ސިނަމާލެ ބްރިޖު ހައިވޭގައި ދެ ސައިކަލު ޖެހި ހިނގި ނުރައްކާތެރި އެކްސިޑެންޓެއްގައި ތިން މީހަކަށް އަނިޔާވެ، އޭގެ ތެރެއިން އަންހެނެއްގެ އަތް ބިންދައިގެން ހިނގައްޖެއެވެ.

ދިވެހި ފުލުހުންގެ ޚިދުމަތުން ބުނީ، މި އެކްސިޑެންޓް ހިނގާފައިވަނީ ހައިވޭގެ މާލެއިން ހުޅުމާލެއަށް ދަތުރުކުރާ ފަޅީގައި ކަމަށެވެ. މި ހާދިސާގެ މަޢުލޫމާތު ފުލުހުންނަށް ރިޕޯޓްކޮށްފައިވަނީ އިއްޔެ ހަވީރު 16:55 ހާއިރު ކަމަށް ފުލުހުން މަޢުލޫމާތު ދެއެވެ.

ފުލުހުންގެ އިބްތިދާއީ ތަހުގީގުން އެނގިފައިވާ ގޮތުގައި، މި އެކްސިޑެންޓް ހިނގަން މެދުވެރިވީ ހައިވޭއިން ދަތުރުކުރި ސައިކަލެއް ކަހާލައިގެން ވެއްޓުނު ވަގުތު، ފަހަތުން އައި އެހެން ސައިކަލެއް އެ ސައިކަލުގައި ޖެހިގެންނެވެ.

މި ހާދިސާގައި އަނިޔާވި ތިން މީހުންނަށް ފަރުވާ ދިނުމަށްޓަކައި ވަގުތުން ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ވަނީ ގެންގޮސްފައެވެ. ފުލުހުން ބުނީ، އަނިޔާވި މީހުންގެ ތެރެއިން އެކަކީ އަންހެނެއް ކަމަށާއި، އޭނާގެ އަތް ބިންދައިގެން ގޮސް ހަށިގަނޑުގެ އެކި ތަންތަނަށް އެކިވަރުގެ އަނިޔާތައް ލިބިފައިވާ ކަމަށެވެ. އަދި އަނިޔާވި އަނެއް ދެ މީހުންނަށް ލިބުނު އަނިޔާތަކުގެ ތަފްސީލު އަދި މިހާތަނަށް ލިބިފައެއް ނުވެއެވެ.

މި އެކްސިޑެންޓާ ގުޅިގެން ބަލަންޖެހޭ އިތުރު ކަންކަން ފުލުހުން ދަނީ ތަހުގީގު ކުރަމުންނެވެ.