ރަސްމާލޭގައި ތަރައްޤީކުރާ އީގަލް ހިލްސް މަޝްރޫޢާ ގުޅޭގޮތުން ވަޒީރު މުއްޠަލިބް ޢަދާލަތު ޕާޓީގެ ވެރިންނަށް މަޢުލޫމާތު ދެއްވައިފިއެވެ.

ޢަދާލަތު ޕާޓީން މިއަދު ބުނީ، މި ބައްދަލުވުން ކުރިއަށް ގެންގޮސްފައިވަނީ، ދިވެހި ސަރުކާރުން ކުރިއަށްގެންދާ ރަސްމާލެ ރިޔަލްއެސްޓޭޓް ޑިވެލޮޕްމަންޓް ޒޯން މަޝްރޫޢާ ގުޅިގެން ޢަދާލަތު ޕާޓީގެ ފަރާތުން ސާފުކުރަން ބޭނުންވާ މުހިންމު ކަންކަން އޮޅުންފިލުވުމަށްޓަކައި ކަމަށެވެ.

"ޕާޓީގެ ރައީސް އައްޝައިޚް މުޙައްމަދު ޝިފާންގެ އިތުރުން އިސް ލީޑާރޝިޕުން މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމެންޓް ޑރ. ޢަބްދުالله މުއްޠަލިބާ ބައްދަލުކުރައްވައިފި." ޢަދާލަތު ޕާޓީން މީޑިއާތަކަށް ފޮނުވި މެސެޖުގައިވެއެވެ.

މަޢުލޫމާތު ލިބިފައިވާ ގޮތުގައި މިބައްދަލުވުމުގައި ވަޒީރު މުއްޠަލިބު ވަނީ ރަސްމާލޭގައި ހިންގާ މި މަޝްރޫޢާ ގުޅޭގޮތުން ތައްޔާރު ކޮށްފައިވާ ޕްރެޒެންޓޭޝަނެއް މެދުވެރިކޮށް މަޝްރޫޢުގެ ސައްޙަ މަޢުލޫމާތު ޢަދާލަތު ޕާޓީގެ އިސްފަރާތްތަކަށް އަރުވާފައެވެ.

މި ބައްދަލުވުމުގެ ކުރިން އިއްޔެ ޢަދާލަތު ޕާޓީން ވަނީ، އެޕާޓީގެ މަޝްވަރާ މަޖިލީހުގެ ބައްދަލުވުމެއް ބާއްވައި، ދިވެހި ސަރުކާރުން ކުރިއަށްގެންދާ މޯލްޑިވްސް ޕާރލް ރެސިޑެންސީ ޕްރޮގްރާމާއި ރަސްމާލެ ރިޔަލްއެސްޓޭޓް ޑިވެލޮޕްމަންޓް ޒޯން މަޝްރޫޢާ ގުޅިގެން އުފެދިފައިވާ ކަންބޮޑުވުންތަކާ ގޫޅޭގޮތުން މަޝްވަރާ ކޮށްފައި ކަމަށް އެ ޕާޓީން މަޢުލޫމާތުދީފައިވެއެވެ.