ވަޒީފާއާބެހޭ ޓްރައިބިއުނަލްގެ މެންބަރު އަދި ގާނޫނީ ވަކީލު ފާތިމަތު ސައުސަން، ބޭސްފަރުވާއަކަށް އިންޑިއާގައި ހުންނަވަނިކޮށް މިއަދު ނިޔާވެއްޖެއެވެ.

ސައުސަން ނިޔާވިކަމުގެ ހަބަރު ވަޒީފާއާބެހޭ ޓްރައިބިއުނަލުން ވަނީ ކަށަވަރުކޮށްދީފައެވެ.

ވަޒީފާއާބެހޭ ޓްރައިބިއުނަލްގެ ރައީސް އަމްޖަދު މުސްތަފާ މިއަދު ވިދާޅުވީ، މެންބަރު ސައުސަނަކީ އެ ޓްރައިބިއުނަލްގެ އިންޑަސްޓްރިއަލް ޑިސްޕިއުޓް ރިޒޮލިއުޝަން ޑިވިޒަންގައި މަސައްކަތްކުރެއްވި މެންބަރެއް ކަމަށެވެ. އޭނާ ނިޔާވިކަމުގެ މައުލޫމާތު ޓްރައިބިއުނަލަށް ލިބިވަޑައިގަތީ މިއަދު ހެނދުނު ކަމަށް އަމްޖަދު ހާމަކުރެއްވިއެވެ.

އަމްޖަދު ވިދާޅުވި ގޮތުގައި، ސައުސަން ނިޔާވީ ބޭސްފަރުވާއަކަށް އިންޑިއާއަށް ވަޑައިގެން އުޅުއްވަނިކޮށެވެ. ނަމަވެސް އޭނާ ނިޔާވި ސަބަބާ ގުޅޭ އިތުރު ތަފްސީލެއް އަމްޖަދު ހާމައެއް ނުކުރެއެވެ.

ފާތިމަތު ސައުސަން ވަޒީފާއާބެހޭ ޓްރައިބިއުނަލްގެ މެންބަރުކަމަށް އައްޔަންކުރެއްވީ 2024 ވަނަ އަހަރުގެ އޮކްޓޫބަރު މަހުގެ ދެވަނަ ދުވަހުއެވެ. އެނާ އައްޔަންކުރެއްވީ ޓްރައިބިއުނަލްގެ އިންޑަސްޓްރިއަލް ޑިސްޕިއުޓް ރިޒޮލިއުޝަން ޑިވިޒަނަށް ޚާއްސަކޮށެވެ.