ފަހި ދިރިއުޅުން ކޯޕަރޭޝަނުން ހުޅުމާލޭ ދެވަނަ ފިޔަވަހީގައި ތަރައްގީ ކޮށްފައިވާ ފްލެޓްތަކުގެ ތެރެއިން ހުއްދަނެތި ކުއްޔަށް ދިނުމުގެ 16 މައްސަލައެއް ބަލަމުންދާ ކަމަށާއި، ގަވާއިދުން ކުލި ނުދައްކާ 564 ޔުނިޓެއް އެބަހުރި ކަމަށް އެ ކުންފުނިން ހާމަކޮށްފިއެވެ.

އެފްޑީސީން މީސްމީޑިއާގައި ހިއްސާކޮށްފައިވާ ތަފާސްހިސާބުތަކަށް ބަލާއިރު، މިދިޔަ މަހުގެ 21 ވަނަ ދުވަހާ ހަމައަށް އެ ކުންފުނީގެ 4،000 ހައުސިންގ ޔުނިޓާ ގުޅޭގޮތުން ޖުމްލަ 49 މައްސަލައެއް ވަނީ ހުށައަޅާފައެވެ. މީގެ ތެރޭގައި ހުއްދަނެތި އެޕާޓްމަންޓަށް ބަދަލު ގެނައުމާއި، އެހެން ފަރާތްތަކަށް ކުއްޔަށް ދިނުމާއި، ކުނި އެޅުމުގެ ގަވާއިދާ ޚިލާފުވުމުގެ އިތުރުން އަޑުގަދަވުމުގެ ޝަކުވާތައް ހިމެނެއެވެ.

ފްލެޓުތަކުގެ ކުލި ދެއްކުމުގެ ތަފާސްހިސާބުތަކަށް ބަލާއިރު، މަހުން މަހަށް ގަވާއިދުން ކުލި ދައްކަމުން ދަނީ 3،362 ޔުނިޓުންނެވެ. ނަމަވެސް، އެއްބަސްވުމާ އެއްގޮތަށް ގަވާއިދުން ކުލި ނުދައްކާ 564 ޔުނިޓެއް އަދިވެސް އެބައޮތް ކަމަށް އެފްޑީސީން ވަނީ ފާހަގަކޮށްފައެވެ.

ހުށަހެޅިފައިވާ މައްސަލަތަކުގެ ތެރެއިން އެންމެ ގިނައީ ހުއްދަ ނެތި ޔުނިޓުތަކުގެ އެތެރެއަށް އެކި ބަދަލުތައް ގެނައުމުގެ މައްސަލަތަކެވެ. މި ބާވަތުގެ 28 މައްސަލައެއް ހުށަހެޅިފައިވާއިރު، އޭގެ ތެރެއިން 5 މައްސަލައެއްގައި ޔުނިޓުގެ ވެރިފަރާތް ވަނީ ޖޫރިމަނާ ކޮށްފައެވެ.

ޔުނިޓްތަކަށް ދޫކޮށްފައިވާ ޖޫރިމަނާ އަދި އިންޒާރުގެ މަޢުލޫމާތު#fdc #fahidhiriulhun #amaanmujthamauakah #betterlivingbrighterfuture pic.twitter.com/7ylHJzPnn5

— Fahi Dhiriulhun Corporation Limited (@Fdc_mv) October 1, 2026

ހަމައެއާއެކު، އުސޫލާ ޚިލާފަށް ހުއްދަނެތި ކުއްޔަށް ދޫކުރުމުގެ 16 މައްސަލައިގެ ތެރެއިން 5 ޔުނިޓެއްގެ ވެރިފަރާތް ޖޫރިމަނާކޮށް، 2 ޔުނިޓަކަށް ނޯޓިސް ފޮނުވާފައިވާ ކަމަށާއި، އަދިވެސް އިތުރު 9 މައްސަލައެއް ތަހުގީގުކޮށް ބަލަމުން އަންނަ ކަމަށް އެފްޑީސީން މައުލޫމާތުދެއެވެ.

އެ ކުންފުނިން އިތުރަށް ބުނީ، ގަވާއިދާ ޚިލާފަށް ކުނި އެޅުމުގެ 3 މައްސަލައެއް ފާހަގަކުރެވި، އޭގެ ތެރެއިން 2 ފަރާތެއް ވަނީ ޖޫރިމަނާކޮށްފައެވެ. އަދި އެންގުންތަކަށް އަމަލު ނުކުރުމުގެ 2 މައްސަލައަކާއި، އަޑުގަދަކޮށް އުނދަގޫކުރުމުގެ 2 މައްސަލައެއްވެސް ބަލައި ފިޔަވަޅު އަޅާފައިވެއެވެ.