އިންޑިއާގެ ނިއުދިއްލީގައި ބޭއްވި ދުނިޔޭގެ ޞިއްޙަތު ޖަމްޢިއްޔާ (ޑަބްލިއުއެޗްއޯ) ގެ ދެކުނު އިރުމަތީ އޭޝިއާ ސަރަޙައްދީ ބައްދަލުވުމެއްގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބައިވެރިވެއްޖެއެވެ.

އެޗްޕީއޭއިން ބުނީ މި ސެޕްޓެމްބަރު މަހުގެ 29 އިން އޮކްޓޫބަރު މަހުގެ 1 ގެ ނިޔަލަށް ކުރިއަށްދިޔަ މި ބައްދަލުވުމަކީ "އެޑްވާންސިންގ ސެލްފް-ކެއަރ ފޯރ އިމްޕްރޫވިންގ ސެކްޝުއަލް އެންޑް ރީޕްރޮޑަކްޓިވް ހެލްތު" ގެ ނަމުގައި ކުރިއަށް ގެންދިޔަ މުހިންމު ބައްދަލުވުމެއް ކަމަށެވެ.

މި ބައްދަލުވުމުގެ މައިގަނޑު އަމާޒަކީ ދަރިމައިވުމުގެ ޞިއްޙަތާ ގުޅުންހުރި ޚިދުމަތްތައް ފަސޭހަކަމާއެކު ލިބޭނެ އިންތިޒާމު ހަމަޖެއްސުމާއި، ޢަމަލީ ގޮތުން ބޭނުންކުރެވޭނެ ފަދަ ގޮތަކަށް އެ ޚިދުމަތްތައް ބައްޓަން ކުރުމެވެ.

މީގެއިތުރުން ފެންވަރު ރަނގަޅު، އިތުބާރުހުރި ޚިދުމަތްތަކެއް ރައްޔިތުންނަށް ފޯރުކޮށްދިނުމަށްޓަކައި ޞިއްޙީ ދާއިރާ އިތުރަށް ހަރުދަނާކުރުމާ ގުޅޭގޮތުން ވެސް މި ބައްދަލުވުމުގައި ވަނީ ފުޅާ ދާއިރާއެއްގައި މަޝްވަރާ ކޮށްފައެވެ.

ހަމައެއާއެކު އަމިއްލަ ޞިއްޙަތަށް ފަރުވާތެރިވުމާއި، ޞިއްޙީ ރަނގަޅު އާދަތައް އަށަގަންނުވައިގެން ދަރިމައިވުމުގެ ޞިއްޙަތު ރަނގަޅު ފެންވަރެއްގައި ދެމެހެއްޓުމަށް ބާރުއެޅުމަކީ ވެސް މި ބައްދަލުވުމުގެ މުހިންމު އެއް މަޤްޞަދު ކަމަށް އެޗްޕީއޭއިން މަޢުލޫމާތު ދީފައިވެއެވެ.