ދުބާއީން އިޒްރޭލުގެ ތެލް އަވީވަށް ދަތުރުކުރި ފްލައިދުބާއީގެ ފްލައިޓް އެފް.ޒެޑް 1073 ގެ ކޯ-ޕައިލެޓް، ކެޕްޓަނަށް ވަޅިން ހަމަލާދީ ބޯޓު ވައްޓާލަން މަސައްކަތްކުރި ނުރައްކާތެރި ހާދިސާގައި، ބޯޓުން ދަތުރުކުރި 174 މީހުންގެ ފުރާނަ ސަލާމަތްކޮށްދިން އިންޑިއާގެ ކެޕްޓަން ސްމިތު މަޗާރަކީ "ހަޤީޤީ ބަޠަލެއް" ކަމަށް ބުނެ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އޭނާއަށް ތަޢުރީފުކޮށްފިއެވެ.

އިޒްރޭލުގެ އޮފިޝަލުން ހާމަކުރާ ގޮތުގައި، މި ހަމަލާއަކީ ބޯޓު އިޒްރޭލުގެ ވައިގެ ސަރަޙައްދާ ގާތްވަމުންދަނިކޮށް، ބޯޓު ވައްޓާލުމުގެ ނިޔަތުގައި ކޯ-ޕައިލެޓް ދިން ހަމަލާއެކެވެ. ދަތުރުމަތީގައި ކޯ-ޕައިލެޓް ދިން ވަޅީގެ ހަމަލާތަކުގެ ސަބަބުން ކެޕްޓަން މަޗާރަށް ބޮޑެތި ޒަޚަމްތަކެއް ލިބުނު ނަމަވެސް، އޭނާ ވަނީ ވަރަށް ހިތްވަރާއެކު ކޮކްޕިޓްގެ ދޮރު ހުޅުވައި، ފްލައިޓްގެ ކްރޫއިންނާއި ފަސިންޖަރުންނަށް ހަމަލާދިން މީހާ ހުއްޓުވުމުގެ ފުރުޞަތު ފަހިކޮށްދީފައެވެ.

މި ހާދިސާއާ ގުޅިގެން ބޮއިންގް 737 މެކްސް 8 މަރުކާގެ މި ބޯޓު ކުއްލި ޙާލަތުގައި ސަޢޫދީ ޢަރަބިއްޔާގެ ތަބޫކަށް ވަނީ ޖައްސާފައެވެ. ފްލައިޓް ރޭޑާގެ މަޢުލޫމާތުތަކުން ދައްކާ ގޮތުގައި އެންމެ މިނެޓެއްގެ ތެރޭގައި މި ބޯޓު ވަނީ 33،000 ފޫޓު މަތިން 17،000 ފޫޓަށް ތިރިވެފައެވެ. ބޯޓު ތަބޫކުގެ އެއާޕޯޓަށް ޖެއްސުމާއެކު، ސަޢޫދީގެ ކަމާބެހޭ އިދާރާތަކުން ވަނީ ހަމަލާދިން ކޯ-ޕައިލެޓް ހައްޔަރުކޮށް، މައްސަލައިގެ ތަޙުޤީޤު ފަށާފައެވެ.

ހަމަލާދިން ވަގުތު ކޮކްޕިޓަށް ވަދެ، އެ މީހާ ހިފަހައްޓައި ބޯޓުގެ ކޮންޓްރޯލް އަލުން ހޯދުމުގައި އިޒްރޭލުގެ ދެ ފަސިންޖަރުން ކަމަށްވާ ޔަނިވް ހަޔޫން އާއި އާސާފް ރަޖުއާން އެހީތެރިވިކަން އެމެރިކާގެ ކުރީގެ ރައީސް ޑޮނަލްޑް ޓްރަމްޕާއި ނަތަންޔާހޫ ވަނީ ފާހަގަކުރައްވާފައެވެ.

ތަބޫކުގެ ހޮސްޕިޓަލެއްގައި ފަރުވާދެމުންދާ ކެޕްޓަން މަޗާރުގެ ޙާލަތު މިހާރު ސްޓޭބަލް ކަމަށް ސަޢޫދީގައި ހުންނަ އިންޑިއާގެ އެމްބަސީން ވަނީ ޔަޤީންކޮށްދީފައެވެ. މި ހާދިސާއާ ގުޅިގެން ތަޙުޤީޤު ނިމެންދެން ފްލައިދުބާއީން އިޒްރޭލަށް ކުރާ ދަތުރުތައް ވަގުތީ ގޮތުން މެދުކަނޑާލާފައިވާއިރު، އިޒްރޭލުން ވަނީ އެ ޤައުމަށް އަންނަ ހުރިހާ ބޯޓުތަކެއްގެ ޕައިލެޓުންގެ ސެކިއުރިޓީ ޗެކްތައް އިތުރަށް ވަރުގަދަކުރާނެ ކަމަށް އިޢުލާނުކޮށްފައެވެ. އަދި ތަބޫކުގައި ތިބި ފަސިންޖަރުން މިހާރު ވަނީ ފްލައިދުބާއީގެ އެހެން ފްލައިޓެއްގައި ރައްކާތެރިކަމާއެކު ތެލް އަވީވަށް ގެންގޮސްދީފައެވެ.