ސޯޝަލް މީޑިއާގައި އާޓިފިޝަލް އިންޓެލިޖެންސް (އޭއައި) ނަހަމަ ގޮތުގައި ބޭނުންކޮށްގެން ފޭކް ވީޑިއޯއާއި އަޑު އުފައްދާ މައްސަލައިގައި ބޮލީވުޑްގެ މަޝްހޫރު ތަރި ސަލްމާން ޚާން ކަންބޮޑުވުން ފާޅުކޮށް، ސޯޝަލް މީޑިއާ ސެންސަރުކުރުމަށް ގާނޫނެއް ހަދަން ގޮވާލައިފިއެވެ.

ރިއަލިޓީ ޝޯ "ބިގް ބޮސް 20" ގެ އެންމެ ފަހުގެ އެޕިސޯޑުގައި ވާހަކަދައްކަމުން މި ޝޯގެ ހޯސްޓް ސަލްމާން ޚާން ބުނީ، އޭނާގެ ނަމާއި ސިފަ ބޭނުންކޮށްގެން ވެސް އޭއައި ޑީޕްފޭކް ވީޑިއޯތައް ހަދަމުންދާ ކަމަށެވެ. އަދި އިންޓަނެޓުގައި މީހުންނަށް ފުރައްސާރަކުރުމާއި ބުލީކުރުން މިހާރު އިތުރުވެފައިވާއިރު، އޮންލައިންކޮށް ކޮންޓެންޓް ހަދައި ހިއްސާކުރާ ފަރާތްތައް ޖަވާބުދާރީ ކުރުވަން ޖެހޭ ކަމަށް އޭނާ ބުންޏެވެ.

"މީހަކު އޭއައި ވީޑިއޯއެއް ހެދުމަކީ ނުވަތަ އަޑު ބަދަލުކުރުމަކީ ވަރަށް ގޯސް ކަމެއް. އޭއައި ކުރިއަރާފައިވާ މިންވަރު ފެނިފައި ވަރަށް ބިރުގަނޭ. މިއީ ވަރަށް ސީރިއަސް މައްސަލައެއް. ތިބާ ބުނާ އެއްޗެއް އޭއައި ބޭނުންކޮށްގެން އެޑިޓްކޮށް، އެހެން މީހުންނަށް ހަޑިހުތުރު ބަސްތައް ބުނާ ކަމަށް ދައްކާ. އެތައް ބައެއްގެ އިތުރުން އަހަރެންގެ އޭއައި ވީޑިއޯތައް ވެސް ދަނީ ހަދަމުން،" ސަލްމާން ބުންޏެވެ.

އޮޅުމަކުން މިފަދަ ތަކެތި ޝެއާކުރާ މީހުންނާއި، ގަސްދުގައި ދޮގު ކޮންޓެންޓް އުފައްދާ މީހުންގެ ތަފާތު ފާހަގަކުރަމުން ސަލްމާން ބުނީ، އެއީ ފޭކް އެއްޗެއްކަން އެނގިތިބެ އެފަދަ ވީޑިއޯތައް އުފައްދާ މީހުން ޖަލަށް ލާންޖެހޭ ކަމަށެވެ. މިފަދަ އެކަކު ނުވަތަ ދެމީހަކު ހައްޔަރުކޮށްގެން ނޫނީ މިކަން ނުހުއްޓުވޭނެ ކަމަށާއި، މި މައްސަލައާ މެދު އޭނާ ވަރަށް ސީރިއަސްކޮށް ފިޔަވަޅު އަޅާނެ ކަމަށް ވެސް އޭނާ ފާހަގަކުރިއެވެ.

މީގެއިތުރުން، މަޝްހޫރު މީހުންނަށް ސައިބާ ސެލްތައް މެދުވެރިކޮށް މިފަދަ މައްސަލަތައް ބެލުމުގެ ފުރުސަތު އޮތް ނަމަވެސް، އާންމު ރައްޔިތުންނަށް މިފަދަ ހަމަލާތަކުން ސަލާމަތްވުމަށް ވަސީލަތްތައް ނުހުންނަކަން ސަލްމާން ފާހަގަކުރިއެވެ. މީގެ ކުރީގެ އެޕިސޯޑެއްގައި ވެސް އޭނާ ވަނީ ސޯޝަލް މީޑިއާގައި މަޝްހޫރު ތަރިންނަށް ޒާތީ ގޮތުން ފުރައްސާރަކުރުމާއި 'ބޮޑީ ޝޭމް' ކުރުމާ ދެކޮޅަށް ވާހަކަދައްކާފައެވެ.