ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އަލުން އަނބުރާ ޖަލަށްލުމަށް ދައުލަތުން ވަރަށް ބޮޑަށް މަސައްކަތް ކުރަމުންދާ ކަމަށް އެމަނިކުފާނުގެ އިސް ވަކީލު އަދި ކުރީގެ ނައިބު ރައީސް ޑރ. މުޙައްމަދު ޖަމީލް އަޙްމަދު ތުހުމަތު ކުރަށްވައިފިއެވެ. ޖަމީލް މިހެން ވިދާޅުވީ ވ. އާރަށުގެ ޚިޔާނާތާއި މަނީ ލޯންޑްރިންގ މައްސަލައިގެ ޝަރީޢަތް އަލުން ފެށުމާ ގުޅިގެން، ހޯމަ ދުވަހު ކްރިމިނަލް ކޯޓުގައި ބޭއްވި އަޑުއެހުމަށްފަހު ކޯޓުން ބޭރުގައި ބައެއް މީޑިއާތަކަށް މަޢުލޫމާތު ދެއްވަމުންނެވެ.

ޑރ. ޖަމީލް މިހެން ވިދާޅުވެފައިވާއިރު، އެމްއެމްޕީއާރުސީ މެދުވެރިކޮށް ރަށްތައް ދޫކުރުމާ ގުޅޭ ދެ މައްސަލައެއް ޔާމީންގެ މައްޗަށް ކޯޓުތަކުގައި ދަނީ ހިނގަމުންނެވެ. އެއީ ވ. އާރަށާއި ރ. ފުއްގިރި ކުއްޔަށް ދޫކުރުމުގައި ރިޝްވަތު ހިފުމާއި މަނީ ލޯންޑްރިންގ ހިންގި ކަމަށް ބުނާ މައްސަލަތަކެވެ. އާރަށު މައްސަލައިގައި ކްރިމިނަލް ކޯޓުން ޑިސެމްބަރު 2022 ގައި ޔާމީންގެ މައްޗަށް 11 އަހަރުގެ ޖަލު ޙުކުމެއް އިއްވި ނަމަވެސް، ހައިކޯޓުން ވަނީ އެ ޙުކުމް ބާތިލުކޮށް އަލުން މައްސަލަ ބެލުމަށް އަމުރުކޮށްފައެވެ. އަދި ދައުލަތުން ހުށަހެޅި އާ ހެކިތަކެއް ބަލައިނުގަނެވޭނެ ކަމަށް ހައިކޯޓުން ނިންމި ނިންމުމަށް ސުޕްރީމް ކޯޓުން ވެސް ވަނީ ތާއީދުކޮށްފައެވެ.

ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފައިވަނީ އާރަށު މައްސަލައިގެ ޝަރީޢަތުގެ ކުރިން ހުށަހަޅާ ހުށަހެޅުންތަކާ ގުޅޭ އަޑުއެހުމެކެވެ. މި އަޑުއެހުމަށްފަހު ވާހަކަދައްކަވަމުން ޑރ. ޖަމީލް ވިދާޅުވީ، ރައީސް ޔާމީނާ ދެކޮޅަށް ދައުލަތުން ވަކިގޮތަކަށް ކަންތައްތައް ކުރަން ބޭނުންވެފައިވާކަން މިއަދުގެ ޝަރީޢަތުން ފެނިގެންދިޔަ ކަމަށެވެ. އަދި ކުށެއް ސާބިތުނުވާހާ ހިނދަކު ކުށެއް ނެތް މީހެއްގެ ގޮތުގައި ބެލުން ފަދަ ޤާނޫނުއަސާސީން ލިބިދޭ ރައްކާތެރިކަމަށް ދައުލަތުން ރިޢާޔަތް ނުކުރާ ކަމަށް ވެސް އޭނާ ތުހުމަތުކުރެއްވިއެވެ.

ހަމައެއާއެކު، މި މައްސަލަތަކުގައި ރައީސް ޔާމީން ވޭތުވެދިޔަ އަށް އަހަރު ހޭދަކުރަށްވާފައިވާ ކަމަށާއި، މައްސަލަތައް މިހާ ދިގުލައިގެން ދިއުމުން މިކަމަކީ ދައުލަތުގެ މުއައްސަސާތަކުން ގުޅިގެން ހިންގާ ކަމެއްކަން ބެލެވޭ ކަމަށް ޖަމީލް ވިދާޅުވިއެވެ. އަދި ޝަރީޢަތް އަލުން ފެށިގެން ދިއުމަކީ ދައުލަތުން، ރައީސް ޔާމީނާމެދު ގެންގުޅޭ ވިސްނުން ހާމަވާ ކަމެއް ކަމަށްވެސް ޖަމީލް ތުހުމަތު ކުރެއްވިއެވެ.

ޖަމީލް ވިދާޅުވީ، ޝަރީޢަތުގެ ކުރިން ހުށަހަޅާ ހުށަހެޅުންތަކާ މެދު ގޮތެއް ނިންމުމަށް އަންނަ އޮކްޓޫބަރު 12 ވަނަ ދުވަހަށް އަޑުއެހުމެއް ތާވަލުކޮށްފައިވާ ކަމަށާއި، މިއިން ދޭހަވަނީ އިތުރު މެދުކެނޑުމެއް ނެތި މައްސަލަ ކުރިއަށް ގެންދަން ކޯޓުން ބޭނުންވާކަން ކަމަށެވެ.

މިއަދުގެ އަޑުއެހުމުގައި ދައުލަތުން ވަނީ، ރައީސް ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާ ކަމަށް ދިފާޢުން ބުނާ ވާހަކައަށް ބާރުދޭން ހުށަހެޅި ހެކިތައް ބަލައި ނުގަތުމަށް ކޯޓުގައި އެދިފައެވެ.