އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސް ފެށިގެން ދިޔައީ ވަރަށް ޣައިރު ޑިމޮކްރެޓިކް، އަންޕްރޮފެޝަނަލް އަދި ޖަނަވާރު އުޞޫލުން ކަމަށް ވިދާޅުވެ ޕީއެންސީގެ ނައިބު ރައީސް އަދި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު ފާޑުވިދާޅުވެއްޖެއެވެ.

ޝުޖާއު އެކްސްގައި ވިދާޅުވީ، ވެރިކަންކުރާ ޕީއެންސީގެ ކޮންގްރެސް ކުރިއަށް ދިޔައީ ރިވެތި ނަމޫނާ އާއި، ތަހުޒީބު އަދި ޒަމާނީ ޑިމޮކްރެޓިކް ޕްރޮފެޝަނަލް ކޮންގްރެސްއެއްގެ ގޮތުގައި ކަމަށެވެ. އަދި ރައްޔިތުން މި ލޮބުވެތި ޤައުމުގެ މުސްތަޤްބަލާމެދު ވިސްނާއިރު، ދެ ޕާޓީގެ ކޮންގްރެސްއިން ފެނިގެންދާ ތަފާތުތަކާމެދު ފުންކޮށް ނަޒަރު ހިންގަންޖެހޭ ކަމަށް އޭނާ ވިދާޅުވިއެވެ.

ރޭގެ ކޮންގްރެސް ފެށުމާއެކު ކޮންގްރެސްގެ ބައިވެރިން ރައީސް މުޢިއްޒުގެ އިސްތިއުފާއަށް ގޮވާލާފައިވާތީ ޝުޖާއު ވިދާޅުވީ، އެމްޑީޕީ އަކީ މި ޤައުމުގައި ހުރި ހުރިހާ ރިވެތި ސިފަތަކެއް ވެއްޔާ މޮޑެލައި، ހުތުރުވެގެންވާ ހުރިހާ ސިފަތަކެއް މުޖުތަމަޢުގައި ޢާންމުކުރި ޕާޓީ ކަމަށެވެ.

ޝުޖާއު މިހެން ވިދާޅުވެފައިވާއިރު، އެމްޑީޕީގެ ކޮންގްރެސް ރަސްމީކޮށް ރޭ ވަނީ ފަށާފައެވެ. މި މަހުގެ 3 ވާ އާދިއްތަ ދުވަހުގެ ނިޔަލަށް ކުރިއަށްދާ މި ކޮންގްރެސްގެ ފެށުމުގެ ޖަލްސާ ޝަރަފުވެރިކޮށްދެއްވީ އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދެވެ.

ކޮންގްރެސްގެ ހުޅުވުމުގެ ޖަލްސާއަށްފަހު، މާދަމާ މެންދުރުފަހު 14:00 ގައި އިންވެސްޓްމަންޓް ފޯރަމެއް ބޭއްވުމަށް ވަނީ ތާވަލުކުރެވިފައެވެ. ކައުންސިލްތަކުން ހުށަހަޅާ ތަރައްޤީގެ މަޝްރޫޢުތަކަށް އިންވެސްޓަރުން ހޯދުމުގެ މަޤްޞަދުގައި ބާއްވާ މި ފޯރަމްގައި ވެސް ރައީސް ނަޝީދު ވާހަކަފުޅު ދެއްކެވުމަށް ވަނީ ހަމަޖެހިފައެވެ.

އެމްޑީޕީން މަޢުލޫމާތު ދޭ ގޮތުގައި، ކޮންގްރެސްގެ މައިގަނޑު މަސައްކަތްތައް ފެށޭނީ މާދަމާ ހެނދުނުއެވެ. އެގޮތުން އެ ދުވަހު ޕާޓީގެ އަސާސީ ޤަވާޢިދަށް ހުށަހެޅިފައިވާ މުހިންމު އިޞްލާޙުތަކަށް ބަހުސްކުރުމާއި، އެ އިޞްލާޙުތަކަށް ވޯޓަށް އެހުން ކުރިއަށްދާނެއެވެ.