ދުބާއިން ތެލް އަވީވަށް ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް، އިޒްރޭލުގެ ބެން ގޫރިއަން އެއާޕޯޓަށް ނުވަތަ އެ ސިޓީގެ އުސް އިމާރާތަކަށް ވައްޓާލަން އުޅުނުކަމުގެ ތުހުމަތު ކުރެވޭ ކޯ-ޕައިލެޓްގެ ހަމަލާ ރޭވި ގޮތުގެ ތަފްސީލު އެމެރިކާ އަދި އިސްރާއީލުގެ މީޑިއާ ރިޕޯޓްތަކުން ހާމަވެއްޖެ އެވެ.

މިދިޔަ ސެޕްޓެމްބަރު މަހުގެ 30 ވަނަ ދުވަހު 180 އަށްވުރެ ގިނަ ފަސިންޖަރުންނާއެކު ދުބާއިން ފުރައިގެން ތެލް އަވީވަށް ދަތުރުކުރި ފްލައިދުބާއީގެ ފްލައިޓް FZ1073 ގައި ހިނގި މި ހާދިސާގައި، އޮމާނަށް ނިސްބަތްވާ ކޯ-ޕައިލެޓް ހަމާމް އަލް-ހައްމާމީ ވަނީ ކޮކްޕިޓްގައި ހުރި އެމަޖެންސީ ކޯރާޑިން އެ ފްލައިޓުގެ ކެޕްޓަން ސްމިތު މަޗާރަށް ހަމަލާދީ ބޮޑެތި ޒަހަމްތަކެއް ދީފަ އެވެ.

ކެޕްޓަނަށް ހަމަލާދިނުމަށްފަހު، ބޯޓު ނުރައްކާތެރި ދަށްވުމަކަށް ވައްޓާލައި އިޒްރޭލުގެ ވައިގެ ސަރަހައްދަށް ވަދެ، 11 ސެޕްޓެމްބަރު 2001 ގައި އެމެރިކާއަށް ދިން ފަދަ ޓެރަރިސްޓް ހަމަލާއެއް ދޭން ރޭވި ކަމަށް އޭނާ ތަހުގީގުގައި އެއްބަސްވެފައިވާ ކަމަށް ރިޕޯޓްތަކުގައި ބުނެފައިވެ އެވެ.

ނަމަވެސް، ބޯޓުގައި ތިބި ފަސިންޖަރުންނާއި އޮފް-ޑިއުޓީ ކްރޫއިންގެ ހުޝިޔާރުކަމާއެކު އޭނާ ވަގުތުން ހުއްޓުވައި، ބޯޓުގެ ކޮންޓްރޯލް އަތުލިއެވެ. އަދި ބޯޓު ވަނީ ސައޫދީ އަރަބިއްޔާގެ ތަބޫކް އެއާޕޯޓަށް ކުއްލި ހާލަތުގައި ޖައްސައިފަ އެވެ.

ޔުނައިޓެޑް އެރަބް އެމިރޭޓްސް (ޔޫއޭއީ)ގެ އެޓާނީ ޖެނެރަލް ހަމަދު ސައިފް އަލް ޝާމްސީ ވިދާޅުވީ، ކޯ-ޕައިލެޓް މަސައްކަތް ކުރީ "ޓެރަރިސްޓް އަމަލެއް" ހިންގަން ކަމަށެވެ.

މީގެ އިތުރުން، ކޯ-ޕައިލެޓް ހަމާމް މީގެ ކުރިންވެސް ތެލް އަވީވަށް ދަތުރުކުރި ފްލައިޓެއް ވައްޓާލަން ރޭވި ނަމަވެސް، އެ ބޯޓުގައި އޭނާ ދަންނަ މީހަކު ހުރުމުން އެކަން ނުކުރީ ކަމަށްވެސް އޭނާ ބުނެފައިވާ ކަމަށް ރިޕޯޓްތަކުގައިވެ އެވެ.

މި ހާދިސާއާއެކު ސަލާމަތީ ގޮތުން ބޮޑެތި އިހުމާލުތަކެއް ވަނީ ފާހަގަކުރެވިފަ އެވެ. ހާމަވެފައިވާ ގޮތުގައި، ހަމާމްގެ ހައްދުފަހަނައެޅި ވިސްނުމާ މެދު ކަންބޮޑުވުންތަކެއް ހުރުމުން އޮމާން އެއާއިން އޭނާ ބޯޓު ދުއްވުން މަނާކޮށް އިދާރީ ވަޒީފާއަކަށް ބަދަލުކޮށްފައި ވަނިކޮށް ފްލައިދުބާއީން އޭނާއަށް ވަޒީފާ ދިން ގޮތާމެދު ވަނީ ސުވާލު އުފެދިފަ އެވެ.

އަދި އިޒްރޭލާއެކު ރަސްމީ ގުޅުމެއް ނެތް ގައުމުތަކުގެ ޕައިލެޓުންނަށް އިޒްރޭލަށް ދަތުރުކުރުމުގެ ހުއްދަ ނޯންނައިރު، އޭނާއަށް އެ ފްލައިޓުގެ ހުއްދަ ލިބުނު ގޮތާމެދު އިޒްރޭލުގެ އިދާރާތަކުގެ މެދުގައިވެސް ވަނީ ބޮޑެތި ދެބަސްވުންތަކެއް އުފެދިފަ އެވެ.