އއ. އުކުޅަހު ކައުންސިލް އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓް އޮޑިޓަރ ޖެނެރަލްގެ އޮފީހުން އާންމުކޮށްފިއެވެ. މި ރިޕޯޓުގައި ކައުންސިލްގެ މާލީ އަދި އިދާރީ ހިންގުމުގައި ދައުލަތުގެ މާލިއްޔަތު ގަވާއިދާއި ލާމަރުކަޒީ ގާނޫނާ ޚިލާފަށް ގިނަ ކަންތައްތަކެއް ހިނގާފައިވާކަން ވަނީ ފާހަގަކޮށްފައެވެ.

އޮޑިޓް ރިޕޯޓުގައި ފާހަގަކޮށްފައިވާ މައިގަނޑު ކަންކަމުގެ ތެރޭގައި، ބަޖެޓު ކަނޑައެޅުމާއި ޚަރަދުކުރުމުގައި ހެދިފައިވާ ގަވާއިދުތަކަށް ފުރިހަމައަށް އަމަލުކޮށްފައި ނުވުން ހިމެނެއެވެ. އެގޮތުން ބަޖެޓުގައި ނުހިމެނޭ ބައެއް ކަންކަމަށް ޚަރަދުކުރުމާއި، ކައުންސިލްގެ ބެލުމުގެ ދަށުން ހިންގާ ޕްރޮޖެކްޓްތަކާއި ޕްރޮކިއުމަންޓްގެ މަސައްކަތްތައް ހަވާލުކުރުމުގައި އާންމުކޮށް އިއުލާނު ނުކޮށް އަދި ވާދަވެރި މާހައުލެއް ގާއިމުނުކޮށް މަސައްކަތްތައް ހަވާލުކޮށްފައިވާކަން އޮޑިޓުން ވަނީ ހާމަވެފައެވެ.

އުކުޅަހު ކައުންސިލްގެ ތިޖޫރީން 8،925 ރުފިޔާ މަދުކަން އޮޑިޓުގައި ވަނީ ހާމަވެފައެވެ. އަދި އާންމުކޮށް އިއުލާނު ކުރުމަކާ ނުލައި 245،000 ރުފިޔާގެ ފުޓުބޯޅަ ދަނޑު މަރާމާތުކުރުމުގެ މަސައްކަތް ޙަވާލުކޮށްފައިވާއިރު، ގަބުރުސްތާނު ފާރު ރޭނުމަށް ބޭނުންވާ ތަކެތިވެސް، އިއުލާނު ނުކުރުމަށްޓަކައި ބިލްތައް ބައިބަޔަށް ބަހާލައިގެން 78،862 ރުފިޔާގެ ތަކެތި ހޯދާފައިވެއެވެ.

ހަމައެއާއެކު ކައުންސިލަށް ލިބެންޖެހޭ އެކިއެކި ކުލިތަކާއި ފީތައް ގަވާއިދުން ނުހޯދައި ގިނަ އަދަދެއްގެ ފައިސާ ނުލިބި ހުރިކަމާއި، މުދަލާއި ހަރުމުދަލުގެ ރަޖިސްޓްރީ ގަވާއިދުން އަދާހަމަކޮށް ބަލަހައްޓާފައި ނުވާކަންވެސް ރިޕޯޓުގައި ބަޔާންކޮށްފައިވެއެވެ. އަދި ކައުންސިލްގެ މުވައްޒަފުންނަށް އިތުރުގަޑީގެ ފައިސާ ދިނުމުގައްޔާއި އެލަވަންސްތައް ހަމަޖެއްސުމުގައި ލިޔެކިޔުންތައް ފުރިހަމަނުކޮށް ފައިސާ ދޫކޮށްފައިވާ މައްސަލަތަކެއްވެސް ވަނީ ފެންމަތިވެފައެވެ.

މި މައްސަލަތައް އިސްލާހުކުރުމަށްޓަކައި އޮޑިޓަރ ޖެނެރަލްގެ އޮފީހުން ވަނީ މުހިންމު ލަފާތަކެއް ދެއްވާފައެވެ. އޭގެ ތެރޭގައި ދައުލަތުގެ މާލިއްޔަތު ގަވާއިދާ އެއްގޮތަށް ހުރިހާ ޕްރޮކިއުމަންޓް މަރުހަލާތަކެއް ދެފުށް ފެންނަ ގޮތަށް ގެންދިއުމާއި، ކައުންސިލަށް ލިބެންޖެހޭ ފައިސާ ގަވާއިދުން ހޯދުމަށް ހަރުދަނާ އުސޫލެއް އެކުލަވާލައި އެ ފައިސާ ހޯދުމުގެ މަސައްކަތް އަވަސްކުރުމާއި، ހަރުމުދަލުގެ ރަޖިސްޓްރީ ގަވާއިދުން އަދާހަމަކޮށް، މުދާ ބެލެހެއްޓުމުގެ ނިޒާމު ހަރުދަނާކުރުމާއި، ބަޖެޓުގެ ތެރެއިން ހަމަޖެހިފައިވާ އުސޫލުތަކާ އެއްގޮތަށް މެނުވީ އެއްވެސް ޚަރަދެއް ނުކުރުމާއި މުވައްޒަފުންގެ އިނާޔަތްތައް ލިޔެކިޔުމާއެކު ދޫކުރުން ހިމެނެއެވެ.

އޮޑިޓް ރިޕޯޓް ނިންމާލަމުން އޮޑިޓަރ ޖެނެރަލް ވަނީ، ކައުންސިލްގެ އެތެރޭގެ ކޮންޓްރޯލްތައް ވަރުގަދަކޮށް، ގާނޫނާއި ގަވާއިދުތަކާ އެއްގޮތަށް މާލީ ކަންކަން ހިންގުމަށް ކައުންސިލްގެ އިސްވެރިންނަށާއި އިދާރީ މުވައްޒަފުންނަށް އިލްތިމާސް ކުރަށްވާފައެވެ.