އިންސާނީ ހައްގުތަކާ ހިލާފުވުމުގެ ކުށުގައި ޖަލު ހުކުމް ތަންފީޒުކުރައްވަމުން ގެންދަވާ ޕެރޫގެ ކުރީގެ ރައީސް އަލްބަރޓޯ ފުޖިމޯރީ އުމުރުން 86 އަހަރުގައި އަވަހާރަވެއްޖެ އެވެ.

އިންސާނިއްޔަތާ ދެކޮޅަށް ހިންގި ޖަރީމާތަކުގެ ކުށުގައި 16 އަހަރު ޖަލުގައި ހޭދަކުރެއްވި ޕެރޫގެ ކުރީގެ ރައީސް އަލްބާޓޯ ފުޖިމޯރީ އަވަހާރަވީ ބުދަ ދުވަހު ލީމާގައި ހުންނަވަނިކޮށެވެ.

އެކްސްގައި ކުރި ޕޯސްޓެއްގައި އޭނާގެ ދަރިން، ކޭކޯ، ހިރޯ، ސަޗީ އަދި ކެންޖީ ފުޖިމޯރީ ލިޔެފައި ވަނީ އެމީހުންގެ ބައްޕަ ކެންސަރާ ހަނގުރާމަކުރާތާ އެތައް އަހަރެއް ފަހުން މި ދުނިޔެއާއި ވަކިވެފައިވާ ކަމަށެވެ.

1990 އިން 2000 އަށް ޕެރޫގެ ރައީސްކަން ކުރެއްވި ފުޖިމޯރީ ގެ ވެރިކަމުގައި އިންސާނިއްޔަތާ ހިލާފު ޖަރީމާތައް ހިންގި މައްސަލައިގައި އޭނާ އަށް 25 އަހަރުގެ ޖަލު ހުކުމެއް އިއްވިއެވެ. އޭނާ އަވަހާރަވީ މި ހުކުމުގެ ތިންބައިކުޅަ ދެބައި ތަންފީޒު ކުރި ފަހުންނެވެ.

މީގެ އެންމެ މަހެއްހާ ދުވަސް ކުރިން އޭނާގެ އަންހެން ދަރިފުޅު ކޭކޯ ވަނީ 2026 ވަނަ އަހަރު އޭނާގެ ބައްޕަ އަނެއްކާވެސް ރިޔާސީ އިންތިޚާބުގައި ވާދަކުރައްވާނެކަން އިއުލާން ކުރައްވާފައެވެ.