އޭޝިއާގެ ގައުމުތަކަށް ކުރަމުންދާ ބޯކޮށް ވާރޭވެހި ފެންބޮޑުވުމުގެ ކާރިސާތަކުގައި ތައިލެންޑާއި އިންޑިއާއިން 100 އަށްވުރެ ގިނަ މީހުން މަރުވެ، އެތައް މިލިއަން ބައެއްގެ ދިރިއުޅުމަށް ބޮޑެތި އަސަރުތަކެއް ކޮށްފިއެވެ.

ކަމާބެހޭ އިދާރާތަކާއި މީޑިއާތަކުން ހާމަކޮށްފައިވާ ގޮތުގައި އޭޝިއާގެ ގައުމުތަކަށް ކުރަމުންދާ ބޯކޮށް ވާރޭވެހި ފެންބޮޑުވުމުގެ ކާރިސާތަކުގައި އެންމެ ބޮޑެތި ގެއްލުންތަކެއް ލިބިފައިވަނީ ތައިލެންޑަށާއި އިންޑިއާގެ އުއްތަރު ޕްރަދޭޝް ސްޓޭޓަށެވެ.

ތައިލެންޑުގެ ޑިޕާޓްމަންޓް އޮފް ޑިޒާސްޓާ ޕްރިވެންޝަން އެންޑް މިޓިގޭޝަނުން ހާމަކުރި ގޮތުގައި، އެ ގައުމުގެ 29 ޕްރޮވިންސަކަށާއި ވެރިރަށް ބެންގކޮކަށް ކުރިމަތިވި ފެންބޮޑުވުމުގެ ހާދިސާތަކުގައި 23 މީހަކު ވަނީ މަރުވެފައެވެ. އަދި 2.6 މިލިއަނަށްވުރެ ގިނަ މީހުންނަށް އަސަރުކޮށް، 940,000 އަށްވުރެ ގިނަ ގޭބިސީއަށް ވަނީ އެކިވަރުގެ ގެއްލުންތައް ލިބިފައެވެ. ވާރޭވެހުން މަޑުޖެހުމާއެކު އިދާރާތަކުން ދަނީ މެދުކެނޑުމެއްނެތި ފެން ހިންދުމުގެ މަސައްކަތް ކުރަމުންނެވެ. ނަމަވެސް، ފެންބޮޑުވުމުގެ ސަބަބުން ބެންގކޮކްގެ އެއާޕޯޓުތަކުގެ ދަތުރުފަތުރަށް ވަނީ ބުރޫއަރާފައެވެ.

އިންޑިއާގެ އުއްތަރު ޕްރަދޭޝްއަށް ކުރި އާދަޔާޚިލާފު ބޯ ވިއްސާރައިގައި 81 މީހުން މަރުވެ، 62 މީހަކު ޒަޚަމްވެފައިވާ ކަމަށް އެ ސްޓޭޓުގެ ރިލީފް ކޮމިޝަނަރުގެ އޮފީހުން މަޢުލޫމާތު ދެއެވެ. 48 ގަޑިއިރުގެ ތެރޭގައި އެ ސްޓޭޓަށް އެވްރެޖްކޮށް 66.5 މިލިމީޓަރުގެ ވާރޭ ވެހިފައިވާއިރު، މިއީ އާންމުކޮށް ވެހޭ މިންވަރަށްވުރެ 775 އިންސައްތަ އިތުރު މިންވަރެކެވެ. މީގެއިތުރުން، 2,200 އަށްވުރެ ގިނަ ގެއަށާއި، ދަނޑުބިންތަކަށް ވަނީ ބޮޑެތި ގެއްލުންތަކެއް ވެފައެވެ.

މީގެ އިތުރުން މިއަންމާގެ ތަނިންތާރީ ސަރަހައްދުގައި ފެންބޮޑުވުމުގެ ސަބަބުން އެކަކު މަރުވެ، 12 މީހަކު ގެއްލިގެން ދަނީ ހޯދަމުންނެވެ.

އޭޝިއާގެ ގައުމުތަކަށް ކުރަމުންދާ ބޯކޮށް ވާރޭވެހި ފެންބޮޑުވުމުގެ ކާރިސާތަކާ ގުޅިގެން އަސަރުކުރި ގައުމުތަކުގެ ކަމާބެހޭ އިދާރާތަކުން މިހާރު ދަނީ ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދީ، ލިބުނު ގެއްލުންތައް ވަޒަންކުރުމުގެ މަސައްކަތް ކުރަމުންނެވެ.