ދިވެހިރާއްޖެއާއި ޤަތަރު ނޭޝަނަލް ބޭންކް (ކިއު.އެން.ބީ) އާ ދެމެދު މާލީ ގޮތުންނާއި އިންވެސްޓްމަންޓްގެ ދާއިރާއިން ގުޅުން ބަދަހިކުރުމާ ގުޅޭގޮތުން މަތީ ފަންތީގެ މަޝްވަރާތަކެއް ބާއްވައިފިއެވެ.

މި މަޝްވަރާތައް ކުރިއަށްދިޔައީ މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިސަސް ހަސަން ޒަރީރު، ޤަތަރުގެ ވެރިރަށް ދޯހާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، ޤަތަރު ނޭޝަނަލް ބޭންކުގެ ގްރޫޕް ޗީފް އެގްޒެކެޓިވް އޮފިސަރ (ސީ.އީ.އޯ) އަބްދުﷲ މުބާރަކް އަލް-ޚަލީފާއާ އެކު ބޭއްވެވި ބައްދަލުކުރެއްވުމުގައެވެ.

ދޯހާގައި ބޭއްވުނު މި ބައްދަލުކުރެއްވުމުގައި މައިގަނޑު ގޮތެއްގައި އަލިއަޅުއްވާލައްވާފައިވަނީ ދެފަރާތުގެ ދެމެދުގައިވާ މާލީ އެއްބާރުލުން އިތުރަށް ހަރުދަނާކުރުމަށާއި، ރާއްޖޭގެ ތަރައްޤީއަށް ބޭނުންވާ މުހިންމު ދާއިރާތަކުން އިންވެސްޓްމަންޓް ފުރުޞަތުތައް ފަހިކުރުމުގެ މައްޗަށެވެ. އަދި ތަރައްޤީގެ އެކި މަޝްރޫޢުތަކުގައި ޕާޓްނަރޝިޕް ޤާއިމުކުރުމާ ގުޅޭގޮތުންވެސް ފުޅާ ދާއިރާއެއްގައި ވަނީ މަޝްވަރާކުރައްވާފައެވެ.

މީގެއިތުރުން، ދިވެހިރާއްޖެއާއި ޤަތަރާ ދެމެދު އޮތް އިޤްތިޞާދީ ގުޅުން އިތުރަށް ބަދަހިކޮށް، ދެމެހެއްޓެނިވި އަދި ދިގު މުއްދަތުގެ އިޤްތިޞާދީ ކުރިއެރުމާއި ތަރައްޤީ ހާސިލުކުރުމަށްޓަކައި ގުޅިގެން މަސައްކަތްކުރެވިދާނެ ދާއިރާތަކާ ގުޅޭގޮތުންވެސް ދެބޭފުޅުން ވަނީ ޚިޔާލު ބަދަލުކުރައްވާފައެވެ.