ޣައްޒާ ސިޓީގެ ހުޅަނގުގައި ހުންނަ އާންމުން ދިރިއުޅޭ އެޕާޓްމަންޓް އިމާރާތަކަށް އިޒްރޭލުގެ ޓެރަރިސްޓް ސިފައިން ދިން ވަރުގަދަ ވައިގެ ހަމަލާއެއްގައި މަދުވެގެން ފަސް މީހުން ޝަހީދުވެ، އިތުރު ހަ މީހަކު ވަރަށް ބޮޑަށް ޒަޚަމްވެއްޖެއެވެ.

އަލްޝިފާ ހޮސްޕިޓަލުގެ މެޑިކަލް އޮފިޝަލުންނާ ހަވާލާދީ އަލްޖަޒީރާއިން ރިޕޯޓްކޮށްފައިވާ ގޮތުގައި، މި ހަމަލާ އަމާޒުކޮށްފައިވަނީ ހޮނިހިރު ދުވަހުގެ ފަތިހުގެ ވަގުތެއްގައި، ރިމާލް އަވަށުގައި ހުންނަ "އަލްއަޞާލާ" އިމާރާތަށެވެ. އެއްވެސް އިންޒާރަކާ ނުލައި ދިން މި ހަމަލާގައި ޝަހީދުވި މީހުންގެ ތެރޭގައި ހަތަރު އަންހެނުން ހިމެނޭއިރު، އޭގެ ތެރޭގައި އުމުރުން ދުވަސްވީ ކްރިސްޓިއަން އަންހެނަކާއި އޭނާގެ އަންހެން ދަރިފުޅު ވެސް ހިމެނެއެވެ.

ރިމާލް އަވަށަކީ ޣައްޒާގެ އެންމެ މީހުން ބޮޑަށް ތޮއްޖެހިފައިވާ އެއް ސަރަހައްދެވެ. އަދި ގެދޮރު ގެއްލިފައިވާ އެތައް ހާސް ބަޔަކު ވަގުތީ ޓެންޓުތަކާއި ކޭމްޕުތަކުގައި މި ސަރަހައްދުގައި ދަނީ ހިޔާވަހިކަން ހޯދަމުންނެވެ.

ޚާން ޔޫނިސްގައި ހުރެ ރިޕޯޓްކުރި އަލްޖަޒީރާގެ ނޫސްވެރިޔާ ހާނީ އަލްޝާޢިރު ބުނި ގޮތުގައި، މި ހަމަލާ ދީފައިވަނީ މީހުން ނިދާފައި ތިބި ވަގުތު ދަންވަރުގައެވެ. ހަނގުރާމަމަތީ ޖެޓްތަކުގެ އަޑު ގަދަވެގެން ދިޔުމަށްފަހު ފުލުފުލުގައި ތިން ހަމަލާއެއް ދިން ކަމަށާއި، މި ހަމަލާ ސީދާ އަމާޒުވީ މީހުން ދިރިއުޅޭ އެޕާޓްމަންޓަށް ކަމަށް އޭނާ ބުންޏެވެ.

މި ހަމަލާގެ ސަބަބުން އެ އެޕާޓްމަންޓް ފޫއަޅުވާލައި ތިރީ ފަންގިފިލާތަކަށް ވެސް ބޮޑެތި ގެއްލުންތަކެއް ލިބި، މުޅި އިމާރާތް ވަނީ ސުންނާފަތިވެފައެވެ. އަދި މި ހާދިސާއާ ގުޅިގެން ރޯވި އަލިފާންގަނޑު ކޮންޓްރޯލް ކުރެވުނީ ފަލަސްތީނުގެ ސިވިލް ޑިފެންސް ޓީމުތަކުން ގަޑިއެއްހާއިރު ކުރި މަސައްކަތުންނެވެ.

މަންޒަރު ދުށް ފަރާތްތަކުން މި ހާދިސާ ސިފަކޮށްފައިވަނީ ނުހަނު ބިރުވެރި އަދި ހިތްދަތި މަންޒަރެއްގެ ގޮތުގައެވެ. ގިނަ ބަޔަކު ކުނިބުނީގެ ދަށުވެފައިވަނީ ނިދާފައި ތިއްބައެވެ.

ސަރަހައްދު މަތިން އިޒްރޭލުގެ ޑްރޯންތަކާއި ހަނގުރާމަމަތީ މަތިންދާބޯޓުތައް އަދިވެސް އުދުހެމުންދާ ނުރައްކާތެރި ހާލަތުގައި ވެސް، ވެއްޓިފައިވާ އިމާރާތުގެ ދަށުގައި ތާށިވެފައި ތިބި މީހުންނާއި މަރުވެފައިވާ މީހުންގެ ހަށިގަނޑުތައް ހޯދުމުގެ މަސައްކަތް ސިވިލް ޑިފެންސް ޓީމުތަކުން ދަނީ ހުއްޓުމެއްނެތި ކުރަމުންނެވެ.