ތައިލެންޑުގެ ބުރީރާމް ޕްރޮވިންސްގައި އުމުރުން 9 އަހަރުގެ ދަރިފުޅަށް ސްކޫލް ޔުނީފޯމް ގަތުމަށް ފައިސާ ހޯދުމަށް ހަކުރު އޮޅެއްގައި މަސައްކަތް ކުރަމުންދިޔަ ބައްޕައަކު ގުގުރާ، ހޮނުއެޅުމުގެ ސަބަބުން މަރުވެއްޖެއެވެ.

މޭ 7 ގައި ހިނގި މި ހާދިސާގައި މަރުވެފައިވަނީ އުމުރުން 45 އަހަރުގެ ސުންތޯން ކައިންނިންތޯން ނަމަކަށް ކިޔާ މީހެކެވެ. ރިޕޯޓްތައް ބުނާގޮތުން އޭނާ މަރުވީ މެންދުރުފަހު މަސައްކަތުގައި އުޅެނިކޮށް، ގަހެއްގެ ކައިރީގައި ހުރި އާލާތެއް ނަގަން އުޅުނު ވަގުތު ހޮނު އެޅުމުންނެވެ.

ހޮނު އެޅުމުގެ ސަބަބުން ސުންތޯންގެ ބޮލަށް ބޮޑެތި ޒަޚަމްތަކެއް ލިބި، ހޭނެތިފައި އޮއްވާ ފެނުމުން ވަގުތުން ހޮސްޕިޓަލަށް ގެންދެވުނު ނަމަވެސް، ފަރުވާ ދެމުންދަނިކޮށް އޭނާ ވަނީ މަރުވެފައެވެ.

ސުންތޯންގެ އަންހެންނުން ބުނި ގޮތުގައި އޭނާއަކީ އާއިލާގެ ކަންކަން ބެލެހެއްޓުމަށާއި ދަރިފުޅުގެ ކިޔެވުމުގެ ޚަރަދުތައް ހަމަޖެއްސުމަށް ވަރަށް ބުރަކޮށް މަސައްކަތްކުރާ މީހެކެވެ. ޚާއްޞަކޮށް، ކުރިއަށް އޮތް ސްކޫލް ސީޒަނަށް ދަރިފުޅަށް ޔުނީފޯމް ގަތުމަށް ފައިސާ ހޯދުމަކީ އޭނާ އެވަގުތު އެންމެ ބޮޑަށް އިސްކަންދިން ކަންތަކެވެ.

މި ހިތާމަވެރި ހާދިސާއާ ގުޅިގެން އެ ސަރަހައްދުގެ އިސްވެރިން ވަނީ ސުންތޯންގެ އާއިލާއަށް ޒިޔާރަތްކޮށް ތައުޒިޔާ ކިޔާފައެވެ. އަދި އާއިލާއަށް އެހީތެރިވުމުގެ ގޮތުން 5،000 ބާތު (ގާތްގަނޑަކަށް 195 ސިންގަޕޫރު ޑޮލަރު) ގެ މާލީ އެހީއެއް ވެސް ވަނީ ފޯރުކޮށްދީފައެވެ.

އާއިލާގެ މައިގަނޑު އާމްދަނީ ހޯދައިދޭ މީހާ ވަކިވެގެން ދިއުމުން، ކުރިއަށް އޮތް ތަނުގައި ދިރިއުޅުމުގެ ކަންކަން ކުރިއަށް ގެންދާނެ ގޮތަކާ މެދު އާއިލާއިން ވަނީ ކަންބޮޑުވުން ފާޅުކޮށްފައެވެ.