުންވި ނަމަވެސް، ހޮސްޕިޓަލެއްގައި ހިލޭސާބަހަށް މަސައްކަތްކުރުމަށްފަހު، ދެކޮޅުޖެހޭނެ މިންވަރުގެ އާމްދަނީއެއް ހޯދުމަށްޓަކައި އޭނާ މިހާރު މަސައްކަތްކުރަނީ އިންޓަނެޓް ކާޑު ވިއްކާ ފިހާރައެއްގައެވެ. ޣައްޒާގައި ވަޒީފާ ނެތް މީހުންގެ ނިސްބަތް 80 އިންސައްތައަށް އަރާފައިވާއިރު، އިސްރާއީލުގެ ޢުދުވާންތަކުގައި މިހާތަނަށް 74،000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. މުޙްސިން ބުނި ގޮތުގައި އިންތިޚާބުގައި ވާދަކުރާ ކެންޑިޑޭޓުންނަކީ ޒުވާނުންގެ އަޑުއަހައި، ވަޒީފާއާއި ރައްކާތެރިކަން ކަށަވަރުކޮށްދެވޭނެ ފަދަ ޤާބިލު ބަޔަކަށް ވާންޖެހެއެވެ.

މީގެއިތުރުން، 2006 ވަނަ އަހަރު އެންމެ ފަހުން ބޭއްވި އިންތިޚާބުގައި ބައިވެރިވި އުމުރުން 53 އަހަރުގެ ޣައްސާން މަރުވާން ހާމަކުރި ގޮތުގައި، އޭރުގެ އިންތިޚާބު ކުރިއަށްދިޔައީ އިންސާފުވެރި މާޙައުލެއްގައެވެ. ނަމަވެސް ވޭތުވެދިޔަ 20 އަހަރު ދުވަހުގެ ތެރޭގައި އެފަދަ ޑިމޮކްރެޓިކް ފުރުޞަތަކުން ރައްޔިތުން ވަނީ މަޙްރޫމްވެފައެވެ. 2024 ވަނަ އަހަރުގެ ޖެނުއަރީ މަހު އޭނާގެ ގެދޮރާއި ރަން ގަހަނާ އުފައްދާ ކާރުޚާނާ ބިމާހަމަވެގެން ދިޔުމާ ގުޅިގެން، މިހާރު އޭނާގެ ހަމައެކަނި އުންމީދަކީ ސަރަޙައްދު އަލުން ބިނާކުރުމާއި، ޞުލްޙަމަސަލަސްކަން ޤާއިމުވުމެވެ. ފެން ހޯދުމަށް ދުރު ރާސްތާތަކެއް ކަނޑައްތުކުރަން ޖެހުމާއި، ވަގުތީ ފޭލިގެތަކުގައި ދިރިއުޅެންޖެހުމަކީ އޭނާ ފަދަ ދުވަސްވީ މީހުންނަށް ކުރިމަތިވެފައިވާ އިންތިހާ ދަތި ތަކުލީފެކެވެ.

ފަލަސްތީނުގެ ސެންޓްރަލް އިލެކްޝަންސް ކޮމިޝަނުން މަސައްކަތް ކުރަމުންދަނީ ހުޅަނގު އައްސޭރިއާއި، އިރުމަތީ ޤުދުސްގެ އިތުރުން ޣައްޒާގައިވެސް އިންތިޚާބު ބޭއްވުމަށެވެ. ޣައްޒާގައި ވޯޓުލުމުގެ ޙައްޤު ލިބިގެންވާ 1.24 މިލިއަން ރައްޔިތުން ތިބިކަމަށް ލަފާކުރެވެއެވެ. އިލެކްޝަންސް ކޮމިޝަންގެ ޣައްޒާ ސަރަޙައްދީ ޑިރެކްޓަރު ޖަމީލް އަލްޚާލިދީ ވިދާޅުވި ގޮތުގައި، ޢިމާރާތްތައް ހަލާކުވެ، އެތައް ބަޔަކު ގެދޮރުގެއްލިފައިވުމުގެ ސަބަބުން އިންތިޒާމީ އަދި ސަލާމަތީ ގޮތުން ބޮޑެތި ގޮންޖެހުންތަކެއް އެބަހުއްޓެވެ. އަދި އިސްރާއީލުން ތަކެތި އެތެރެކުރުމަށް ހުރަސްއަޅައިފިނަމަ، އިންތިޚާބަށް ބޭނުންވާ ތަކެތި އަމިއްލައަށް އުފެއްދުމަށް ކުއްލި ޙާލަތުގެ ޕްލޭންތަކެއްވެސް ވަނީ އެކުލަވާލާފައެވެ.

ސިޔާސީ މުޙައްލިލު އިޔާދު އަލްޤައްރާ ފާހަގަކުރެއްވި ގޮތުގައި، ހަނގުރާމައިގެ ބިރުވެރިކަމުގެ ތެރޭގައިވެސް ރައްޔިތުންގެ ސިޔާސީ ހޭލުންތެރިކަމާއި ޝައުޤުވެރިކަން ފަނޑުވެގެން ނުދެއެވެ. އެހެންނަމަވެސް، ރައްޔިތުން މިހާރު ބޭނުންވަނީ ހަމައެކަނި ސިޔާސީ ޝިޢާރުތަކެއް ނޫނެވެ. އެމީހުން އެދެނީ ޣައްޒާ އަލުން އާރާސްތުކޮށް، ޞިއްޙީ އަދި ތަޢުލީމީ ޚިދުމަތްތައް ކަށަވަރުކޮށްދީ، ޢާންމު ދިރިއުޅުމުގެ ޙާލަތު އިއާދަކޮށްދިނުމުގެ ޤާބިލުކަން ހުރި ހިންގުންތެރި ލީޑަރޝިޕެކެވެ.