ރާއްޖޭގެ ފަތުރުވެރިކަމާއި ހޮސްޕިޓާލިޓީ ދާއިރާގައި ބާއްވާ އެންމެ ބޮޑު އެއް ހަރަކާތް ކަމަށްވާ "ހޮޓެލް އޭޝިއާ އެގްޒިބިޝަން 2026" ގައި، މަޝްހޫރު ވިޔަފާރި ކުންފުނި ޔޫރޯ މާކެޓިންގ އިން ބައިނަލްއަޤްވާމީ ފެންވަރުގެ ގިނަ އުފެއްދުންތަކަކާއެކު ބައިވެރިވެއްޖެއެވެ.

މިއަދުން ފެށިގެން މިމަހު 30 އަށް ހުޅުމާލޭގެ ސިންތެޓިކް ޓްރެކުގައި ކުރިއަށްދާ މި މައުރަޒަކީ ރާއްޖޭގެ އެކި ކަންކޮޅުތަކުގައި މަސައްކަތްކުރާ ހޮސްޕިޓާލިޓީ ދާއިރާގެ އިސް ފަރާތްތަކާއި، ވިޔަފާރިވެރިން އަދި މި ދާއިރާގެ ޕާޓްނަރުން އެއް ފުރާޅެއްގެ ދަށުން ބައްދަލުވެ، އައު ފުރުސަތުތައް ހޯދުމަށް ލިބޭ ވަރަށް މުހިންމު ޕްލެޓްފޯމެކެވެ.





މި މައުރަޒުގައި ހުންނަ ޔޫރޯ މާކެޓިންގގެ ސްޓޯލްތަކަށް ޒިޔާރަތްކުރާ ފަރާތްތަކަށް، އެ ކުންފުނިން ރާއްޖެ އެތެރެކުރާ ބައިނަލްއަޤްވާމީ މަޝްހޫރު އެތައް ބްރޭންޑެއްގެ ކާބޯތަކެތި ބަލައިލުމުގެ ފުރުސަތު ވަނީ ހުޅުވާލެވިފައެވެ. އަދި ހަމައެއާއެކު، މައުރަޒު ކުރިއަށްދާ މުއްދަތުގައި އެ ސްޓޯލްތަކުން ލައިވްކޮށް ތަކެތީގެ ރަހަ ބަލާލުމުގެ ފުރުސަތު ވެސް ޒިޔާރަތްކުރާ ފަރާތްތަކަށް ލިބިގެންދާނެއެވެ. މިކަމުގެ ސަބަބުން، ހޮސްޕިޓާލިޓީ އަދި ފުޑް ސަރވިސްގެ ދާއިރާގައި މި ތަކެތި ބޭނުންކުރެވިދާނެ ގޮތްތަކާއި، އުފެއްދުންތަކުގެ ފެންވަރު އަމިއްލައަށް ތަޖުރިބާކޮށްލުމުގެ މަގު ފަހިވެގެންދެއެވެ.





މިފަހަރުގެ އެގްޒިބިޝަންގައި މިހާރު ވެސް ރާއްޖޭގެ ބާޒާރުގައި މަޤްބޫލުކަން ހޯދާފައިވާ ތަކެތީގެ އިތުރުން، މުޅިން އަލަށް ޔޫރޯ މާކެޓިންގގެ ޕޯޓްފޯލިއޯއަށް އިތުރުކުރެވުނު އައު އުފެއްދުންތައް ވެސް ދައްކާލުމަށް ވަނީ ހަމަޖެހިފައެވެ. މިއީ އެ ކުންފުނީގެ މިހާރުގެ ކަސްޓަމަރުންނާއި ޕާޓްނަރުންނާ އޮތް ގުޅުން އިތުރަށް ބަދަހިކޮށް، ދާއިރާގެ އައު ފަރާތްތަކާ ގުޅުން ޤާއިމުކުރުމަށް ލިބުނު ވަރަށް ރަނގަޅު ފުރުސަތެކެވެ.

ހޮޓެލް އޭޝިއާގައި ބައިވެރިވުމާ ގުޅޭގޮތުން ޔޫރޯ މާކެޓިންގގެ މާކެޓިންގ މެނޭޖަރ ނާއިޝް ޝާތިރު ވިދާޅުވީ، ހޮޓެލް އޭޝިއާގައި ބައިވެރިވުމަކީ ހޮސްޕިޓާލިޓީ ދާއިރާގެ ފަހަތުގައި ތިބި މުހިންމު ފަރާތްތަކާ ސީދާ ބައްދަލުކޮށް ގުޅުން ބަދަހިކުރުމަށް ލިބޭ ވަރަށް ބޮޑު ފުރުސަތެއް ކަމަށެވެ. އަދި ކުންފުނީގެ ބައިނަލްއަޤްވާމީ ޕޯޓްފޯލިއޯގެ އުފެއްދުންތައް މި މައުރަޒުގައި ދައްކާލުމުގެ އިތުރުން، މިހާރުގެ ޕާޓްނަރުންނާ ބައްދަލުކޮށް، ދާއިރާއަށް އަލަށް ގުޅޭ ފަރާތްތަކާ ވާހަކަދައްކާލަން ލިބުމަކީ ބޮޑު އުފަލެއް ކަމަށް އޭނާ ފާހަގަކުރެއްވިއެވެ. މީގެއިތުރުން މިއީ އައު އުފެއްދުންތައް ތަޢާރަފުކޮށް، މާކެޓަށް އަންނަމުންދާ ބަދަލުތަކާއި ބޭނުންތަކާ ގުޅޭގޮތުން މަޝްވަރާކުރުމަށް ލިބޭ ވަރަށް ފުރިހަމަ މައިދާނެއް ކަމުގައި ވެސް ނާއިޝް ވިދާޅުވިއެވެ.





މި މައުރަޒުގައި ޔޫރޯ މާކެޓިންގގެ އުފެއްދުންތައް ދައްކާލުމަށް ހަމަޖެހިފައިވަނީ ހުޅުމާލޭގެ ސިންތެޓިކް ޓްރެކުގައި ހުންނަ އެ ކުންފުނީގެ ސްޓޯލް ނަންބަރު އޭ058، އޭ080، އޭ081 އަދި އޭ059 ގައެވެ. މިއަދުން ފެށިގެން ސެޕްޓެމްބަރު 30 އަށް، ކޮންމެ ދުވަހެއްގެ ވެސް ހެނދުނު 10:00 އިން ހަވީރު 7:00 އަށް މި ސްޓޯލްތަކަށް ޒިޔާރަތްކޮށް، ޔޫރޯ މާކެޓިންގގެ ޓީމާ ބައްދަލުކޮށް މަޢުލޫމާތު ހޯދުމުގެ އިތުރުން ތަފާތު އެކި އުފެއްދުންތަކުގެ ރަހަތައް ލައިވްކޮށް ތަޖުރިބާކޮށްލުމުގެ ފުރުސަތު ހުރިހާ ފަރާތްތަކަށް ވެސް ވަނީ ހުޅުވާލެވިފައެވެ.