ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި މާލެ ސިޓީ ކައުންސިލްގެ ކުރީގެ މެންބަރު މުޙައްމަދު އައިމަން އިސްމާޢީލް 30 ދުވަހުގެ މުއްދަތަށް ބަންދުކުރުމަށް ކޯޓުން އަމުރުކޮށްފިއެވެ.

މާލެ ސިޓީ ކައުންސިލްގެ މާފަންނު ދެކުނު ދާއިރާގެ މެންބަރުކަން ކުރިން އަދާކުރަށްވާފައިވާ އައިމަން، މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންގޮސްފައިވަނީ މި ހިނގާ މަހުގެ 3 ވަނަ ދުވަހުއެވެ. އޭނާ ހައްޔަރުކުރުމަށްފަހު ބަންދާމެދު ގޮތެއް ނިންމުމަށްޓަކައި ކޯޓަށް ހާޒިރުކުރުމުން، ކޯޓުން ވަނީ އޭނާގެ ބަންދަށް 30 ދުވަސް ޖަހައިދީފައެވެ.

ފުލުހުންގެ ޚިދުމަތުން ބުނެފައިވަނީ، މި މައްސަލައިގެ ތަޙުޤީޤު މިހާރު ބާރަށް ކުރިއަށް ކަމަށެވެ. އަދި މި މައްސަލައިގައި އޭނާގެ މައްޗަށް ދަޢުވާ ކުރުމާ ގުޅޭގޮތުން ޕްރޮސެކިއުޓަރ ޖެނެރަލް (ޕީޖީ) ގެ އޮފީހާއެކު މިހާރު މަޝްވަރާތައް ކުރިއަށްދާ ކަމަށްވެސް ފުލުހުން ވަނީ ހާމަކޮށްފައެވެ.

މުޙައްމަދު އައިމަން އިސްމާޢީލަކީ 2014 ވަނަ އަހަރު ބޭއްވުނު ލޯކަލް ކައުންސިލް އިންތިޚާބުގައި އެމްޑީޕީގެ ޓިކެޓުގައި ވާދަކުރައްވައިގެން، މާލެ ސިޓީ ކައުންސިލްގެ މާފަންނު ދެކުނު ދާއިރާގެ ގޮނޑި ކާމިޔާބު ކުރައްވާފައިވާ ފަރާތެކެވެ.

ކުޑަކުދިންނަށް ކުރާ ޖިންސީ ގޯނާގެ މައްސަލަތަކަކީ ދިވެހިރާއްޖޭގެ ޤާނޫނުތަކުގެ ދަށުންނާއި އިސްލާމީ ޝަރީޢަތުގައި ވެސް ނުހަނު ބޮޑެތި އަދަބުތައް ކަނޑައެޅިފައިވާ، ސީރިއަސް މައްސަލަތަކެކެވެ. ފަހަކަށް އައިސް އިތުބާރުކުރެވޭ މަޤާމުތަކުގައިތިބޭ ފަރާތްތަކުން ކުޑަކުދިންނަށް ޖިންސީ ގޯނާކޮށްގެން ހުށައެޅޭ މައްސަލަތަކުގެ އަދަދު ވަނީ އިތުރުވެފައެވެ.