ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ އިސްނެގުމުގެ ދަށުން ހިންގާ "މަދިރިން ރައްކާ" ކެމްޕޭންގެ ދަށުން، މިއަދު ހެނދުނު ހުޅުމާލެ ފޭސް އެކެއްގެ ނެއިބަހޫޑް ތިނެއް ސަރަހައްދު ސާފުކޮށްފިއެވެ.

މި ހަރަކާތަކީ މަދިރި މަދުކުރުމާއި، މަދިރީގެ ޒަރިއްޔާއިން ފެތުރޭ ބަލިތަކުގެ ނުރައްކާ ކުޑަކުރުމުގެ މަޤްސަދުގައި ކުރިއަށްގެންދާ މަސައްކަތްތަކުގެ ބައެކެވެ.

މިއަދު ހެނދުނު ކުރިއަށްގެންދިޔަ ސާފުކުރުމުގެ މަސައްކަތުގައި ބައިވެރިވެފައި ވަނީ އެޗްޑީސީގެ ސްޓްރެޓީޖިކް މެނޭޖްމަންޓް، ސޭލްސް، ފައިނޭންޝަލް އޮޕަރޭޝަންސް، ކޮންޓްރެކްޓް މެނޭޖްމަންޓް އަދި ގުޅީފަޅު އޮޕަރޭޝަންސް ޑިޕާޓްމަންޓުގެ މުވައްޒަފުންނެވެ. އެޗްޑީސީން ވަނީ "މަދިރިން ރައްކާ" ޕްރޮގްރާމުގެ ދަށުން ހުޅުމާލޭގެ ބައެއް ސަރަހައްދުތައް ފޮގުކުރުމާއެކު ސާފުކުރުމުގެ މަސައްކަތް މީގެ ކުރިން ވެސް ކުރިއަށް ގެންގޮސްފައެވެ. މިގޮތުން، މިދިޔަ ދެ ހަފްތާއިން ފެށިގެން ކޮންމެ ހޮނިހިރު ދުވަހެއްގައި ވަކި ސަރަހައްދެއް ސާފުކުރުމުގެ މަސައްކަތް އެޗްޑީސީން އިސްނަގައިގެން ދަނީ ކުރަމުންނެވެ.

މި ޕްރޮގްރާމުގެ ދަށުން ކޮންމެ ހޮނިހިރު ދުވަހަކު ހުޅުމާލޭގެ އެކި ސަރަހައްދުތަކުގައި ސާފުކުރުމުގެ ހަރަކާތްތައް ކުރިއަށް ގެންދާނެ ކަމަށް އެޗްޑީސީން ވަނީ މީގެ ކުރިން ބުނެފައެވެ. މިއީ މުޖުތަމައުގެ ބައިވެރިވުން އިތުރު ކުރުމަށާއި، ތިމާވެށި ރައްކާތެރި ކުރުމުގެ ޒިންމާ އަށަގަންނެވުމަށް ކުރަމުންދާ މަސައްކަތްތަކުގެ ދަށުން ކުރިއަށް ގެންދެވޭ ހަރަކާތެކެވެ.

މަދިރި މަދު ކުރުމަށާއި، މަދިރީގެ ޒަރިއްޔާއިން ފެތުރޭ ބަލިތަކުގެ ނުރައްކާ ކުޑަކުރުމަށް އާންމުކޮށް ކުރިއަށްގެންދާ މަދިރި ކޮންޓްރޯލް ކުރުމުގެ ޕްރޮގްރާމުގެ ދަށުން މި އަހަރުގެ ޖެނުއަރީ މަހުން ފެށިގެން ޖުލައި މަހުގެ ނިޔަލަށް، ހުޅުމާލެ ފޭސް 1 އަދި ފޭސް 2 ގައި ވެސް ވަނީ އެޗްޑީސީން ގިނަ ހަރަކާތްތަކެއް ކުރިއަށް ގެންގޮސްފައެވެ.