މެލޭޝިއާގެ ކުރީގެ ބޮޑުވަޒީރު ތުން ޑރ. މަހާތީރު މުޙައްމަދުގެ އަނބިކަނބަލުން ތުން ޑރ. ސިތީ ހަސްމާ މުޙައްމަދު ޢަލީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާގެ މެސެޖެއް ފޮނުއްވައިފިއެވެ.

މި ހިތާމަވެރި ޚަބަރާ ގުޅިގެން ރައީސުލްޖުމްހޫރިއްޔާ ފޮނުއްވި މެސެޖުގައި، އެކަމަނާ އަވަހާރަވި ޚަބަރު އެއްސެވީ ފުން ހިތާމައާއެކު ކަމުގައި ވިދާޅުވިއެވެ. އަދި ޑރ. ސިތީ ހަސްމާއަކީ މެލޭޝިއާގެ އެންމެ ފުރަތަމަ އަންހެން ޑޮކްޓަރުންގެ ތެރޭގައި ހިމެނިވަޑައިގަންނަވާ، ޤައުމަށް އަގުހުރި ޚިދުމަތްތަކެއް ކޮށްދެއްވި ބޭފުޅެއްކަން ފާހަގަކުރެއްވިއެވެ. ޚާއްޞަކޮށް މައިންގެ ޞިއްޙަތު ރަނގަޅުކުރުމަށާއި، ރަށްފުށުގެ އަންހެނުން ކުރިއެރުވުމަށް އެކަމަނާ ކޮށްދެއްވި އަގުނުކުރެވޭ ފަދަ ޚިދުމަތްތަކަކީ އަބަދުވެސް ޤަދަރާއެކު ހަނދާންކުރެވޭނެ އަދި އޭގެ ފައިދާ ދެމިގެންދާނެ ކަންކަން ކަމުގައި ރައީސް ވިދާޅުވިއެވެ.

މީގެއިތުރުން، ޖެންޑަރ ހަމަހަމަކަމާއި ޢާއިލީ ދުޅަހެޔޮކަމަށް އެކަމަނާ އިސްނަންގަވައިގެން ކުރެއްވި މަސައްކަތްޕުޅުތަކަކީ މުޖުތަމަޢަށް ޚިދުމަތްކުރުމަށާއި އަންނަން އޮތް ޖީލުތައް ބާރުވެރިކުރުވުމަށް އެކަމަނާގެ މުޅި ޙަޔާތްޕުޅުގައި ދެއްވި އަހައްމިއްޔަތުކަން ރަމްޒުކޮށްދޭ ކަމެއް ކަމަށްވެސް ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވިއެވެ.

ދިވެހި ސަރުކާރާއި ރައްޔިތުންގެ ނަމުގައި، ރައީސުލްޖުމްހޫރިއްޔާ ވަނީ ޑރ. މަހާތީރު މުޙައްމަދަށާއި އެމަނިކުފާނުގެ ޢާއިލާއަށް އިޚްލާޞްތެރި ތަޢުޒިޔާ ދަންނަވާފައެވެ. އަދި މި ބޮޑު ހިތާމައިގެ ވަގުތުގައި ޢާއިލާއަށާއި ހިތާމައިގައި ބައިވެރިވާ އެންމެހައި ފަރާތްތަކަށް ކެތްތެރިކަން މިންވަރުކޮށްދެއްވުން އެދިވަޑައިގެންނެވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވަމުން، އެކަމަނާގެ ޙަޔާތްޕުޅާއި ޚިދުމަތްތަކުގެ ފޮނި ހަނދާންތަކުން ޢާއިލާއަށާއި މެލޭޝިއާގެ އެތައް ރައްޔިތުންނަކަށް ހިތްހަމަޖެހުމާއި ތަސައްލީ ލިބޭނެ ކަމަށް އުއްމީދުކުރައްވާ ކަމަށް ވިދާޅުވިއެވެ. އަދި މާތް ﷲ އެކަމަނާގެ ހެޔޮ ޢަމަލުތައް ޤަބޫލުކުރައްވައި، ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާ ދެންނެވިއެވެ.