ލޯކަލް ކައުންސިލް އިންތިޚާބުގެ ކެމްޕޭނަށް އއ. ތޮއްޑޫއަށް ކުރެއްވި ޒިޔާރަތެއްގައި، އެމްޑީޕީގެ ކުރީގެ ރައީސް, ރައީސް މުޙައްމަދު ނަޝީދު ވަނީ ރަށުގެ މުހިންމު ނިންމުންތައް ނިންމުމުގައި ރައްޔިތުންގެ ބައިވެރިވުން މިހާރަށްވުރެ ބޮޑުކުރަންޖެހޭ ކަމަށް ވިދާޅުވެފައެވެ.

ދާދި ދެންމެއަކު ތޮއްޑޫ ރައްޔިތުންނާ މުޚާޠަބު ކުރައްވައި ވާހަކަފުޅު ދައްކަވަމުން ނަޝީދު ވިދާޅުވީ، ރަށުގެ ތަރައްޤީއާއި އިޖުތިމާޢީ ކަންކަމުގައި ގޮތް ނިންމާއިރު ރައްޔިތުންގެ ފެންނަ ނުފެންނަ ވޯޓު ނެގުން އިތުރުކުރަންޖެހޭ ކަމަށެވެ.

ރައީސް ނަޝީދު ހުށަހެޅުއްވީ ރަށުގެ ކަންކަން ނިންމުމުގައި ވީހާވެސް ގިނަ ރައްޔިތުން ސާމިލްވާނެ މަގެއް ފަހިކުރުމަށެވެ.

އެގޮތުން، ހަމައެކަނި އިންތިޚާބަކުން މީހުން ހޮވުމުގެ ބަދަލުގައި، އަހަރު ދުވަހުގެ ތެރޭގައި ވެސް މުހިންމު ކަންކަމުގައި ރައްޔިތުންގެ ސީދާ ބަސް ހޯދުމަށް ފެންނަ ނުފެންނަ ވޯޓު ނެގުމަކީ ޑިމޮކްރަސީގެ ރޫޙާ އެއްގޮތަށް ކުރެވޭނެ ވަރަށް މުހިންމު ކަމެއްކަން އެމަނިކުފާނު ފާހަގަކުރެއްވިއެވެ.

މި ދަތުރުފުޅަކީ ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށާއި، ލާމަރުކަޒީ ނިޒާމުގެ ތެރެއިން ރަށްރަށަށް ބާރުތައް ދޫކޮށްލުމުގެ މުހިންމުކަން ރައްޔިތުންނަށް ހާމަކޮށްދެއްވުމަށް ކުރެއްވި ދަތުރުފުޅެކެވެ. ރަށުގެ ހުރިހާ ރައްޔިތުން މިފަދަ ނިންމުންތަކުގައި ބައިވެރިވުމަކީ ރަށުގެ ކުރިމަގު އުޖާލާވެގެންދާނެ ކަމެއް ކަމަށްވެސް ނަޝީދު ވިދާޅުވިއެވެ.