މޮރިޝަސް ސަރުކާރުން ބުނެފައިވަނީ، ޗާގޯސް ޖަޒީރާތަކުގެ ކުރިމަގާ ގުޅޭގޮތުން އެމެރިކާއިން އެއްވެސް ހުށަހެޅުމެއް ހުށަހަޅާފައި ނުވާ ކަމަށެވެ. މިއީ އެމެރިކާއިން އެ ޖަޒީރާތައް ހޯދުމުގެ ފުރުސަތުތަކެއް ބަލަމުންދާ ކަމަށް މީޑިއާތަކުގައި ފެތުރިފައިވާ ޚަބަރުތަކާ ގުޅިގެން އެ ގައުމުން ނެރުނު ބަޔާނެކެވެ.

ހޯމަ ދުވަހު ނެރުނު މި ބަޔާނުގައި މޮރިޝަސްއިން ބުނީ، "ދަ ޓެލެގްރާފް" ނޫހުގައި ޝާއިއުކޮށްފައިވާ ޚަބަރުތަކަށް އެ ގައުމުން ސަމާލުކަން ދީފައިވާ ކަމަށެވެ. ނަމަވެސް، ޑިއޭގޯ ގާސިއާ ނުވަތަ ޗާގޯސް ޖަޒީރާތަކާ ގުޅޭ ވަކި އެއްބަސްވުމެއްގެ މައްސަލާގައި އެމެރިކާގެ ސަރުކާރުން ސީދާ ގޮތުން ނުވަތަ ނުސީދާ ގޮތުންވެސް އެއްވެސް މުއާމަލާތެއް ކޮށްފައި ނުވާ ކަމަށް އެ ބަޔާނުގައި ބަޔާންކޮށްފައިވެއެވެ.

މީގެ އިތުރުން، ޗާގޯސް ޖަޒީރާތަކުގެ މައްޗަށް އޮތް ސިޔާދަތީ ބާރަކީ އެއްވެސް ހާލެއްގައި މަޝްވަރާ ކުރެވޭނެ ކަމެއް ނޫން ކަމަށްވެސް މޮރިޝަސް ސަރުކާރުން ވަނީ ތަކުރާރުކޮށް ބުނެފައެވެ.

މި މައްސަލަ ފެންމަތިވެފައިވަނީ، ޗާގޯސްގެ ސިޔާދަތީ ބާރު މޮރިޝަސްއަށް ދިނުމަށް އިނގިރޭސިވިލާތުން ނިންމާފައިވާ ނިންމުމުގެ ބަދަލުގައި، އެމެރިކާއިން ސީދާ އެ ރަށްތައް ހޯދުމަށް ޑޮނަލްޑް ޓްރަމްޕްގެ ސަރުކާރުގެ އޮފިޝަލުން ވިސްނަމުންދާ ކަމަށް ރިޕޯޓްތައް ބުނުމާ ގުޅިގެންނެވެ. އެމެރިކާގެ ބައެއް އޮފިޝަލުން ކަންބޮޑުވަނީ، އެ ސަރަހައްދުގައި ޗައިނާގެ ނުފޫޒު ގަދަވަމުންދާ ދަނޑިވަޅެއްގައި، މޮރިޝަސްގެ ބާރުގެ ދަށަށް އެ ރަށްތައް ދިއުމުން ޑިއޭގޯ ގާސިއާގައި އޮންނަ އަސްކަރީ މަރުކަޒަށް ނުރައްކާވެދާނެތީއެވެ.

ޗާގޯސްގެ މައްސަލައަކީ އެތައް އަހަރެއްވީ ބައިނަލްއަގުވާމީ މައްސަލައެކެވެ. 1968 ވަނަ އަހަރު މޮރިޝަސް މިނިވަންވުމުގެ ކުރިން އިނގިރޭސިވިލާތުން ވަނީ އެ ރަށްތައް ވަކިކޮށްފައެވެ. އަދި އެތަނުގައި އަސްކަރީ މަރުކަޒު ހެދުމަށްޓަކައި އެތައް ހާސް ރައްޔިތުންނެއް ވަނީ އެ ރަށްތަކުން ބޭރުކޮށްފައެވެ.

ބައިނަލްއަގުވާމީ ކޯޓުތަކުން ކުރިން ނިންމާފައިވަނީ އިނގިރޭސިން އެ ރަށްތަކުގެ މައްޗަށް ހިންގާ ބާރު ނިމުމަކަށް ގެނެސް، މޮރިޝަސްގެ މިނިވަންކަން ފުރިހަމަކުރުމަށް އެ ރަށްތައް ހަވާލުކުރަން ޖެހޭނެ ކަމަށެވެ. ނަމަވެސް، ޑޮނަލްޑް ޓްރަމްޕް މި އެއްބަސްވުމަށް ފާޑުވިދާޅުވެ، މިއީ ހެދޭ ބޮޑު ގޯހެއްގެ ގޮތުގައި ސިފަކުރެއްވުމާ ގުޅިގެން، އެ މަސައްކަތް ވަނީ މަޑުޖެހިފައެވެ.

އެހެންނަމަވެސް، މޮރިޝަސް ސަރުކާރުން ބުނެފައިވަނީ ޗާގޯސް ޖަޒީރާތަކުގެ ސިޔާދަތީ ބާރު ހޯދުމަށް ކުރާ މަސައްކަތުގައި އެ ގައުމުން ސާބިތުކަމާއެކު ދެމިއޮންނާނެ ކަމަށާއި، މިކަމާ ގުޅޭގޮތުން އެމެރިކާއާއެކު އެއްވެސް ވަކި އެއްބަސްވުމެއްގެ މަޝްވަރާ ކުރިއަށް ނުދާ ކަމަށެވެ.