ބިދޭސީން ރާއްޖޭގައި ވަޒަންވެރިކުރުވުމަކީ ވިޔަފާރިއަކަށް ހަދައިގެން ނުވާނެ ކަމަށާއި، އެފަދަ ވިޔަފާރިއަކަށް ވަނުމަށް ސަރުކާރަށް މަޖުބޫރުވެގެން އުޅެނީ ކޮން ސަބަބަކާ ހުރެތޯ ކެންދޫ ދާއިރާގެ ކުރީގެ މެންބަރު އަދި މަޝްހޫރު ގާނޫނީ ވަކީލު އަލީ ހުސެއިން ސުވާލު އުފައްދަވައިފިއެވެ.

އެކްސް ގައި ހިއްސާކުރެއްވި ޕޯސްޓެއްގައި އަލީ ހުސެއިން ވިދާޅުވީ، ވިޔަފާރީގެ އުސޫލުން ކުރެވިދާނެ އެހެނިހެން ބައިވަރު މަސައްކަތްތައް ހުއްޓައި، ރަސްމާލޭގައި ބޭރު މީހުން ވަޒަންވެރިކުރުވުމުގެ ވިޔަފާރީގެ ތެރެއަށް ވަނުމަށް ރައީސުލްޖުމްހޫރިއްޔާއަށް މަޖުބޫރުވެގެން އުޅޭ ސަބަބާމެދު ވިސްނަންޖެހޭ ކަމަށެވެ.

އަލީ ހުސެއިން މިފަދައިން ވިދާޅުވެފައި މިވަނީ ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލެ މަޝްރޫއުގެ ތެރެއިން 500 ހެކްޓަރުގެ ބިން، ދުނިޔޭގެ މުއްސަނދިންނަށް ވިއްކުމަށް ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ސަރުކާރުން ވެފައިވާ އެއްބަސްވުން ބާތިލުކުރަން އޭނާ ސުޕްރީމް ކޯޓަށް މައްސަލައެއް ހުށަހަޅުއްވާފައިވާ ދަނޑިވަޅެއްގައެވެ.

އަލީ ހުސެއިން ސުޕްރީމް ކޯޓަށް ހުށަހެޅުއްވި ދުސްތޫރީ މައްސަލައިގައި ބަޔާންކުރައްވާފައިވަނީ، މި އެއްބަސްވުމަކީ ގާނޫނުއަސާސީގެ 250 ވަނަ މާއްދާއާއި 251 ވަނަ މާއްދާގެ (ށ) އާ ކަނޑައެޅިގެން ހިލާފު، ބާތިލު އެއްބަސްވުމެއް ކަމަށެވެ. އަދި މި މައްސަލައިގައި ޝަރުއީ ހުކުމެއް އަންނަންދެން އެއްބަސްވުމަށް އަމަލުކުރުން ފަސްކުރުމުގެ ވަގުތީ އަމުރަކަށް ވެސް އޭނާ ވަނީ އެދިވަޑައިގެންފައެވެ.

ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދާދިފަހުން ވިދާޅުވެފައިވަނީ އީގަލް ހިލްސްއާއެކު ވެފައިވާ އެއްބަސްވުމުގައި ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ނުހިމެނޭނެ ކަމަށެވެ. އަދި އެ ބިން ދޫކުރަނީ ކުއްޔަށް (ލީސް އުސޫލުން) ކަމަށާއި، އެއްވެސް ސޮވްރިން ގެރެންޓީއެއް އަދި ޓެކްސް އިނާޔަތެއް ވެސް ނުދޭ ކަމަށް ރައީސް ވަނީ ވިދާޅުވެފައެވެ.