ގެވެށި އަނިޔާ ހުއްޓުވުމާއި އެފަދަ މައްސަލަތަކަށް އިޖާބަދިނުމުގެ ގާބިލުކަން އިތުރުކުރުމުގެ މަގުސަދުގައި ފުލުހުންނަށް ހާއްސަކޮށްގެން ޓްރެއިނިންގ އޮފް ޓްރޭއިނާސް އޮން ޑޮމެސްޓިކް ވައިލެންސް ޕްރިވެންޝަން އެންޑް ރެސްޕޮންސް (ޓީއޯޓީ) ޕްރޮގްރާމެއް ކުރިއަށް ގެންގޮސްފިއެވެ.

ފުލުހުން ބުނީ، މި ޕްރޮގްރާމް ކުރިއަށް ގެންދިޔައީ، ދިވެހި ފުލުހުންގެ ޚިދުމަތާއި، ފެމިލީ ޕްރޮޓެކްޝަން އޮތޯރިޓީ (އެފްޕީއޭ) ގުޅިގެން، މި ސެޕްޓެމްބަރު މަހުގެ 20 އިން 24 އަށް ކަމަށެވެ.

ރާއްޖޭގެ އެކި ސަރަހައްދުތަކުގައި މަސައްކަތްކުރާ ފުލުހުން ހިމެނޭހެން ޖުމުލަ 30 ފުލުހުން ބައިވެރިވި މި ޕްރޮގްރާމުގައި، ގެވެށި އަނިޔާއާ ގުޅޭ މުހިންމު ދާއިރާތަކަށް އަލިއަޅުވާލައި 10 ސެޝަނެއް ކުރިއަށް ގެންގޮސްފައި ވާކަމަށް ފުލުހުން މަޢުލޫމާތު ދީފައިވެއެވެ.

ފުލުހުން ބުނީ، މި ތަމްރީނު ޕްރޮގްރާމް ހިންގުމުގެ މައިގަނޑު މަގުސަދަކީ ގެވެށި އަނިޔާ ހުއްޓުވުމަށާއި، އެފަދަ މައްސަލަތައް ރިޕޯޓު ކުރުމުން ފުލުހުން އަމަލުކުރަންޖެހޭ ގޮތްތަކާ ގުޅޭގޮތުން ބޭނުންވާ އިލްމާއި ހުނަރު އިތުރުކުރުން ކަމަށެވެ. ހަމައެއާއެކު ފުލުހުންގެ މުއައްސަސާގެ ތެރޭގައި އެހެން ފުލުހުންނަށް މިފަދަ ތަމްރީނުތައް ދެވޭނެ ފެންވަރުގެ ގާބިލު މުދައްރިބުން (ޓްރެއިނަރުން) އުފެއްދުމާއި، މި ދާއިރާއިން ފުލުހުން ދޭ ހިދުމަތުގެ ފެންވަރު އިތުރަށް ހަރުދަނާކުރުމަކީ ވެސް މި ޕްރޮގްރާމުގެ މުހިންމު އަމާޒެއް ކަމަށް ފުލުހުން ވަނީ ބުނެފައެވެ.

މި ޕްރޮގްރާމް ނިންމާލުމުގެ ކުރިން ބައިވެރިންނަށް އުނގަންނައިދެވުނު މައުލޫމާތާއި، މުދައްރިބެއްގެ ކިބައިގައި ހުންނަންޖެހޭ ކިޔަވައިދިނުމުގެ ހުނަރުތައް ހުރި މިންވަރު ދެނެގަތުމަށްޓަކައި ހާއްސަ އިމްތިހާނެއް ކުރިއަށް ގެންގޮސްފައިވެއެވެ. މިގޮތުން ބައިވެރިންގެ ފެންވަރު ވަޒަންކުރުމަށް އެމް.ސީ.ކިއު އިމްތިހާނެއް ބޭއްވުމުގެ އިތުރުން، ބައިވެރިން އަމަލީގޮތުން ކިޔަވައިދިނުމުގެ ހުނަރު ދައްކުވައިދޭ ޕްރެޒެންޓޭޝަންތަކެއް ވެސް ހުށަހަޅާފައިވާ ކަމަށް ފުލުހުން މަޢުލޫމާތުދީފައިވެއެވެ.