ހުޅުމާލޭ ދެވަނަ ފިޔަވަހީގެ އަމާން އުދަރެސް ޓަވަރެއްގައި އިއްޔެ ހިނގި އަލިފާނުގެ ހާދިސާއާ ގުޅިގެން ދިމާވި ފެނުގެ މައްސަލަތައް މިހާރު އެއްކޮށް ހައްލުކޮށްފައިވާ ކަމަށް، އެ ޓަވަރުތައް ބަލަހައްޓާ ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރު ހަމްދާން ޝަކީލް މިއަދު ވިދާޅުވެއްޖެއެވެ.

އޭނާ ވިދާޅުވީ މިހާރު ހުރިހާ އެޕާޓްމެންޓްތަކަށް ވެސް މައްސަލައެއް ނެތި ފެން ލިބޭނެ ކަމަށެވެ.

މި އަލިފާނުގެ ހާދިސާ ހިނގާފައިވަނީ އިއްޔެ، އަމާން އުދަރެސްގެ ފަސްވަނަ ޓަވަރުގެ ގްރައުންޑް ފްލޯގައި ހުރި ކުނިތަކެއްގައެވެ. ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެފްޑީސީން އިއްޔެ ވަނީ މައުލޫމާތު ދީފައެވެ.

ނަމަވެސް، އަލިފާނުގެ ސަބަބުން ޓަވަރުގެ ބައެއް ފެންހޮޅިތަކަށް ގެއްލުންވެ، އެ ހޮޅިތައް މަރާމާތުކުރުމުގެ މަސައްކަތް ފަށާފައިވާ ކަމަށް ރޭ އެ ކުންފުނިން ސޯޝަލް މީޑިއާގައި ބުނެފައިވެއެވެ. އޭރު އެފްޑީސީން ބުނީ، މި މަރާމާތުގެ މަސައްކަތް ނިމެންދެން އެ ޓަވަރުގެ ބައެއް ޔުނިޓުތަކަށް ފެނާއި ކަރަންޓުގެ ޚިދުމަތް މެދުކެނޑޭނެ ކަމަށެވެ.

މި މައްސަލައާ ގުޅޭގޮތުން މިއަދު ހަމްދާން ޝަކީލް ވިދާޅުވީ، އަލިފާނުގެ ސަބަބުން ފެންހޮޅިތަކަށް ދިމާވި ހުރިހާ މައްސަލަތަކެއް މިހާރު އެއްކޮށް ހައްލުކުރެވިފައިވާ ކަމަށެވެ. އޭނާ އިތުރަށް ވިދާޅުވީ، މިހާރު ނުނިމި ހުރީ ޓަވަރުގެ ބޭރުފުށުގައި އަލިފާނުގެ ދުމުގެ އަސަރުކޮށްފައި ހުރި ތަންތަނުގައި ކުލަލުމާއި އެފަދަ މަސައްކަތްތައް ކަމަށެވެ.

ސޯޝަލް މީޑިއާގައި އިއްޔެ ދައުރުވި ވީޑިއޯތަކުން ދައްކުވައިދޭ ގޮތުގައި، ކުނިތަކުގައި އަލިފާން ރޯވެފައި ހުރި ވަގުތު، ގިނަ ބަޔަކު އެއްވެފައި ތިއްބެވެ. އަދި ބައެއް މީހުން އަލިފާން ނިއްވޭތޯ މަސައްކަތްކޮށްފައިވެއެވެ.

ފުލުހުން އިއްޔެ ވަނީ މި ހާދިސާ ހިނގަން މެދުވެރިވި ސަބަބު ތަހުގީގު ކުރަމުން އަންނަ ކަމަށް ބުނެފައެވެ.