ދިވެހި ސަރުކާރާއި ރައްޔިތުންގެ ނަމުގައި، މޮރޮކޯގެ 18 ވަނަ ބޮޑުވަޒީރު ކަމުގެ މަޤާމަށް ޢައްޔަންކުރެއްވި ފާތިމާ އެއްޒަހްރާ އަލް މަންޞޫރީއަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހޫނު މަރުޙަބާއަކާއި ތަހުނިޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ، އެކަމަނާއަށް ފޮނުއްވި ތަހުނިޔާގެ ސިޓީފުޅުގައި، މޮރޮކޯގެ ފުރަތަމަ އަންހެން ބޮޑުވަޒީރުގެ ގޮތުގައި އެކަމަނާ ޢައްޔަންކުރެއްވުމަކީ، އެ ޤައުމަށާއި މުޅި ޢަރަބި ދުނިޔެއަށްވެސް ލިބުނު ތާރީޚީ ކާމިޔާބީއެއްގެ ގޮތުގައި ސިފަކުރައްވާފައިވެއެވެ. އަދި އެކަމަނާއަކީ ޢަރަބި ދުނިޔޭގައި ބޮޑުވަޒީރުކަމުގެ މަޤާމު ފުރުއްވާ ދެވަނަ އަންހެން ބޭފުޅާކަން ފާހަގަކުރައްވައި، މިއީ އެ ސަރަޙައްދުގެ ސިޔާސީ ތާރީޚުގައި އައު ބާބެއް ހުޅުވިގެންދިޔަ ކަމެއް ކަމުގައި ރައީސް ވިދާޅުވިއެވެ.

މީގެއިތުރުން، އެކަމަނާ މި މަޤާމަށް ޢައްޔަންކުރެއްވުމަކީ އަންހެނުންގެ ލީޑަރޝިޕް ދައްކުވައިދޭ މުހިންމު މިސާލެއް ކަމަށާއި، މުޅި ދުނިޔޭގެ އަންހެނުންނަށްވެސް ލިބުނު ބޮޑު ހިތްވަރެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އަންހެނުންގެ ޙައްޤުތައް ކުރިއެރުވުމަށާއި، ޤައުމީ އަދި އިޖުތިމާޢީ ކަންކަމުގައި އަންހެނުންގެ ބައިވެރިވުން އިތުރުކުރުމަށް ދިވެހިރާއްޖެއިން އަބަދުވެސް ދޭ އަހައްމިއްޔަތުކަން އެމަނިކުފާނު މި ސިޓީފުޅުގައި ތަކުރާރު ކުރެއްވިއެވެ.

ރާއްޖެއާއި މޮރޮކޯއާ ދެމެދު އޮތް ޒަމާންވީ އެކުވެރި ގުޅުމަކީ ދެޤައުމުގެ ދެމެދުގައިވާ އިޙްތިރާމާއި އެއްބާރުލުމުގެ މައްޗަށް ބިނާވެފައިވާ ވަރުގަދަ ގުޅުމެއްކަން ފާހަގަކުރައްވައި، މި ބިންގަލުގެ މަތީގައި ދެޤައުމުގެ ގުޅުން އިތުރަށް ބަދަހިކޮށް، ދެޤައުމުގެ ލާބައާއި މަންފާއަށްޓަކައި އައު ބޮޑުވަޒީރާއެކު ގާތުން މަސައްކަތްކުރެއްވުމަށް ތައްޔާރަށް ހުންނެވި ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާގެ ސިޓީފުޅު ނިންމަވާލައްވާފައިވަނީ، މޮރޮކޯގެ އައު ބޮޑުވަޒީރުގެ ޒިންމާތައް އަދާކުރެއްވުމުގައްޔާއި، މޮރޮކޯގެ ރައްޔިތުންނަށް އިތުރު ކުރިއެރުމާއި ފާގަތިކަން ހޯއްދަވައިދެއްވުމަށް އެކަމަނާ ކުރައްވާ މަސައްކަތްޕުޅުތަކަށް ކާމިޔާބީއަށް އެދިވަޑައިގަންނަވަމުންނެވެ.