އިސްރާއީލުން ޣައްޒާއަށް ދެމުންގެންދާ ރަހުމުކުޑަ ހަމަލާތަކުގެ ސަބަބުން އެ ސަރަހައްދަށް ލިބިފައިވާ ބޮޑެތި ގެއްލުންތައް ދައްކުވައިދޭ އެންމެ ފަހުގެ ސެޓެލައިޓް ފޮޓޯތައް ގޫގަލް އާތުން އާންމުކޮށްފިއެވެ. މި ފޮޓޯތަކުން ސާފުވާ ގޮތުގައި ޣައްޒާގެ ބޮޑު ބައެއް ވަނީ ސުންނާފަތިވެ، އަޅިއަށް ވެފައެވެ.

ދުނިޔޭގެ އެންމެ އާބާދީ ބޮޑު އެއް ސަރަހައްދު ކަމުގައިވާ ޣައްޒާގެ ރައްޔިތުން ދިރިއުޅޭ ގެދޮރުގެ އިތުރުން، ހޮސްޕިޓަލްތަކާއި، ސްކޫލްތައް އަދި އަސާސީ އެކި ޚިދުމަތްދޭ މަރުކަޒުތައް ވަނީ ބިމާ ހަމަކޮށްލާފައެވެ. ބޭރުގެ ނޫސްވެރިންނާއި މިނިވަން ތަހުގީގީ އިދާރާތަކަށް ޣައްޒާއަށް ވަނުން އިސްރާއީލުން މަނާކޮށްފައިވާ ދަނޑިވަޅެއްގައި، މި ސެޓެލައިޓް ފޮޓޯތަކަކީ ޣައްޒާގެ އަސްލު ހާލަތާއި އެތަނުގައި ހިންގަމުންދާ ޖަރީމާތައް ދުނިޔެއަށް ސާބިތުކޮށްދޭ މުހިންމު ހެއްކެކެވެ.

އދ. ގެ ސެޓެލައިޓް ސެންޓަރުން ހާމަކޮށްފައިވާ ތަފާސްހިސާބުތަކަށް ބަލާއިރު، ޣައްޒާގެ އިމާރާތްތަކުގެ 82 އިންސައްތައަށްވުރެ ބޮޑުބައެއް އަދި އާންމުންގެ ގެދޮރާއި ހޮސްޕިޓަލްތަކުގެ 90 އިންސައްތަ ވަނީ ބޭނުންނުކުރެވޭ ވަރަށް ހަލާކުވެފައެވެ. މީގެއިތުރުން، އދ. ގެ ރިޕޯޓްތައް ބަޔާންކުރާ ގޮތުގައި ޣައްޒާ މިހާރު ތަހައްމަލު ކުރަމުންދަނީ ތާރީޚު ނުދެކޭފަދަ ނުރައްކާތެރި އިގްތިސާދީ ކާރިސާއެކެވެ. އެގޮތުން މަސައްކަތްކުރެވޭ އުމުރުގެ ފަލަސްތީނު ރައްޔިތުންގެ 90 އިންސައްތަ މީހުންގެ ވަޒީފާ ވަނީ ގެއްލިފައެވެ.

މުޅި ޣައްޒާގައި 60 މިލިއަން ޓަނުގެ ކުނިބުނި ޖަމާވެފައިވާއިރު، އެ ތަކެތި ނަގައި ސާފުކުރުމަށް އެތައް އަހަރެއް ހޭދަވާނެ ކަމަށް މާހިރުން އަންދާޒާކުރެއެވެ. ހަމައެއާއެކު، ވެއްޓިފައިވާ އިމާރާތްތަކުގެ ދަށުގައި އެތައް ހާސް ބައެއްގެ ހަށިގަނޑު ވަޅުލެވިފައިވާ ކަމަށް ބެލެވެއެވެ. އިންސާނީ ހައްގުތަކަށް މަސައްކަތްކުރާ ފަރާތްތަކުން ކަންބޮޑުވުން ފާޅުކުރާ ގޮތުގައި، ސާފުކުރުމުގެ ނަމުގައި އިސްރާއީލުން މިހާރު ކުރިއަށްގެންދާ ހަރަކާތްތަކަކީ، އެމީހުން ހިންގާފައިވާ ހަނގުރާމައިގެ ޖަރީމާތަކާއި ގަތުލުއާންމުގެ ހެކިތައް ނައްތާލުމަށް ރާވައިގެން ހިންގާ އަމަލެކެވެ.

މި ހިތްދަތި ހާލަތުގެ އިތުރުން، ޣައްޒާގެ ސިއްހީ ނިޒާމު މުޅިން ފުނޑުފުނޑުވެފައިވާއިރު، ސާފު ބޯފެނާއި ކާބޯތަކެތި އަދި ޒަރޫރީ ބޭސްފަރުވާއިން މަހްރޫމްވެފައިވާ އެތައް މިލިއަން އާންމުން ދަނީ ބަލިމަޑުކަމާއި ބަނޑުހައިހޫނުކަމާ ކުރިމަތިލަމުންނެވެ. ބައިނަލްއަގުވާމީ މުޖުތަމައުން މި ޖަރީމާތައް ވަގުތުން ހުއްޓުވައި، ދާއިމީ ހަނގުރާމަ ހުއްޓާލުމަކަށް ބާރުނާޅައިފިނަމަ، މުޅި ޣައްޒާގެ ނަސްލު އެއްކޮށް ނައްތާލުމުގެ ބިރު އޮތް ކަމަށް އިންސާނީ އެހީދޭ ޖަމިއްޔާތަކުން ދަނީ ތަކުރާރުކޮށް އިންޒާރު ކުރަމުންނެވެ.