ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ވެރިކަން ކުރާ ޕީއެންސީގެ ޕާލިމަންޓަރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހުގެ ނަމުގައި ޑޮލަރު ގަނެވިއްކާ ކުންފުންޏެއް އުފައްދަވާފައިވާކަން އޭނާގެ މާލީ ބަޔާނުން ހާމަވެއްޖެއެވެ.

ވިހިވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާން މަޖިލީހުގެ އިދާރާއިން އާންމުކޮށްފައިވާއިރު، ފަލާހުގެ މާލީ ބަޔާނުން އެނގޭ ގޮތުގައި މިދިޔަ އަހަރުގެ ތެރޭގައި އޭނާ ވަނީ ދެ ކުންފުންޏެއް އަލަށް އުފައްދަވާފައެވެ. އެއީ "ސަން ކަރަންސީ އެކްސްޗޭންޖު" ގެ ނަމުގައި އުފެއްދެވި ބޭރު ފައިސާ ގަނެވިއްކާ ކުންފުންޏަކާއި، "ސަން ކްރަފްޓް ކޮންސްޓްރަކްޝަން" ގެ ނަމުގައި އުފައްދާފައިވާ ކޮންސްޓްރަކްޝަން މަސައްކަތްކުރާ ކުންފުންޏެކެވެ. މި ދެ ކުންފުނީގެ ވެސް 90 ޕަސެންޓް ހިއްސާ އޮންނަނީ ފަލާހުގެ ނަމުގައެވެ. މީގެ އިތުރުން ވެސް އޭނާއަކީ އިތުރު ތިން ކުންފުންޏެއްގެ ހިއްސާދާރެކެވެ.

ފަލާހު ހުށަހެޅުއްވި މާލީ ބަޔާނުގައިވާ ގޮތުން، މަޖިލިސް މެންބަރެއްގެ ގޮތުގައި މުސާރައިގެ ގޮތުގައި މިދިޔަ އަހަރު އޭނާއަށް 990،000 ރުފިޔާ ލިބިފައިވެއެވެ. އަދި ވިޔަފާރީގެ ފައިދާގެ ގޮތުގައި މިދިޔަ އަހަރު 1.8 މިލިއަން ރުފިޔާ އަދި ކުލީގެ ގޮތުގައި 2.8 މިލިއަން ރުފިޔާ ލިބިފައިވާ ކަމަށް ވެސް ބަޔާނުގައި ވެއެވެ. މީގެ އިތުރުން، މިދިޔަ އަހަރުގެ ތެރޭގައި ފަލާހު ވަނީ ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް 15 މިލިއަން ރުފިޔާގެ ލޯނެއް ވެސް ނަގާފައެވެ.

ފަލާހުގެ މާލީ ބަޔާނުގައި ބަޔާންކޮށްފައިވާ ގޮތުގައި ފަލާހުގެ ނަމުގައި ޖުމްލަ ފަސް ބިމެއް ރަޖިސްޓްރީ ކުރެވިފައިވެއެވެ. އޭގެ ތެރޭގައި މިދިޔަ އަހަރު 21 މިލިއަން ރުފިޔާއަށް ހުޅުމާލެއިން ގަނެފައިވާ ބިމަކާއި، މާލެއިން ހަތަރު މިލިއަން ރުފިޔާއަށް ގަނެފައިވާ މ. އަސުރުކުރި ހިމެނެއެވެ. އަދި އޭނާގެ އުފަން ރަށް، ރ. އިންނަމާދޫގައި އޮންނަ ފަލަކް، ފަތް، އަދި އަސުރުހިޔާ މި ތިން ބިން ވެސް ހިމެނެނީ ފަލާހުގެ މިލްކިއްޔާތުގެ ގޮތުގައެވެ.

މެންބަރުންގެ މާލީ ހާލަތު ދެނެގަތުމަށްޓަކައި ގާނޫނުއަސާސީ އާއި މަޖިލީހުގެ ގަވާއިދު ލާޒިމްކުރާ މާލީ ބަޔާންތައް މަޖިލީހުގެ ވެބްސައިޓުގައި މިހާރު ވަނީ އާންމުކޮށްފައެވެ. ރައްޔިތުންގެ މަޖިލީހުން ހާމަކޮށްފައިވާ ގޮތުގައި، މާލީ ބަޔާން ހުށަހެޅުމަށް ކަނޑައެޅި ސުންގަޑި ކަމަށްވާ އޮގަސްޓް މަހުގެ 31 ގެ ނިޔަލަށް މަޖިލީހުގެ 93 މެންބަރުންގެ ތެރެއިން 91 މެންބަރުން ވަނީ ގަވާއިދުން މާލީ ބަޔާން ހުށަހަޅުއްވާފައެވެ.

މަޖިލީހުން އާންމުކޮށްފައިވާ އުސޫލުތަކަށް ބަލާއިރު، މާލީ ބަޔާނުގައި އަހަރެއްގެ ތެރޭގައި ލިބުނު އާމްދަނީއާއި ކުރި ޚަރަދުތަކާއި، މިލްކިއްޔާތުގައިވާ ބިމާއި އިމާރާތް، ވިޔަފާރި، ޙިއްޞާ، އަދި ބޭންކު އެކައުންޓްތަކުގައިވާ ފައިސާގެ ތަފުސީލު ހިމަނަންޖެހެއެވެ. މީގެއިތުރުން، އަމިއްލަ ނަމުގައި ހުރި ދަރަންޏާއި ލޯނުތަކާއި، ނަގުދު ފައިސާ ހުރި އަދަދާއި، ވިއްކާލާފައިވާ މުދަލުގެ ތަފުސީލު އަދި އިންޓެލެކްޗުއަލް ޕްރޮޕަޓީގެ ގޮތުގައި ބެލެވޭ އެއްޗެއްސާ ގުޅޭ ތަފުސީލުތައް ވެސް މި ބަޔާނުގައި ހިމެނުން ލާޒިމުކުރެއެވެ. ހަމައެއާއެކު، މެންބަރުގެ އަނބިކަނބަލުން ނުވަތަ ފިރިކަލުން އަދި 18 އަހަރު ނުފުރޭ ދަރިންގެ މާލީ މަޢުލޫމާތާއި މިލްކިއްޔާތުގެ ތަފުސީލުތައް ވެސް މި މާލީ ބަޔާނުގެ ދަށުން ހުށަހަޅަންޖެހޭ ކަމަށް މަޖިލީހުގެ ގަވާއިދުގައި ބަޔާންކޮށްފައިވެއެވެ.

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 84 ވަނަ މާއްދާއާއި ރައްޔިތުންގެ މަޖިލީހުގެ ޤަވާއިދުގައި ބަޔާންކޮށްފައިވާ ގޮތުން، މަޖިލިސް މެންބަރުން މަޤާމާ ޙަވާލުވުމަށްފަހު އަދި ކޮންމެ އަހަރަކު އެއްފަހަރު އެ މެންބަރެއްގެ މާލީ ބަޔާން ތައްޔާރުކޮށް މަޖިލީހުގެ އަމީން ޢާންމަށް ހުށަހަޅަންޖެހެއެވެ.