އީރާނާ ދެކޮޅަށް ކުރަމުންދާ ހަނގުރާމަ ނިމުމަކަށް އައިސް، ދުނިޔޭގެ ބާޒާރުގައި ތެލުގެ އަގުތައް "ވަގުތުން" ދަށަށް ދާނީ އަންނަ ނޮވެމްބަރު މަހު ބާއްވާ އެމެރިކާގެ މިޑްޓާމް އިންތިޚާބަށްފަހު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ނޫސްވެރިންނާ މުޚާތަބުކުރައްވައި ވާހަކަދައްކަވަމުން ޓްރަމްޕް ވިދާޅުވީ، އިޤްތިޞާދީ ގޮތުންނާއި އަސްކަރީ ގޮތުން އީރާނަށް ދެން އިތުރަށް މި ހަނގުރާމައިގައި ހިފަހައްޓައިނުލެވޭނެ ކަމަށެވެ. އަދި އެމެރިކާގެ އިންތިޚާބު ނިމުމާއެކު، މެދުއިރުމަތީގެ މަސްރަޙަށް ބޮޑެތި ބަދަލުތަކެއް އައިސް ހަނގުރާމަ ނިމުމަކަށް އަންނާނެ ކަމަށް އޭނާ ފާހަގަކުރެއްވިއެވެ. މީގެއިތުރުން، ހަނގުރާމަ ނިމުމަކަށް އައުމާއެކު ދުނިޔޭގެ ބާޒާރުގައި މިހާރު އުފުލެމުންދާ ތެލުގެ އަގުތައް ވަރަށް އަވަސް މިނެއްގައި ތިރިވާން ފަށާނެ ކަމުގެ ޔަޤީންކަން ވެސް ޓްރަމްޕް ދެއްވިއެވެ.

ވޮޝިންގްޓަނުން ތެހެރާނާއެކު މިވަގުތު ވަކި ޚާއްޞަ އެއްބަސްވުމެއް ޤާއިމުކުރުމަށް މަސައްކަތް ނުކުރާ ކަމަށް ވިދާޅުވަމުން، ޓްރަމްޕް އިޝާރާތް ކުރެއްވީ ކުރިއަށް އޮތް ތަނުގައި ދެ ޤައުމުގެ ދެމެދުގައި ސިޔާސީ ގޮތުން މުހިންމު މަޝްވަރާތަކެއް ކުރެވިދާނެ ކަމަށެވެ. އަދި އެ މަޝްވަރާތައް ބިނާވާނީ އެމެރިކާގެ މަސްލަހަތު ހިމާޔަތްކުރުމުގެ މައްޗަށް ކަމަށްވެސް އޭނާ ވިދާޅުވިއެވެ.

މަސްރަޙު ދިރާސާކުރާ ފަރާތްތަކުން ލަފާކުރާ ގޮތުގައި، އެމެރިކާގެ އިންތިޚާބާ ދިމާކޮށް ތެލުގެ އަގު ކޮންޓްރޯލް ކުރުމަކީ އެ ޤައުމުގެ ރައްޔިތުންގެ ވޯޓަށް ވަރަށް ބޮޑަށް ނުފޫޒު ފޯރުވާނެ ކަމެކެވެ. އަދި މެދުއިރުމަތީގެ ހަމަނުޖެހުންތަކުގެ ސަބަބުން ބައިނަލްއަޤްވާމީ ވިޔަފާރިއަށާއި ދަތުރުފަތުރަށް ބޮޑެތި ގޮންޖެހުންތަކެއް ކުރިމަތިވެފައިވާއިރު، މި ހަނގުރާމަ އަވަހަށް ނިމުމަކަށް އައުމަކީ ދުނިޔޭގެ އިޤްތިޞާދަށް ލިބޭނެ ވަރަށް ބޮޑު ލުޔެކެވެ.

އަނެއްކޮޅުން، އީރާނުން ދަނީ އެ ޤައުމުގެ އިސްތިޤްލާލާއި ދިފާޢުގައި ފަސްނުޖެހޭނެ ކަމަށް ބުނެ، ބައިނަލްއަޤްވާމީ ފިއްތުންތަކަށް ބޯނުލަނބާނެ ކަމުގެ އިންޒާރު ތަކުރާރުކޮށް ދެމުންނެވެ. މިކަމުގެ ސަބަބުން ކުރިއަށް އޮތް ދުވަސްތަކުގައި ދެ ޤައުމުގެ ދެމެދުގައި އޮތް ނުތަނަވަސްކަން އިތުރަށް ގޯސްވެދާނެ ކަމުގެ ބިރުވެސް ވަނީ ހީވެފައެވެ.