ޓޫރިސްޓުން ރާއްޖެ އިހުތިޔާރުކުރަނީ މި ޤައުމުގެ ޤުދުރަތީ ރީތިކަމަށް ބަލައިގެން ކަމަށް ވިޔަސް، އެ މީހުން ރާއްޖެއަށް ކުރާ އިތުބާރު އަބަދުވެސް ބިނާވާނީ ސަލާމަތާއި ރައްކާތެރިކަން އިހުސާސްކުރެވޭ މިންވަރެއްގެ މައްޗަށް ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން މިއަދު ވިދާޅުވެއްޖެއެވެ.

މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ (މަފްސީ) އިން އިންތިޒާމްކޮށްގެން ބޭއްވި "ސޭފްޓީ އެންޑް ސެކިއުރިޓީ ކޮންފަރެންސް މޯލްޑިވްސް 2026" ފެށުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން މިނިސްޓަރު ވިދާޅުވީ، ރާއްޖެއަކީ މުޅި ދުނިޔޭގައި ވެސް ފާހަގަކޮށްލެވޭ އެންމެ ކާމިޔާބު ޓޫރިޒަމް އޮތް އެއް ގައުމު ކަމަށެވެ. އަދި ރާއްޖެ އަންނަ ފަތުރުވެރިން ތަޖުރިބާކުރާ ހިތްފަސޭހަކަމުގެ އެންމެ ބޮޑު ސިއްރަކީ ވެސް ރާއްޖޭގައި އޮތް އަމާން، ރައްކާތެރި މާހައުލު ކަމަށް މިނިސްޓަރު ފާހަގަކުރެއްވިއެވެ.

ފަތުރުވެރިކަމުގެ ސިނާއަތުގައި ހަރަކާތްތެރިވާ ހުރިހާ ފަރާތްތަކެއްގެ ބައިވެރިވުމުގެ މުހިންމުކަމަށް އަލިއަޅުއްވާލައްވަމުން މިނިސްޓަރު އިޙްސާން ވިދާޅުވީ، ރައްކާތެރިކަން ކަށަވަރުކުރުމަކީ ހަމައެކަނި ސަރުކާރުގެ ނުވަތަ ސަލާމަތީ ޚިދުމަތްތަކުގެ އެކަނި ޒިންމާއެއް ނޫން ކަމަށެވެ. އެއީ ރާއްޖޭގެ ޓޫރިޒަމް ޕްރޮޑަކްޓާއި ޤައުމުގެ މަޤްބޫލުކަމުގެ ވެސް މުހިންމު ބައެއް ކަމަށާއި، އެކަން ހިމާޔަތްކުރުމަކީ މުޅި ސިނާއަތުގައި މަސައްކަތްކުރާ އެންމެންގެ ވެސް ގައުމީ މަސްއޫލިއްޔަތެއް ކަމަށް ވިދާޅުވިއެވެ.

މީގެ އިތުރުން، ޓޫރިޒަމްގެ ސަލާމަތީ މާހައުލު ވަރަށް ބޮޑަށް ބަދަލުވަމުން އަންނަކަން ފާހަގަކުރައްވައި މިނިސްޓަރު ވިދާޅުވީ، މިހާރު ރައްކާތެރިކަމުގެ ވާހަކަ ދައްކާއިރު އެއީ ހަމައެކަނި އާންމު ކުށްތަކާ ގުޅޭ ކަމެއް ނޫން ކަމަށެވެ. އަލިފާނުގެ ހާދިސާތަކާއި، އެކްސިޑެންޓްތަކާއި، ކަނޑުމަތީގެ ނުރައްކާތެރި ހާދިސާތަކުގެ އިތުރުން، މޫސުމީ ބަދަލުތަކާއި، ސައިބާ ހަމަލާތަކާއި ޑޭޓާ ލީކުވުން ފަދަ ޒަމާނީ އައު ގޮންޖެހުންތަކާ މިއަދު ކުރިމަތިލާންޖެހިފައިވާ ކަމަށް ވިދާޅުވިއެވެ.

ރާއްޖެ ފަދަ ކުދި ރަށްތަކެއްގެ މައްޗަށް އެކުލެވިފައިވާ ޖަޒީރާ ގައުމަކަށް މިފަދަ ގޮންޖެހުންތައް ވަކިން ބޮޑަށް އުނދަގޫވާނެކަން ފާހަގަކުރައްވަމުން މިނިސްޓަރު ވަނީ، ހާދިސާއެއް ހިނގުމުން ފިޔަވަޅު އެޅުމުގެ ބަދަލުގައި، އެންމެން ގުޅިގެން ކުރިއާލައި ރައްކާތެރިކަމުގެ ހަރުދަނާ ފިޔަވަޅުތައް އެޅުމަކީ ރާއްޖޭގެ ޓޫރިޒަމްގެ ކުރިމަގަށް ކޮންމެހެން ބޭނުންތެރި ކަމެއްކަން ހަނދާންކޮށްދެއްވާފައެވެ.