މިއީ ކުޑަކުއްޖަކު އޭނާގެ އެންމެ ގާތް އެކުވެރިޔާއާ އެކު ކުރިމަތިލީ ހިތްދަތި، ނަމަވެސް ހިތްވަރުގަދަ ވަގުތުކޮޅެއްގެ ވާހަކައެވެ.

ބަލިވެ އުޅޭ މި ކުޑަކުއްޖާއަށް ސީޓީ ސްކޭނެއް ހަދަން ޖެހުނު ނަމަވެސް، އެ ބޮޑު މެޝިނަށް އެކަނި ވަންނަން އޭނާ ހުރީ އިންތިހާއަށް ބިރުގަނެފައެވެ.

ދެ ތިން ގަޑިއިރު ވަންދެން މައިންބަފައިންނާއި ޑޮކްޓަރުން ކުރި މަސައްކަތުން ވެސް އޭނާއަށް އެއްބަސް ކުރުވޭ ގޮތެއް ނުވިއެވެ. ކުއްޖާގެ މޫނުމަތިން ފެންނަނީ ބިރުވެރިކަމާއި އެހީތެރިކަމަށް ބޭނުންވެފައިވާ ކަމުގެ އަސަރެވެ.

ނަމަވެސް، އެންމެ ފަހުން އެ ކުއްޖާގެ އެންމެ ގާތް އެކުވެރިޔާ ހޮސްޕިޓަލަށް ގެނައުމުން މުޅި މަންޒަރު ބަދަލުވެގެން ދިޔައެވެ. އެކުވެރިޔާ ފެނުމާއެކު އޭނާގެ ހިތުގައި އޮތް ބިރުވެރިކަން ފިލައިގެން ދިޔައީ ޖާދޫއެއް ފަދައިންނެވެ. އެހެންނަމަވެސް އޭނާގެ އޮތީ އެންމެ ޝަރުތެކެވެ. އެއީ "ދެމީހުން އެކުގައި ސީޓީ ސްކޭން ހަދަން" ދިއުމެވެ. މިއީ މުޅިން ނުވާނެ ކަމެއް ކަމަށް ހީވިޔަސް، އެންމެ ފަހުން ހޮސްޕިޓަލުގެ އެނދުގައި ފެނުނީ ހިތްތަކަށް އަސަރުކުރުވި ވަރަށް ތަފާތު މަންޒަރެކެވެ.

ދެ ކުދިން އެކުގައި، ގާތްގާތުގައި އެނދުގައި އޮށޯވެގެން ތިބެ، އެ ބޮޑު މެޝިނާ ކުރިމަތިލީ އެކަކު އަނެކަކަށް ހިތްވަރު ދެމުންނެވެ. މި މަންޒަރަކީ ހަގީގީ އެކުވެރިކަމުގެ މިސާލެކެވެ. އެކުވެރިކަމަކީ ހަމައެކަނި އުފަލުގައި ކުޅެލާފައި އުޅުމެއް ނޫނެވެ. އެއީ މީހާ ހާސްވެ، ކަންބޮޑުވާ ވަގުތުތަކުގައި އެކަކު އަނެކަކަށް އަލިކޮށްދޭ ބައްތިއަކަށް ވުމެވެ. ދުނިޔޭގެ ހުރިހާ އެކުވެރިކަމަކީވެސް މިފަދަ ސާފު އަދި ވަރުގަދަ ގުޅުމަކަށް ވެގެންދިއުމަކީ އަޅުގަނޑުމެންގެ އެދުމެވެ.