އީރާނާ ދެމެދު އުފެދިފައިވާ މަސްރަހު ފިނިކުރުމަށް އެއްބަސްވުމަކަށް އަންނާނީތޯ ނުވަތަ އެ ގައުމަށް ބާރުގަދަ އަސްކަރީ ހަމަލާތަކެއް ދީ "ގޮއްވާލާނީތޯ" އެމެރިކާއިން ވަރަށް އަވަހަށް ގޮތެއް ނިންމަންޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް މިހެން ވިދާޅުވީ ވައިޓް ހައުސްގެ އޯވަލް އޮފީހުގައި ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.

އީރާނުގެ މަސްއޫލުވެރިންނަކީ "މޮޔައިން" ގޮތުގައި ސިފަކުރައްވައި، އެ ފަރާތްތަކާއެކު މުއާމަލާތް ކުރައްވާނީ ކިހިނެއްތޯ ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޓްރަމްޕް ވަނީ އެމީހުން ގޮއްވާލުމަކީވެސް އެކަށީގެންވާ ކަމެއް ކަމަށް އިޝާރާތް ކުރައްވާފައެވެ.

އަދި ދެ ގައުމުގެ ދެމެދުގައި ހުރި މައްސަލަތަކަށް ކޮންމެވެސް އެއް ގޮތަކަށް ވަރަށް އަވަހަށް ނިމުމެއް އަންނާނެ ކަމަށާއި، އެކަމާ މެދު ގޮތެއް ނިންމުމުގެ ވަގުތު ކުޑަތަންވަމުންދާ ކަމަށްވެސް އޭނާ ވިދާޅުވިއެވެ.

ޓްރަމްޕް މިފަދަ ވަރުގަދަ އިންޒާރެއް ދެއްވާފައި މިވަނީ، އިނގިރޭސިވިލާތުގައި ހުންނަ އެމެރިކާގެ އަސްކަރީ މަރުކަޒެއް ކަމަށްވާ އާރްއޭއެފް ފެއާފޯޑަށް ދޭން އުޅުނު ޓެރަރިސްޓު ހަމަލާއެއްގެ ފަހަތުގައި އީރާނުގެ އަތެއް ވޭތޯ އެމެރިކާއިން ތަހުގީގު ކުރަމުންދާ ދަނޑިވަޅެއްގައެވެ.

ނަމަވެސް އީރާނުގެ ހާރިޖީ ވަޒީރު އައްބާސް އަރަގްޗީ ވަނީ އެފަދަ އެއްވެސް ހަމަލާއެއް ރޭވުމުގައި އީރާނުގެ ބައިވެރިވުމެއް ނެތް ކަމަށް ވިދާޅުވެ އެ ތުހުމަތުތައް ދޮގުކުރައްވާފައެވެ.

ދެ ގައުމުގެ ދެމެދުގައި ހިނގަމުންދާ ހަތް މަސް ދުވަހުގެ ހަނގުރާމަ ހުއްޓާލުމާ ގުޅޭގޮތުން ނުސީދާ މަޝްވަރާތަކެއް ކުރެވެމުންދާއިރު، ހަމަލާތައް ހަތް ދުވަހަށް މެދުކަނޑާލުމަށް އީރާނުން ހުށަހެޅި ހުށަހެޅުން ޓްރަމްޕް ގަބޫލުފުޅު ނުކުރައްވާ ކަމަށް އީރާނުގެ ދައުލަތުގެ މީޑިއާއިން ވަނީ ރިޕޯޓުކޮށްފައެވެ.