މާލޭގެ ހެންވޭރު ގެއެއްގެ އެޕާޓްމަންޓެއްގައި ޤަވާޢިދާ ޚިލާފަށް ސިނގިރޭޓު އުފައްދަމުންދިޔަ މައްސަލައެއްގައި ފުލުހުންގެ ބެލުމުގެ ދަށަށް ގެނެސްފައިވާ ގިނަ ޢަދަދެއްގެ ސިނގިރޭޓާއި ދުންފަތް ކ. ދޫނިދޫގައި އިއްޔެ ނައްތާލައިފިއެވެ.

ފުލުހުން މަޢުލޫމާތު ދެއްވި ގޮތުގައި، މި ތަކެއްޗަކީ ހެންވޭރު ގެއެއްގެ އެޕާޓްމަންޓެއްގައި އޮފީހެއް ހިންގާ ނަމުގައި، މެޝިނަރީ ބޭނުންކޮށްގެން ޤާނޫނާ ޚިލާފަށް ސިނގިރޭޓު އުފައްދާ ކަމަށް ތުހުމަތުކުރެވުނު މައްސަލައަކާ ގުޅިގެން 30 ޖަނަވަރީ 2025 ގައި ހިންގި ޚާއްޞަ އޮޕަރޭޝަނެއްގައި އަތުލައިގަތް ތަކެއްޗެވެ.

ސެޕްޓެމްބަރު މަހުގެ 28 ވަނަ ދުވަހު ދޫނިދޫގައި ނައްތާލި މި ތަކެތީގެ ތެރޭގައި 4،285 ސިނގިރޭޓު ކާޓޫނާއި، 232 ސިނގިރޭޓު ފޮށީގެ އިތުރުން 93.60 ކިލޯގެ ރޯ ދުންފަތް ހިމެނެއެވެ.

މި ތަކެތި ނައްތާލާފައިވަނީ ފުލުހުންގެ ބެލުމުގެ ދަށަށް ގެނެވޭ މިފަދަ ހިފެހެއްޓޭ ތަކެތި ނައްތާލުމުގައި ޢަމަލުކުރުމަށް ކަނޑައެޅިފައިވާ ޚާއްޞަ އުޞޫލުގެ ދަށުން، އެކަމަށްޓަކައި އެކުލަވާލާފައިވާ ޚާއްޞަ ކޮމިޓީގެ ސީދާ ބެލުމުގެ ދަށުންނެވެ.