ޖިނާއީ ބޮޑެތި މައްސަލަތަކުގައި ކުރިން ހައްޔަރުކުރި ދިވެއްސަކު މަކަރާއި ހީލަތުގެ މައްސަލައެއްގައި ހައްޔަރުކޮށްފިއެވެ.

ހ. ލާމިޔާ/މާލެ، އަހުމަދު އުވައިސް(22އ.) އެ މައްސަލައިގައި ހައްޔަރުކޮށްފައިވާ އިރު އޭނާ 15 ދުވަހަށް ކަސްޓޯޑިއަލް ޖަލެއްގައި ބަންދުކުރަން ކްރިމިނަލް ކޯޓުން މިއަދު ވަނީ އަމުރުކޮށްފައެވެ.

އޭނާއާ ދެކޮޅަށް އެކަށީގެންވާ ވަރަށް ހެކި ހުށަހަޅާފައިވާ އިރު އޭގެ ތެރޭގައި މައްސަލަ ހުށަހެޅި ފަރާތުގެ ބަޔާނާއި އަދި ފުޓޭޖްގެ ސްނެޕްޝޮޓް ހިމެނެއެވެ.

ނަމަވެސް އެ މައްސަލައިގެ ސީދާ ތަފްސީލެއް ހާމައެއް ނުކުރެއެވެ.

އުވައިސްއަކީ 2022 ވަނަ އަހަރު ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ)ގެ އޮފިސަރުންތަކަކަށް ހަމަލާ ދީގެން ހައްޔަރުކުރި މީހެކެވެ. އަދި 2024 ވަނަ އަހަރު ހިޔާ ފްލެޓަކުން އަންހެނަކު ރޮއި އެހީއަށް އެދުމުން ފުލުހުން ގޮސް އެތަނުން ވެސް އުވައިސް ހައްޔަރުކުރިއެވެ. އަދި މިދިޔަ ޖޫން މަހު އޭނާ ހައްޔަރުކުރީ ފުލުހުންގެ ބަންދުގައި ހުރި މީހަކު ފިލަން އެހީތެރިވި ކަމުގެ ތުހުމަތުގައެވެ.