ސާކް ޤައުމުތަކުގެ ޓިއުބަރކިއުލޮސިސް އެންޑް އެޗްއައިވީ އެއިޑްސް ސެންޓަރު ގެ 34 ވަނަ ގަވަރނިންގ ބޯޑު ބައްދަލުވުން ދިވެހިރާއްޖޭގައި ބާއްވައިފިއެވެ.

އެޗްޕީއޭއިން ބުނީ، މި ބައްދަލުވުން ކުރިއަށް ގޮސްފައިވަނީ މި ސެޕްޓެމްބަރު މަހުގެ 29 އިން 30 ގެ ނިޔަލަށް މާލޭގައި ކަމަށެވެ.

މި ބައްދަލުވުމުގެ މައިގަނޑު މަޤްޞަދަކީ ސާކް ސަރަޙައްދުގައި ޓީބީ އަދި އެޗްއައިވީ/އެއިޑްސް ކޮންޓްރޯލްކޮށް، އެ ބަލިތަކުން ރައްކާތެރިވުމަށްޓަކައި މެންބަރު ޤައުމުތަކުގެ މެދުގައި އޮތް ގުޅުން އިތުރަށް ބަދަހިކުރުމާއި، އެންމެން ގުޅިގެން ކުރާ މަސައްކަތްތައް ހަރުދަނާކޮށް ކުރިއަށް ގެންދިއުމެވެ. އެގޮތުން، މި ބައްދަލުވުމުގައި ސާކްގެ މެންބަރު ޤައުމުތަކުގެ މަންދޫބުން ބައިވެރިވެ، މި ދާއިރާއިން ސަރަޙައްދީ ފެންވަރުގައި ކުރެވިދާނެ މުހިންމު ކަންކަމާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ.

ފާއިތުވި ދެ އަހަރު ދުވަހު މި ސެންޓަރުގެ ގަވަރނިންގ ބޯޑުގެ ޗެއަރކަން ކޮށްފައިވަނީ ދިވެހިރާއްޖެއިންނެވެ. މި ދައުރުގައި ރާއްޖޭގެ ފަރާތުން ބޯޑުގެ ޗެއަރގެ ޒިންމާ އަދާކުރައްވާފައިވަނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ޑިރެކްޓަރ އޮފް ޕަބްލިކް ހެލްތު އަލްފާޟިލާ ސަނާ ސަލީމެވެ.

މި ބައްދަލުވުމަކީ ސަރަޙައްދީ ފެންވަރުގައި ޢާންމު ޞިއްޙަތު ރައްކާތެރިކުރުމަށާއި، ޓީބީ އަދި އެޗްއައިވީ/އެއިޑްސް ފަދަ ނުރައްކާތެރި ބަލިތައް ނައްތާލުމަށް ކުރެވޭ މަސައްކަތްތަކަށް ލިބުނު މުހިންމު ކުރިއެރުމެއް ކަމަށް އެޗްޕީއޭ އިން މަޢުލޫމާތު ދެއްވައެވެ.

އެސްޓީއޭސީގެ 34 ވަނަ ގަވަރނިންގ ބޯޑުގެ ބައްދަލުވުން ރާއްޖޭގައި ބާއްވާފައިވާއިރު، ރާއްޖޭގައި މިވަގުތު އެޗްއައިވީ ޖެހިފައިވާ 53 ދިވެހިން އެބަތިބި ކަމަށާއި، އޭގެ ތެރެއިން 22 މީހަކީ މިއަހަރު އަލަށް އެ ބައްޔަށް ޕޮޒިޓިވްވި މީހުން ކަމަށް ސަރުކާރުން ވަނީ ހާމަކޮށްފައެވެ.

ރާއްޖެއިން އެޗްއައިވީ ބަލިމީހެއް އެންމެ ފުރަތަމަ ފެނިފައިވަނީ މީގެ 35 އަހަރު ކުރިން، 1991 ވަނަ އަހަރުއެވެ. އޭގެފަހުން މިހާތަނަށް މިހާތަނަށް ޖުމްލަ 77 ދިވެއްސަކަށް އެޗްއައިވީ ޖެހިގެން ރިޕޯޓުކޮށްފައިވެއެވެ.