ލ. މާބައިދޫ އިރުން 11 މޭލު ބޭރުގައި އޮތް ދޮށީގެ މަސްވެރިކަމަށް ބޭނުންކުރާ ކަނދުފަތި ކެނޑިގެން އޮޔާދިއުމާ ގުޅިގެން، އެ ސަރަޙައްދުގައި މިއަދު އަލުން ކަނދުފައްޗެއް އަޅާފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ހާމަކޮށްފިއެވެ.

މަސްވެރިކަމާ ބެހޭ ވުޒާރާއިން ބުނީ، އެލް10ޑީ01-01 ނަންބަރު ދީފައިވާ މި ކަނދުފަތި މިއަދު އަޅާފައިވަނީ 11 ފެބްރުއަރީ 2024 ގައިވެސް އެ ކަނދުފަތި އަޅާފައިވާ ލޮކޭޝަންގައި ކަމަށެވެ. މިއީ ލ. އަތޮޅާއި އެ ސަރަޙައްދުގެ މަސްވެރިންނަށް ކަނޑުމަތީގައި މަސް އައިނު ހޯދުމަށް ފަސޭހަކޮށްދިނުމުގެ ގޮތުން އެ ވުޒާރާއިން ހިންގި އަވަސް އޮޕަރޭޝަނެކެވެ.

މި މަސައްކަތަކީ މެދުރާއްޖެތެރޭގެ އަތޮޅުތަކުގެ ކަނދުފަތިތައް މަރާމާތުކޮށް، އާ ކަނދުފަތިތައް ގާއިމުކުރުމަށް މަސްވެރިކަމާ ބެހޭ ވުޒާރާގެ ފަންނީ ޓީމުން ކުރިއަށްގެންދާ ޚާއްޞަ ދަތުރުގެ ތެރެއިން ކުރެވުނު މަސައްކަތެކެވެ. މި ދަތުރުގެ ތެރެއިން އިއްޔެ ވަނީ ތ. ގުރައިދޫ އިރުދެކުނުން 9 މޭލު ބޭރުގައި އޮތް ކަނދުފަތި އޮޔާ ގޮސްފައިވާތީ، އެ ސަރަޙައްދުގައިވެސް އަލުން ކަނދުފައްޗެއް އަޅާފައެވެ.

މަސްވެރިކަމާ ބެހޭ ވުޒާރާއިން ބުނެފައިވަނީ، ދޮށީގެ މަސްވެރިކަމަށް ޚާއްޞަކޮށްގެން އަޅާ މިފަދަ ކަނދުފަތިތައް އަލުން ގާއިމުކުރެވިގެން ދިއުމާއެކު، މެދުރާއްޖެތެރޭގެ އަތޮޅުތަކުގައި ދޮށީގެ މަސްވެރިކަން ކުރާ އުޅަނދުފަހަރަށް ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ. ޚާއްޞަކޮށް މަސް އައިނު ހޯދުމަށް ކުރަންޖެހޭ ދަތުރުތައް ކުރުވެ، ތެލަށް ކުރާ ހޭދަ ބޮޑުތަނުން ކުޑަވެގެންދާނެ ކަމަށް އެ ވުޒާރާއިން ހާމަކޮށްފައިވެއެވެ.

ދޮށީގެ މަސްވެރިކަމަކީ ތިމާވެއްޓާ ރައްޓެހި އަދި ދެމެހެއްޓެނިވި ގޮތެއްގައި ރާއްޖޭގައި ކުރާ މަސްވެރިކަމަކަށްވާތީ، މި ކަނދުފަތިތަކަކީ ކަނޑުގެ ދިރުންތަކަށް ގެއްލުން ނުވާގޮތަށް، ކަޅުބިލަމަސް ބޭނުމަށް މަގުފަހިކޮށްދޭ މުހިންމު ވަސީލަތެއް ކަމަށް މަސްވެރިކަމާ ބެހޭ ވުޒާރާއިން މަޢުލޫމާތު ދީފައިވެއެވެ.