ޖަޕާން ސަރުކާރުގެ "ޕްރޮޖެކްޓް ފޮރ ހިއުމަން ރިސޯސް ޑިވެލޮޕްމަންޓް ސްކޮލަރޝިޕް" (ޖޭޑީއެސް) ގެ ދަށުން ރާއްޖޭގެ އިންސާނީ ވަސީލަތް ތަރައްޤީ ކުރުމަށްޓަކައި، އަންނަ އަހަރަށް ކަނޑައަޅާފައިވާ ސްކޮލަރޝިޕްތަކާ ގުޅޭ އެއްބަސްވުމުގައި ދިވެހި ސަރުކާރާއި ޖަޕާނާ ދެމެދު ރަސްމީކޮށް ސޮއިކޮށްފިއެވެ.

މި އެއްބަސްވުމުގެ ދަށުން 152 މިލިޔަން ޖަޕަނީސް ޔެން (ގާތްގަނޑަކަށް އެއް މިލިޔަން ޔޫއެސް ޑޮލަރު) ގެ ހިލޭ އެހީ ރާއްޖެއަށް ފޯރުކޮށްދިނުމަށް ވަނީ ހަމަޖެހިފައެވެ. މި އެހީގެ ދަށުން ހުޅުވާލެވޭ ސްކޮލަރޝިޕް ފުރުޞަތުތަކުގައި، ޖަޕާނުގެ ފުންނާބުއުސް ތިން ޔުނިވަރސިޓީއެއްގައި ޕަބްލިކް ޕޮލިސީ، އިންޓަރނޭޝަނަލް ރިލޭޝަންސް އަދި އެންވަޔަރަމެންޓަލް މެނޭޖްމަންޓްގެ ދާއިރާއިން މާސްޓަރސް ފެންވަރަށް ކިޔެވުމުގެ މަގު ފަހިވެގެންދާނެއެވެ.

މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް އެޑިއުކޭޝަން ޑރ. އިސްމާޢީލް ޝަފީޢުއެވެ. އަދި ޖަޕާނު ސަރުކާރުގެ ފަރާތުން ސޮއިކުރެއްވީ ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ) އިން ރާއްޖެއަށް ކަނޑައަޅުއްވާފައި ހުންނަވާ ރެސިޑެންޓް ރެޕްރެސެންޓެޓިވް ޓަކީ މޮޓޯއެވެ.

މި ޕްރޮގްރާމާ ގުޅޭގޮތުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަޙްމަދު ޝަފީޢު ވިދާޅުވީ، މިއީ ސިވިލް ސަރވިސް މުވައްޒަފުންގެ ޤާބިލުކަން އިތުރުކޮށް ތަމްރީނުކުރުމަށް ޖަޕާނު ސަރުކާރުން ދެއްވާ ވަރަށް މުހިއްމު އަދި ނުހަނު ބޭނުންތެރި ފުރުޞަތުތަކެއް ކަމަށެވެ.

"މިހާތަނަށް 36 ފުރުޞަތެއް 2020 ވަނަ އަހަރުން ފެށިގެން ރާއްޖެއަށް ލިބިފައި އެބައޮތް." ސްޓޭޓް މިނިސްޓަރު ފާހަގަކުރެއްވިއެވެ.

އެޑިއުކޭޝަން މިނިސްޓްރީން ބުނީ، 2020 ވަނަ އަހަރުން ފެށިގެން ކާމިޔާބުކަމާއެކު ކުރިއަށްގެންދާ މި ޕްރޮގްރާމްގެ ދަށުން މިހާރުވެސް ރާއްޖޭގެ ނުވަ ދަރިވަރަކު ދަނީ ޖަޕާނުގައި މަތީ ތަޢުލީމު ހާސިލުކުރަމުން ކަމަށެވެ. މި މަޝްރޫޢަކީ ދިވެހިރާއްޖޭގެ ދައުލަތުގެ ހިންގުން ހަރުދަނާކޮށް، ސިވިލް ސަރވިސްގެ ޚިދުމަތްތަކުގެ ފެންވަރު މަތިކުރުމަށް އެޅިގެންދާ ވަރަށް މުހިންމު ފިޔަވަޅެއް ކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.