ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ އިޤްތިޞާދު ސިންދަފާތުކޮށް، ދިވެހި އުފެއްދުންތެރިންނާއި ވިޔަފާރިތައް ކުރިއެރުވުމަށް ގެންގުޅުއްވާ ޚާއްޞަ ސިޔާސަތުގެ ދަށުން ބާއްވާ "ދިވެހީންގެ އުފެއްދުންތެރިކަމުގެ މައުރަޒު 2026" (މޯލްޑިވްސް އެކްސްޕޯ 2026) އިފްތިތާޙުކުރުމުގެ ޚާއްޞަ ހަރަކާތްތަކެއް މިއަދު ހުޅުމާލޭގައި ފަށައިފިއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްގެ ބެއްލެވުމުގެ ދަށުން، ބިޒްނަސް ސެންޓަރ ކޯޕަރޭޝަން (ބީސީސީ) އިން އިންތިޒާމުކުރާ މި ހަރަކާތްތައް މިއަދު ހަވީރު 4:00 އިން މިރޭ 11:00 ގެ ނިޔަލަށް ހުޅުމާލެ ފުރަތަމަ ފިޔަވަހީގެ ބީޗް ސަރަޙައްދުގައި ކުރިއަށްދާނެ ކަމަށް އެ ކޯޕަރޭޝަނުން މަޢުލޫމާތު ދެއެވެ.

ޢާއިލީ މާޙައުލެއްގައި ކުރިއަށްދާ މި ހަރަކާތުގައި، ކުޑަކުދިންގެ މުނިފޫހިފިލުވުމުގެ އެކި ކުޅިވަރުތަކުގެ އިތުރުން، އެކި ބާވަތްތަކުގެ ކާބޯތަކެތީގެ އުފެއްދުންތައް ދައްކާލުމާއި، ރަހަބަލައިލުމުގެ ފުރުޞަތު ވަނީ ޢާންމުންނަށް ހުޅުވާލެވިފައެވެ.

މީގެއިތުރުން، މިރޭ 9:00 އިން 10:00 އަށް ބޭއްވުމަށް ހަމަޖެހިފައިވާ ޚާއްޞަ ރަސްމިއްޔާތެއްގައި، މައުރަޒުގެ ސްޕޮންސަރުންނާއި ޕާޓްނަރުން ތަޢާރަފުކުރުމާއި، މި އެކްސްޕޯގެ ދަށުން ކުރިއަށްގެންދިއުމަށް ހަމަޖެހިފައިވާ މުބާރާތްތަކާ ގުޅޭ ތަފްޞީލުތައް ހާމަކުރުން އޮންނާނެއެވެ. މި ރަސްމިއްޔާތުގައި އިކޮނޮމިކް މިނިސްޓަރު މުޙައްމަދު ސަޢީދާއި، ބީސީސީގެ އިސްވެރިންގެ އިތުރުން ސަރުކާރު ހިއްސާވާ ކުންފުނިތަކާއި އަމިއްލަ ވިޔަފާރިތަކުގެ އިސް ފަރާތްތަކުން ބައިވެރިވެވަޑައިގަންނަވާނެއެވެ.

"ފިއުޗަރ މޯލްޑިވްސް – އިނޮވޭޝަން، ކްރިއޭޓިވިޓީ އެންޑް ގްލޯބަލް ކަނެކްޝަންސް" މި ޝިޢާރުގެ ދަށުން ބާއްވާ މި މައުރަޒު ރަސްމީކޮށް ކުރިއަށްދާނީ 2026 ވަނަ އަހަރުގެ އޮކްޓޫބަރު 25 އިން ނޮވެމްބަރު 2 ގެ ނިޔަލަށް ހުޅުމާލެ ސެންޓްރަލް ޕާކުގައެވެ.

މި މައުރަޒު މައިގަނޑު 6 ދާއިރާއަކަށް ބަހާލެވިފައިވާއިރު، އޭގެ ތެރޭގައި ހިމެނެނީ ކްރިއޭޓިވް އިކޮނޮމީ، ޑިޖިޓަލް އެންޑް އިނޮވޭޝަން، އެންޓަޓެއިންމަންޓް، މާކެޓްޕްލޭސް، ވިޒިޓަރ އިކޮނޮމީ އަދި ބައިނަލްއަޤްވާމީ ފަރާތްތަކަށް ޚާއްޞަ "އިންޓަރނޭޝަނަލް އެގްޒިބިޓާސް" ދާއިރާއެވެ. ސަރުކާރުގެ އިސްނެންގެވުމާއެކު، މިފަހަރުގެ މައުރަޒުގައި ދީނީ ހޭލުންތެރިކަން އިތުރުކުރުމުގެ ދާއިރާއިން ކޮންޓެންޓް އުފައްދާ ފަރާތްތަކަށް ޚާއްޞަ އައު ކެޓަގަރީއަކާއި، ލާމަރުކަޒީ އުޞޫލުން ރަށްރަށުގެ އުފެއްދުންތެރިކަން ދައްކުވައިދިނުމަށް ކައުންސިލްތަކަށް ވާދަކުރެވޭނެ ފުރުޞަތުތައްވެސް ވަނީ ފަހިކޮށްދީފައެވެ.

މައުރަޒަށް ތަކެތި ބަލައިގަތުމާއި އިންސާފުކުރުމުގެ މަރުޙަލާތައް މިހާރު ފެށިފައިވާއިރު، މިއީ ރާއްޖޭގެ އެކި ކަންކޮޅުތަކުގައި ތިބި އުފެއްދުންތެރިންނާއި ކުދި އަދި މެދުފަންތީގެ ވިޔަފާރިތަކަށް ޤައުމީ އަދި ބައިނަލްއަޤްވާމީ ފެންވަރުގައި ފުރުޞަތުތައް ފަހިކޮށްދިނުމަށް ސަރުކާރުން އިސްނަގައިގެން ކުރިއަށްގެންދާ މުހިންމު ޤައުމީ މަޝްރޫޢެކެވެ.