ކަނޑައެޅިފައިވާ އުސޫލުތަކާ ޚިލާފަށް ވިލިމާލޭ ފަޅު ބޭނުންކުރަމުންދިޔަ 12 އުޅަނދެއް ފާހަގަކޮށް، އެ އުޅަނދުތަކުގެ ވެރިފަރާތްތައް ޖޫރިމަނާކޮށްފައިވާ ކަމަށް މާލެ ސިޓީ ކައުންސިލުން ހާމަކޮށްފިއެވެ.

މާލެ ސިޓީ ކައުންސިލުން މިއަދު ބުނީ، ވިލިމާލޭ ފަޅުތެރެ ތަރުތީބުކޮށް، އަމާން އަދި ލުއިފަސޭހަ ތަނެއްގެ ގޮތުގައި ބެލެހެއްޓުމަށްޓަކައި ހާއްސަ މަސައްކަތްތަކެއް ފަށާފައިވާ ކަމަށެވެ. އެގޮތުން ކުރިއަށްގެންދިޔަ ހަރަކާތްތަކުގެ ތެރެއިން، ގަވާއިދާ ޚިލާފަށް އަޅާފައިވާ އުޅަނދުތައް ބަލައި ފާސްކޮށް، މިހާތަނަށް 12 އުޅަނދަކާމެދު ފިޔަވަޅު އަޅައި ޖޫރިމަނާ ކޮށްފައިވާ ކަމަށް ކައުންސިލުން މައުލޫމާތު ދެއެވެ.

ސިޓީ ކައުންސިލުން އިތުރަށް ފާހަގަކުރި ގޮތުގައި، ޖޫރިމަނާކުރެވުނު އުޅަނދުތަކަކީ އެއްވެސް ހުއްދައެއް ނެތި، އަދި ގަވާއިދުން ފީ ދައްކައިގެން ހުއްދަ ނަގައިގެން ފަޅު ބޭނުންކުރާ އެހެން ފަރާތްތަކަށް ބޮޑެތި ދަތިތަކާ ކުރިމަތިވާ ގޮތަށް ބާއްވާފައި ހުރި އުޅަނދުތަކެކެވެ. މީގެ ސަބަބުން ފަޅުތެރޭގެ ޖާގަ ކުޑަވެ، ދަތުރުފަތުރު ކުރުމަށާއި އުޅަނދުފަހަރު އެޅުމުގައި އާންމުންނަށް ގިނަ ގޮންޖެހުންތަކެއް ކުރިމަތިވަމުން ދިޔަކަން ކައުންސިލުން ފާހަގަކުރިއެވެ.

ވިލިމާލޭގެ ފަޅަކީ މާލެ ސިޓީ ކައުންސިލްގެ އިހްތިސާސްގެ ތެރޭގައި ހިމެނޭ، އެ ކައުންސިލުން ބަލަހައްޓަމުން ގެންދާ ސަރަހައްދަކަށް ވުމާއެކު، ފަޅުތެރޭގެ ތަރުތީބު ގެއްލޭގޮތަށް އަމަލުކުރާ ފަރާތްތަކާމެދު ގާނޫނީ ފިޔަވަޅު އަޅަން ފަށާފައިވަނީ ހުރިހާ ރައްޔިތުންނަށްވެސް ހަމަހަމަކަމާއެކު ފަސޭހައިން ފަޅުގެ ޚިދުމަތް ލިބިދިނުމުގެ މަގުސަދުގައެވެ.

އެހެންކަމުން، ވިލިމާލޭ ފަޅު ބޭނުންކުރާ ހުރިހާ އުޅަނދުފަހަރުގެ ވެރިންވެސް، ކައުންސިލުން ކަނޑައަޅާފައިވާ ގަވާއިދުތަކާއި އުސޫލުތަކަށް ފުރިހަމައަށް އިހުތިރާމްކޮށް، އެއްބާރުލުން ދިނުމަށް މާލެ ސިޓީ ކައުންސިލުން ވަނީ ވަރަށް ބޮޑަށް އިލްތިމާސްކޮށްފައެވެ. އަދި ކުރިއަށް އޮތް ތަނުގައިވެސް ފަޅުތެރެ ބެލެހެއްޓުމުގެ މަސައްކަތް ހަރުދަނާކަމާއެކު ކުރިއަށް ގެންދާނެ ކަމަށް އެ ކައުންސިލުން ބުނެފައިވެއެވެ.