އިސްލާމީކަންތައްތަކާއި އައުޤާފާ ބެހޭ ވުޒާރާއިން ކޮންމެ އަހަރަކު ވެސް ސިލްސިލާކޮށް ބާއްވަމުން އަންނަ "މަޢުރިފާ" ފޮތް މައުރަޒު އިސްލާމީ މަރުކަޒުގެ ޖަލްސާކުރާ މާލަމުގައި ރަސްމީކޮށް ފަށައިފިއެވެ.

އިސްލާމިކް މިނިސްޓްރީން ބުނީ އޮކްޓޯބަރު 1 އިން 3 ގެ ނިޔަލަށް ކުރިއަށްދާ މި މައުރަޒު އިފްތިތާޙު ކޮށްދެއްވީ މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އެންޑް އެންޑައުމަންޓްސް ޑރ. މޫސާ އަންވަރު ޙަސަން ކަމަށެވެ. މި މައުރަޒު ކުރިއަށްދާނީ ކޮންމެ ދުވަހެއްގެ ވެސް ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ.

މިއަހަރުގެ މައުރަޒުގައި ޖުމްލަ 22 ފަރާތަކުން ބައިވެރިވެފައިވެއެވެ. އޭގެ ތެރޭގައި ރާއްޖޭގެ މަޝްހޫރު ބޮޑެތި ބުކްޝޮޕްތަކާއި، ޖަމްޢިއްޔާ ޖަމާޢަތްތަކާއި، ސަރުކާރުގެ މުއައްސަސާތަކުގެ އިތުރުން އަމިއްލަ ފޮތް ލިޔުންތެރިން ވެސް ހިމެނެއެވެ. މި މައުރަޒުން ކުޑަކުދިންގެ ވާހަކަފޮތްތަކާއި، ދިރާސާކުރާ ފަރާތްތަކަށް ޚާއްޞަ ފޮތްތަކާއި، ދިވެހިބަހުގެ ޢިލްމީ ފޮތްތައް ހިމެނޭހެން ތަފާތު އެކި ދާއިރާތަކުގެ ގިނަ އަދަދެއްގެ ފޮތްތައް ގަންނަން ލިބެން ހުންނާނެއެވެ.

އިސްލާމީކަންތައްތަކާއި އައުޤާފާ ބެހޭ ވުޒާރާ އިން ބުނީ އެވުޒާރާގެ ވަޒީރު، ޑރ. މުޙައްމަދު ޝަހީމް ޢަލީ ސަޢީދުވެސް މަޢުރިފާ ފޮތް މައުރަަޒަށް ޒިޔާރަތް ކުރަށްވާ މައުރަޒު ކުރިއަށްދާ ގޮތް ބައްލަވާލައްވާފައިވާ ކަމަށެވެ.

މި ފަހަރުގެ މައުރަޒަށް ގެނެވުނު މުޅިން އައު އަދި ޚާއްޞަ އެއް ކަމަކީ، ލިޔުންތެރިންގެ ތަޖުރިބާ ޙިއްޞާކުރުމަށް ޚާއްޞަކޮށްގެން ހަދާފައިވާ "ކޯނަރ" އެވެ. މި ކޯނަރގެ މައިގަނޑު މަޤްޞަދަކީ ލިޔުންތެރިންގެ ފޮތްތަކާ ގުޅޭ ތަޖުރިބާތައް ޢާންމުންނާ ޙިއްޞާކޮށް، ޒުވާން ޖީލުގެ ހިތްތަކުގައި ލިޔުންތެރިކަމާއި ފޮތް ކިޔުމަށް ލޯބި ޖެއްސުމެވެ. އެގޮތުން މި ކޯނަރގައި ޑރ. އާމާލް ޢަލީގެ ފޮތް ހުށަހެޅުއްވުމުގެ ޚާއްޞަ ސެޝަނެއް ވެސް ކުރިއަށްދާނެއެވެ.

މީގެއިތުރުން، މައުރަޒަށް ޒިޔާރަތްކުރާ ފަރާތްތަކުގެ މެދުގައި ޝައުޤުވެރިކަން އިތުރުކުރުމުގެ ގޮތުން ކޮންމެ ދުވަހަކު ވެސް ނަސީބުވެރި އެއް ފަރާތަކަށް 1،000 (އެއްހާސް) ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ. މި ގުރުއަތުލުން އޮންނާނީ މައުރަޒު ކުރިއަށްދާ ކޮންމެ ރެއެއްގެ 22:00 ގައެވެ.