އެމްޑީޕީން މިއަދު ފެށި އިންވެސްޓްމަންޓް ފޯރަމްގެ ސަބަބުން އިންވެސްޓަރުންނާއި ކައުންސިލްތަކާ ދެމެދު އޮތް ގުޅުމާއި އިތުބާރު ބަދަހިވެ، ހަރުދަނާ އިޤްތިޞާދެއް ބިނާކުރުމުގެ ބިންގާ އެޅިގެންދާނެ ކަމަށް އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ޢަބްދުﷲ ޝާހިދު ވިދާޅުވެއްޖެއެވެ.

"ރަށްވެހި ތަރައްޤީ އިންވެސްޓްމަންޓް ފޯރަމް" ގެ ނަމުގައި ކުރިއަށްގެންދާ މި ފޯރަމްގެ ތެރެއިން، ތަރައްޤީގެ 76 މަޝްރޫޢަކަށް އިންވެސްޓް ކުރުމުގެ ފުރުޞަތު މިއަދު ވަނީ ހުޅުވާލާފައެވެ.

މި ފޯރަމާ ގުޅޭގޮތުން ވާހަކަދައްކަވަމުން ޢަބްދުﷲ ޝާހިދު ވިދާޅުވީ، ވަރުގަދަ ޑިމޮކްރަސީއެއްގެ އެންމެ މުހިންމު އެއް އަސާސަކީ ރައްޔިތުންގެ ފުދުންތެރިކަމާއި ޤައުމުގެ އިޤްތިޞާދީ ދުޅަހެޔޮކަން ކަމަށެވެ. އަދި އެކަން ޙާޞިލުކުރެވޭނީ އިންވެސްޓްމަންޓްތަކަށް ފަހި މާޙައުލެއް ޤާއިމުކޮށްދީ، އިންވެސްޓަރުންގެ އިތުބާރު ހޯދިގެން ކަމަށްވެސް އެމަނިކުފާނު ފާހަގަކުރެއްވިއެވެ.

"އެމްޑީޕީގެ 5 ވަނަ ކޮންގްރެސްގެ ހަވާސާގައި މިހާރު ކުރިއަށްދާ އިންވެސްޓްމަންޓް ފޯރަމަކީ އިންވެސްޓަރުންނާއި ލޯކަލް ކައުންސިލްތަކާ ދެމެދު މިފަދަ ހަރުދަނާ ގުޅުމެއް ބިނާކޮށްދޭނެ މުހިންމު ފެށުމެއް. މި ފޯރަމްގެ އެންމެހައި ބައިވެރިންނަށް ކާމިޔާބީއަށް އެދެން،" ޝާހިދު ވިދާޅުވިއެވެ.

މި ފޯރަމަކީ ރަށްރަށުގެ ކައުންސިލްތަކުން ތަންފީޒުކުރުމަށް ރާވާފައިވާ ތަފާތު އެކި މަޝްރޫޢުތަކަށް ބޭނުންވާ އިންވެސްޓަރުން ހޯދައިދިނުމުގެ މަޤްޞަދުގައި ބާއްވާ ޚާއްޞަ ހަރަކާތެކެވެ. މިއީ ރާއްޖޭގެ ސިޔާސީ ޕާޓީއަކުން އިސްނަގައިގެން މިފަދަ އިންވެސްޓްމަންޓް ފޯރަމެއް އިންތިޒާމުކުރި ފުރަތަމަ ފަހަރުކަން ފާހަގަކޮށްލެވެއެވެ.