އައިފޯނާއި އެޕަލް ވޮޗް ފަދަ ޑިވައިސްތަކުގައި ބޭނުންކުރާ ވައިބްރޭޝަން ޓެކްނޮލޮޖީ ނުވަތަ ހެޕްޓިކް ފީޑްބެކާ ގުޅޭ ޕޭޓެންޓްތަކަކަށް އަރައިގެންފައިވާ ކަމަށް ނިންމައި، އެމެރިކާގެ ޖޫރީއަކުން އެޕަލް ކުންފުނި 5.7 ބިލިއަން ޑޮލަރުން ޖޫރިމަނާކުރުމަށް ހުކުމްކޮށްފިއެވެ.

މި މައްސަލަ ކޯޓަށް ހުށަހެޅީ އޯޑިއޯ ޓެކްނޮލޮޖީގެ ދާއިރާގައި ހަރަކާތްތެރިވާ "ޓެކްޝަން ޓެކްނޮލޮޖީ" ކުންފުނިންނެވެ. އެ ކުންފުނިން 2021 ވަނަ އަހަރު ދައުވާ އުފުލީ، އެ ކުންފުނީގެ ހުއްދައެއް ނެތި އެޕަލްއިން އެ މީހުންގެ ޕޭޓެންޓް ކުރެވިފައިވާ ހެޕްޓިކް ޓެކްނޮލޮޖީ ބޭނުންކުރަމުންދާ ކަމަށް ބުނެއެވެ. ޓެކްޝަންއިން ތުހުމަތުކުރި ގޮތުގައި އެޕަލްގެ ވައިބްރޭޝަން ސިސްޓަމަށް ގެނައި ބަދަލުތަކަކީ 2020 ވަނަ އަހަރު ޓެކްޝަންއަށް ލިބިފައިވާ ދެ ޕޭޓެންޓަކާ ޚިލާފު ބަދަލުތަކެކެވެ.

ހެޕްޓިކް ޓެކްނޮލޮޖީއަކީ ސްކްރީނުގައި ފިއްތާލުމުން، ނޮޓިފިކޭޝަނެއް އައުމުން ނުވަތަ ބަޓަނަކަށް އޮބާލުމުން އިނގިއްޔަށް އިހުސާސްވާ ފަދަ ލުއި ތަޅުވައިގަތުމެއް ނުވަތަ ވައިބްރޭޝަނެއް ގެނެސްދޭ ޓެކްނޮލޮޖީއެކެވެ.އައިފޯނާއި އެޕަލް ވޮޗް ފަދަ ގިނަ އުފެއްދުންތަކުގައި އެޕަލްއިން ބޭނުންކުރަނީ އަމިއްލަ "ޓެޕްޓިކް އެންޖިން" ސިސްޓަމެވެ. މިއީ އެޕަލް ޑިވައިސްތައް ބޭނުންކުރާ ފަރާތްތަކަށް އަޑާއި މަންޒަރުގެ އިތުރުން ޖިސްމާނީ އިހުސާސެއް ފޯރުކޮށްދިނުމުގައި ވަރަށް މުހިންމު ދައުރެއް އަދާކުރާ ޓެކްނޮލޮޖީއެކެވެ.

މި ތުހުމަތުތަކަށް އެޕަލްއިން ވަނީ ވަރަށް ބޮޑަށް އިންކާރުކޮށްފައެވެ. އެޕަލްއިން ބުނި ގޮތުގައި އެ ކުންފުނީގެ ޓެކްނޮލޮޖީއާއި ޓެކްޝަންގެ އުފެއްދުމާ މުޅިން ތަފާތެވެ. އަދި ބަދަލުގެ ގޮތުގައި ނަގައިދޭން ނިންމި މިންވަރަކީ މައްސަލައިގައި ހުށަހެޅުނު ހެކިތަކާ ނުބައްދަލު އަދަދެއް ކަމަށް ބުނެ، މި ނިންމުން އިސްތިއުނާފު ކުރާނެ ކަމަށް އެޕަލްއިން ވަނީ ހާމަކޮށްފައެވެ.

މި މައްސަލައިގައި މީގެ ކުރިން 2023 ވަނަ އަހަރު ސެން ޑިއޭގޯގެ ފަނޑިޔާރަކު ވަނީ އެޕަލް ކޮޅަށް މައްސަލަ ނިންމައި، އެޕަލްއިން އެއްވެސް ޕޭޓެންޓަކާ ޚިލާފުވެފައި ނުވާ ކަމަށް ކަނޑައަޅާފައެވެ. ނަމަވެސް ފެޑެރަލް އިސްތިއުނާފު މަރުހަލާއަށް ފަހު އަލުން ޝަރީއަތް ކުރިއަށް ގެންދިއުމުން، މިފަހަރުގެ ޖޫރީގެ ނިންމުން އައީ އެޕަލްއާ ދެކޮޅަށެވެ.

މައުލޫމާތު ލިބޭ ގޮތުގައި، ބޮޑު އަދަދަކުން ޖޫރިމަނާ ކުރި ނަމަވެސް، އެޕަލްއިން ގަސްދުގައި އެ ޕޭޓެންޓްތަކާ ޚިލާފުވި ކަމަކަށް ޖޫރީއަކުން ނުނިންމައެވެ. މި މައްސަލައަކީ ޓެކްނޮލޮޖީއާއި މެޑިކަލް ދާއިރާގެ އެކި ކުންފުނިތަކުން އެޕަލްގެ އުފެއްދުންތަކުގައި ބޭނުންކުރާ ފީޗާތަކާ ގުޅިގެން ކުރިމަތިކުރުވަމުންދާ ގާނޫނީ ގޮންޖެހުންތަކުގެ ތެރެއަށް އިތުރުވި އަނެއް މައްސަލައެވެ.

މި ހުކުމުގައިވާ އަދަދަކީ ވަރަށް ބޮޑު އަދަދަކަށް ވާތީ، މިއީ އެޕަލްއަށް ބޮޑު ނުތަނަވަސްކަމެއް ގެނުވާނެ ކަމެކެވެ. ނަމަވެސް، އިސްތިއުނާފު މަރުހަލާގައި ނުވަތަ އިތުރު ޝަރީއަތްތަކުގެ ތެރެއިން މި އަދަދަށް ބަދަލު އައުމަކީ އެކަށީގެންވާ ކަމެކެވެ. އެޕަލްއިން މި މައްސަލަ އިސްތިއުނާފު ކުރަން ނިންމާފައިވާތީ، ހެޕްޓިކް ޓެކްނޮލޮޖީގެ މި ގާނޫނީ ހަނގުރާމަ އަދިވެސް އިތުރަށް ދިގުދެމިގެންދާނެ ކަމަށް ބެލެވެއެވެ.