ސަރުކާރުގެ ވުޒާރާތަކުން ކުރިއަށްގެންދާ މަސައްކަތްތަކާ ބެހޭ މަޢުލޫމާތު އާންމުންނާ ހިއްސާކުރުމަށް ބާއްވަމުން އަންނަ ”އަހާ“ ސިލްސިލާގެ 8 ވަނަ ފޯރަމް މާދަމާ ރޭ 9:00 ގައި ބޭއްވުމަށް ހަމަޖެހިއްޖެއެވެ.

ދެ ގަޑިއިރަށް ކުރިއަށްދާ މި ފޯރަމަކީ، ރައްޔިތުންގެ ހުރި ޝަކުވާތަކާއި ކަންބޮޑުވުންތަކަށް ސީދާ ޖަވާބުދެއްވުމަށް ސަރުކާރުން ހުޅުވާލާފައިވާ މުހިންމު ފުރުޞަތެކެވެ.

މި ފޯރަމަކީ ސަރުކާރުގެ އެކި ވުޒާރާތަކާއި އިދާރާތަކުގެ މަސައްކަތްތައް ވީހާވެސް ތަފްޞީލުކޮށް އާންމުންނާ ހަމައަށް ގެނެސްދިނުމުގެ މަޤްޞަދުގައި ރައީސުލްޖުމްހޫރިއްޔާގެ އޮފީހާއި ދައުލަތުގެ މީޑިއާ ގުޅިގެން ކުރިއަށްގެންދާ ޕްރޮގްރާމެކެވެ.

މާދަމާ ރޭގެ "އަހާ" ފޯރަމުގައި މަޢުލޫމާތު ދެއްވައި ސުވާލުތަކަށް ޖަވާބު ދެއްވުމަށް ހަމަޖެހިފައިވާ ބޭފުޅުންނަކީ އިޤުތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު، ދިފާޢީ އަދި ވަތަނީ ޚިދުމަތާ ބެހޭ ވަޒީރު ޙަސަން ރަޝީދު އަދި ބަންޑާރަނައިބު އަލްއުސްތާޛު އަޙްމަދު އުޝާމް އެވެ. މި ބޭފުޅުންނަކީ، އެބޭފުޅުންގެ ވުޒާރާތަކާއި އިދާރާތަކުގެ މަސައްކަތްތަކާ ގުޅޭގޮތުން ރައްޔިތުންނާ ސީދާ ބައްދަލުކުރައްވައި، ސަރުކާރުގެ ސިޔާސަތުތަކާއި ކުރިއަށް ހުރި މަސައްކަތްތަކުގެ މައްޗަށް އަލިއަޅުވައިލައްވާނެ ބޭފުޅުންނެވެ.

މި ފޯރަމުގައި ބައިވެރިވެ ވަޒީރުންނާ ސުވާލުކުރުމަށް، ފޯރަމް ކުރިއަށްދާ ތަނަށް ހާޒިރުވެ ސުވާލު ކުރުމުގެ ފުރުޞަތު އޮންނާނެއެވެ. މީގެ އިތުރުން، ފޯރަމް ކުރިއަށްދާ ވަގުތު، ފޭސްބުކް، އެކްސް އަދި ޕީއެސްއެމް އެއަރ އެޕްލިކޭޝަން މެދުވެރިކޮށްވެސް ވަޒީރުންނާ ސުވާލު ކުރެވޭނެ އިންތިޒާމު ވަނީ ހަމަޖައްސާފައެވެ. މިގޮތުން، ރާއްޖޭގެ ކޮންމެ ހިސާބެއްގައި ތިބި ރައްޔިތުންނަށްވެސް ފޯރަމުގައި ބައިވެރިވުމުގެ ފުރުޞަތު ލިބިގެންދާނެއެވެ.

މި ސިލްސިލާ ފޯރަމްތައް 2024 ވަނަ އަހަރުގެ ޖެނުވަރީ މަހުން ފެށިގެން އަންނަނީ ކުރިއަށް ގެންދަމުންނެވެ. ”އަހާ“ ފޯރަމްގެ އިތުރުންވެސް، ސަރުކާރުގެ މަސައްކަތްތަކުގެ މަޢުލޫމާތު ރައްޔިތުންނާ ވީހާވެސް ގާތުން ހިއްސާކުރުމަށް ގިނަ ޕްރޮގްރާމުތަކެއް އަންނަނީ ހިންގަމުންނެވެ. މީގެ މަޤްޞަދަކީ، ސަރުކާރުގެ ހިންގުމުގައި ޒިންމާދާރުކަން އިތުރުކޮށް، ރައްޔިތުންނަށް ދެވޭ ޚިދުމަތްތައް ހާމަކުރުމެވެ.