ރައްޔިތުންގެ މަޖިލީހުގެ މެންބަރުންގެ ތެރެއިން ހަދިޔާގެ ގޮތުގައި ފައިސާ ލިބިވަޑައިގެންފައިވަނީ ތިން މެންބަރަކަށްކަން އެ ބޭފުޅުންގެ މާލީ ބަޔާންތަކުން ހާމަވެއްޖެއެވެ.

މަޖިލީހުގެ ވެބްސައިޓުގައި މިއަދު ޝާއިއުކޮށްފައިވާ މެންބަރުންގެ މާލީ ބަޔާންތަކުން ދައްކާގޮތުން، ހަދިޔާގެ ގޮތުގައި ފައިސާ ލިބިވަޑައިގެންފައި ވަނީ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި، ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަޙްމަދު ޝަމްހީދު އަދި މާފަންނު ދެކުނު ދާއިރާގެ ޕީއެންސީ މެންބަރު ޢަބްދުﷲ ރިފާޢު (ބޮޗޭ) އަށެވެ.

މަޖިލީހުގެ ރައީސް ޢަބްދުއްރަޙީމްގެ މާލީ ބަޔާނުން އެނގޭ ގޮތުގައި އެމަނިކުފާނަށް ހެޔޮއެދޭ ފަރާތްތަކުން 120،191.76 ރުފިޔާ ލިބިފައިވެއެވެ. އަދި އެ ފައިސާ ޚަރަދުކުރައްވާފައި ވަނީ ދަތުރުފަތުރު ކުރުމަށާއި ކްރެޑިޓް ކާޑުތަކުގެ ފައިސާ ދެއްކުމަށް ކަމަށް އެމަނިކުފާނުގެ ބަޔާނުގައި ވެއެވެ.

ޑރ. ޝަމްހީދުގެ މާލީ ބަޔާނުގައި ވާގޮތުން، އެމަނިކުފާނަށް ހެޔޮއެދޭ ފަރާތްތަކުން ހަދިޔާގެ ގޮތުގައި 36،000 ޑޮލަރު ލިބިފައިވެއެވެ. އަދި މެންބަރު ޢަބްދުﷲ ރިފާޢުއަށް ހެޔޮއެދޭ މީހުންގެ ފަރާތުން 300،000 (ތިން ލައްކަ) ރުފިޔާ ލިބިފައިވާ ކަމަށް ބަޔާންކޮށްފައިވެއެވެ. ނަމަވެސް، މި ދެ ބޭފުޅުން އެ ފައިސާ ޚަރަދުކުރެއްވި ގޮތުގެ އެއްވެސް ތަފުސީލެއް މާލީ ބަޔާނުގައި ހާމަކުރައްވާފައެއް ނުވެއެވެ.

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 84 ވަނަ މާއްދާއާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުން، މަޖިލިސް މެންބަރުން މަޤާމާ ޙަވާލުވުމަށްފަހު އަދި ކޮންމެ އަހަރަކު އެއްފަހަރު އެ މެންބަރެއްގެ މާލީ ބަޔާން ތައްޔާރުކޮށް މަޖިލީހުގެ އަމީން ޢާންމަށް ހުށަހަޅަންޖެހެއެވެ.

ރައްޔިތުންގެ މަޖިލީހުގެ އިދާރާއިން ހާމަކޮށްފައިވާ ގޮތުގައި، މާލީ ބަޔާން ހުށަހެޅުމަށް ކަނޑައެޅި ސުންގަޑި ކަމަށްވާ އޮގަސްޓް މަހުގެ 31 ގެ ނިޔަލަށް މާލީ ބަޔާން ހުށަހަޅުއްވާފައިވަނީ 20 ވަނަ ރައްޔިތުންގެ މަޖިލީހުގެ 93 މެންބަރުންގެ ތެރެއިން 91 މެންބަރުންނެވެ.